Bangui: Ifatwa ry'abasirikare bane b'Ubufaransa ryari rishingiye ku biki?

Abasirikare b'Ubufaransa bane bari baherekeje umugaba w'ingabo za LONI batawe muri yombi ku wa Mbere ku kibuga cy'indege cya Bangui muri Repubulika ya Centre Africa nk'uko byatangajwe na Ambasade y'Ubufaransa mu butumwa bwa 'tweet'.

Ni ibintu byahise bibyura ibirego ku mbuga nkoranyambaga by''igerageza ryo kwivugana' Perezida wa Centre Africa.

Ibi birego byasobanuwe na Paris na LONI nk'ibihuha byo kuyobya ku buryo bukomeye.

Umuyobozi mu ngabo z'Ubufaransa yabwiye ibiro ntaramakuru by'Ubufaransa, AFP, ko abo basirikare bane b'Ubufaransa bari bakiri mu nyubako za jandarumori ku mugoroba, yongeraho ko "ikibazo kiri gukemurwa. Muri aka kanya nta mpungenge."

Mu itangazo rigenewe abanyamakuru ryasohowe ku wa Kabiri ingabo za LONI, Minusca, zivuga ko: "zibabajwe n'ibyabaye kandi zamagana bikomeye ikoreshwa ryabyo mu kuyobya ibitekerezo bya rubanda ku mbuga nkoranyambaga".

Minusca yahakanye yivuye inyuma ibirego byo kuvogera umutekano w'igihugu.

Nta kiratangazwa ku mugaragaro n'abategetsi ba Repubulika ya Centre Africa kuri ibi bintu. Impamvu yateye iri tabwa muri yombi ntiramenyekana.

Umubano hagati ya Paris na Bangui umaze imyaka warazambye mu mwuka w'intambara yo kugira ijambo hagati y'Uburusiya n'Ubufaransa.

Ubufaransa bushinja abategetsi muri Centre Africa kugira uruhare mu bikorwa birwanya Ubufaransa bicurwa na Moscow ku mbuga nkoranyambaga n'ibindi bitangazamakuru.

Uburusiya, nabwo, burega Ubufaransa gushinja ikigo cya gisirikare cy'Ubururusiya Wagner kujya mu butegetsi n'umutungo kamere wa Repubulika ya Centre Africa.

Repubulika ya Centre Africa imaze igihe mu ntambara y'umwiryane kuva uwahoze ari Perezida, François Bozizé, yahirikwa ku butegetsi n'umutwe w'inyeshyamba wa Séléka.

Ibintu bimeze nabi cyane mu gihugu, imibare itangwa na LONI ikerekana ko abanya Centre Africa miliyoni eshatu n'ibihumbi ijana bakeneye ubufasha ndetse n'uburinzi muri 2022.