Covid: US yatangaje abanduye ba mbere benshi ku munsi mu gihe n'i Burayi Omicron irimo kwiyongera

Amerika n'ibihugu byinshi by'i Burayi byatangaje imibare ya mbere yo hejuru y'abanduye Covid ku munsi kuva iki cyorezo cyatangira, mu gihe ubwoko bushya bwihinduranyije bwa Omicron burimo gukwirakwira.

Abategetsi bo mu rwego rw'ubuvuzi bavuze ko ku wa mbere muri Amerika handuye abantu bashya barenga 440,000.

Ubufaransa - ku wa kabiri bwatangaje umubare wa mbere munini cyane i Burayi w'abanduye Covid bashya ku munsi, abantu 179,807 - si bwo bwonyine bwaciye umuhigo w'abanduye benshi ku munsi.

Ubutaliyani, Ubugereki, Portugal n'Ubwongereza na byo byose byagize umubare munini w'abanduye ku munsi bitari byarigeze bigeraho mbere.

Iyi mibare ishobora ku ruhande rumwe guterwa n'ubucyererwe bwo gutangaza imibare bwabayeho kuri Noheli.

Mu gihe cy'umunsi mukuru wa Noheli ibihugu byakomeje gutangaza imibare ijya hejuru, bitewe n'ubwoko bwa Covid yihinduranyije bwa Omicron.

Ubushakashatsi butandukanye bugaragaza ko ubu bwoko bushya bwa Covid bufite ubukana bworoheje ugereranyije n'ubwa Delta, abanduye Omicron bakaba bashobora kugira ibyago biri ku kigero cyo hasi ho 30% kugeza kuri 70% byo gushyirwa mu bitaro.

Ariko ishami ry'umuryango w'abibumbye ryita ku buzima (OMS/WHO) ryaburiye ko kwiyongera kw'ubwandu i Burayi kuzatuma inzego z'ubuvuzi zigera hafi ku kunanirwa gutanga serivisi, kandi ko ibyago bitejwe na Omicron "biracyari hejuru cyane".

Skip Ibisomwa cane and continue reading
Ibisomwa cane

End of Ibisomwa cane

Amakuru mashya ya buri cyumweru ya OMS kuri Covid yatangajwe ku wa kabiri akubiyemo ko umubare w'ubwandu bushya bwa Covid wiyongereyeho 57% i Burayi mu cyumweru cya mbere yo ku itariki ya 26 y'uku kwezi kwa cumi na kabiri, ukaniyongeraho 30% mu karere k'umugabane w'Amerika.

Ku wa mbere, Minisitiri w'ubuzima w'Ubufaransa Olivier Véran yaburiye ko "buri kintu cyose gica amarenga" ko Ubufaransa bushobora kugeza ku bantu bashya 250,000 banduye ku munsi mu ntangiriro y'ukwezi kwa mbere, mu gihe ishyirahamwe ry'ibitaro byo mu Bufaransa ryavuze ko "ibyumweru bigoye cyane ntibiraza".

Mu ntangiriro y'iki cyumweru, Minisitiri w'intebe w'Ubufaransa Jean Castex yatangaje ingamba nshya, zirimo nko gukorera mu rugo by'itegeko mu gihe kitari munsi y'iminsi itatu mu cyumweru ku babishoboye, guhera mu ntangiriro y'ukwezi kwa mbere.

Abaterwa urukingo rwa Covid rwo gushimangira muri iki gihugu na bo biyongereye, abamaze kuruterwa kugeza ubu barenga miliyoni 23.

Ahandi i Burayi:

  • Ubutaliyani bwagejeje ku bantu bashya 78,000 banduye ku munsi, buca uwundi muhigo kuva iki cyorezo cyatangira;
  • Portugal na yo yaciye umuhigo w'abantu bashya 17,172 banduye ku wa kabiri;
  • Minisitiri w'ubuzima w'Ubugereki Thanos Plevris yasabye ko habaho ituze nyuma yuko iki gihugu giciye umuhigo w'abantu bashya 21,657 banduye ku wa kabiri;
  • Hagati aho, abategetsi bo mu rwego rw'ubuvuzi mu Bwongereza batangaje ko iki gihugu cyaciye umuhigo w'abantu bashya 117,093 banduye ku munsi.