Undi Jenerali wa Russia yiciwe muri Ukraine – Volodymyr Zelensky

Perezida Volodymyr Zelensky wa Ukriane avuga ko undi musirikare w'Uburusiya w'ipeti rya Jenerali yiciwe mu mirwano.

Ntiyavuze izina ry'uwo musirikare, ariko umujyanama muri minisiteri y'ubutegetsi bw'igihugu ya Ukraine yavuze ko Jenerali Majoro Oleg Mityaev yishwe na batayo igendera ku bitekerezo by'ubuhezanguni izwi ku izina rya Azov.

Ibitangazamakuru byo muri Ukraine byavuze ko Jenerali Mityaev yiciwe hafi y'umujyi wa Mariupol.

Ni Jenerali wa kane bivuzwe ko yishwe, bituma bamwe bibaza impamvu abasirikare nk'abo b'Uburusiya bo ku rwego rwo hejuru begera cyane ahabera imirwano.

Abasesenguzi bacyeka ko aba Jenerali bagera kuri 20 barimo kuyobora ibikorwa bya gisirikare by'Uburusiya muri Ukraine, bivuze ko niba impfu zimaze gutangazwa zemejwe, kimwe cya gatanu cy'aba Jenerali bamaze kwicirwa mu mirwano.

Hamwe n'uko gutakaza abasirikare bo hejuru, hari inzobere zimwe zemeza ko abo ba Jenerali batishwe gutyo gusa mu buryo butunguranye, ko ahubwo bishoboka ko Ukraine irimo kugambirira abasirikare bo hejuru b'Uburusiya.

Rita Konaev wo kuri Kaminuza ya Georgetown muri Amerika yabwiye BBC ati: "Sintekereza ko ibi ari impanuka. Ari umwe yaba ari impanuka, ariko aba benshi gutya ni abagambiriwe".

Aganira n'ikinyamakuru The Wall Street Journal cyo muri Amerika, umuntu wo mu itsinda ryegereye Perezida Zelensky yavuze ko Ukraine ifite itsinda ryo mu butasi bwa gisirikare rishinzwe kwibasira abasirikare bo hejuru b'Uburusiya.

Uwo muntu yabwiye icyo kinyamakuru ati: "Bagambirira aba Jenerali bakomeye, abapilote, abakuru b'imitwe irasisha intwaro za rutura".

Mu gihe igisirikare cya Ukraine kirutwa ubwinshi, kugambirira abantu bo ku rwego rwo hejuru bishobora kuba igice cy'ingenzi mu ntambara yo guterana amagambo, nkuko bivugwa na Madamu Konaev.

Ati: "Dufashe ko harimo ikintu cyo kugambirira, ibi bitera akanyabugabo [abasirikare ba] Ukraine. Harimo ikintu cyo kumva ko barimo gutsinda. Bitera umuhate".

Kuba Ukraine yagambirira abasirikare bo hejuru b'Uburusiya, bisaba ko iba izi aho baherereye. Abasesenguzi bavuga ko Uburusiya bukomeje gukoresha imiyoboro ifunguye (irangaye) y'itumanaho ishobora gutanga amakuru y'aho bamwe mu bagambiriwe baherereye.

Konrad Muzyka, umusesenguzi mu bya gisirikare wo mu kigo cy'ubugishwanama cyitwa Rochan Consulting, yabwiye BBC ati: "Niba Abarusiya barimo gukoresha telefone zigendanwa cyangwa amaradiyo [ibyombo] akoresha uburyo butagezweho mu kuganira n'abasirikare bo hejuru, Abanya-Ukraine bashyizwe igorora".

Nyuma y'urupfu rw'undi musirikare wo hejuru - Jenerali Majoro Vitaly Gerasimov - Ukraine yatangaje amajwi avugwa ko ari ay'Abarusiya babiri bo ku rwego rwo hejuru bakora mu butasi bavugana ku rupfu rwa Jenerali, ndetse binubira kuba uburyo bw'itumanaho butekanye bwabo butarimo gukora.

Ku rugamba

Ntibisanzwe ko abasirikare nk'abo bo ku rwego rwo hejuru bishyira mu byago begera cyane ahabera imirwano, ndetse hari bamwe bo mu nzego z'umutekano zo mu bihugu by'i Burayi n'Amerika bemeza ko ibyo babikoze kugira ngo bashobore kugenzura neza ibikorwa bya gisirikare, byahuye n'inzitizi mu bice bimwe na bimwe.

Ubusanzwe igisirikare cy'Uburusiya kizwiho kugenzurwa bya hafi n'abasirikare bo hejuru, aho akenshi aba basirikare bo hejuru bayobora ibikorwa bya buri munsi, nkuko bivugwa na Bwana Muzyka. Nubwo ibi bitangiye guhinduka, bishobora gusobanura impamvu aba Jenerali bumvise bacyeneye kuyobora ibikorwa bya gisirikare bibereye ku rugamba bo ubwabo.

Bwana Muzyka yagize ati: "Mu myaka ya vuba aha ishize habayeho impinduka nini yo guhatira abakuriye imitwe y'ingabo kwitekerereza bo ubwabo mu buryo bwigenga butuma bagira ubwisanzure mu gufata ibyemezo. Ariko ibi byatangijwe gusa mu myaka itatu ishize, rero byashoboka ko bitaratanga umusaruro neza mu mikorere yabo".

Amakuru y'impfu z'abo ba Jenerali ntasobanutse neza, kandi biragoye no kubona amakuru afatika y'uko ibintu bimeze ku rugamba. Byavuzwe ko bose baguwe gitumo mu mirwano, ariko ibyo si ko bimeze nyirizina, nkuko bivugwa na Madamu Konaev.

Yabwiye BBC ati: "Ntibivuze neza ko aba Jenerali bari bari imbere ku rugamba. Bashobora kuba bari bari aho babaye bakambitse cyangwa nk'urugero barimo kugenzura ibyo kongerera ingabo ibikoresho".