Omicron: Cyril Ramaphosa anenga ibihugu byafunze ingendo gukora “nk’abahoze ari abakoroni bacu”

Perezida Cyril Ramaphosa wa Africa y'Epfo yanenze ibihugu bya Africa gukora "nk'abari abakoroni bacu" bifunga ingendo kuri icyo gihugu kubera ubwoko bwa Covid bwitwa Omicron.

Ibihugu bine bya Africa; u Rwanda, Mauritius, Seychelles na Misiri byiyongereye ku bihugu birimo iby'Iburayi na Amerika bifunga ingendo ziva n'izijya mu bihugu by'Africa y'amajyepfo.

Ramaphosa yavuze ibyo kuwa kabiri atangira urugendo muri Africa y'iburengerazuba aho azasura Nigeria, Côte d'Ivoire, Ghana na Senegal mu gushishikariza ubumwe bwa Africa n'ubucuruzi bwisanzuye.

Mu kiganiro n'abanyamakuru ageze i Abuja ntiyahishe ko yababajwe n'ibihugu bya Africa byafashe ingamba zo gufunga ingendo kubera buriya bwoko bushya bwa Covid.

Yagize ati: "Mu cyubahiro mbigomba, bifite impamvu zabyo ariko twifuza kugirana ibiganiro nabyo. Twifuza ko bitagakoze nk'abahoze ari abakoroni bacu bihutiye gufunga Africa".

Ibihugu, cyane cyane bikize, byafashe ziriya ngamba ku mpamvu zo "kwirinda ikwirakwira" rya buriya bwoko bwa virus bwatangajwe na OMS/WHO nk'ubutegeye impungenge.

Ku bihugu bya Africa nabyo byabikoze, Ramaphosa yavuze ko "bibabaje cyane kuba nabyo byaragiye muri ibyo", yongeraho ko atari umwanzuro ushingiye kuri science.

Ramaphosa yasabye ibyo bihugu gukuraho ingamba byafatiye abagenzi bo muri Africa y'amajyepfo avuga ko zizagira ingaruka ku bukungu bw'ako karere.

Hagati aho, ikigo gishinzwe kurwanya indwara z'ibyorezo muri Nigeria cyemeje ko habonetse abantu babiri ba mbere bafite Omiron, bari mu bavuye muri Africa y'Epfo mu cyumweru gishize.

Ibihugu bya Arabia Saoudite na Brazil nabyo byatangaje ko byabonye abantu ba mbere banduye Omicron.

Naho ikigo Danish Patient Safety Authority cya Denmark cyatangaje ko cyabonye umuntu wanduye Omicron wari muri 'concert' yitabiriwe n'abantu barenga 1,600 kuwa gatandatu mu majyaruguru y'iki gihugu.

Denmark yari isanzwe yaremeje abantu bane banduye Omicron, bose bari baraje bavuye muri Africa y'Epfo.