Rwanda: Ibitaro bya nyuma byavurirwagamo abarwaye Covid byahagaritse icyo gikorwa

U Rwanda rwatangaje ko ubu nta murwayi wa Covid-19 uri mu bitaro, ibi byatumye ibyari bisigaye mu byagenewe kuvura abarwaye Covid bonyine bihagarika icyo gikorwa.

Ibitaro bishya bya Nyarugenge biri i Nyamirambo kuva kuwa kabiri byongeye gufungurirwa abandi bantu bashaka serivisi zindi z'ubuvuzi nyuma y'umwaka hafi umwe byarahariwe abarwayi ba Covid gusa.

Ibi bitaro ni cyo kigo kinini cyari gifite ubushobozi n'ibisabwa byose mu kuvura abarwaye n'abarembejwe na Covid ku bitanda 130.

Ibi bitaro kenshi byakunze kuba byuzuye, kuba ubu nta murwayi bifite ni intambwe mu kurwanya iki cyorezo, gusa ushinzwe ubuzima avuga ko kuri bo iki gihe kibatera impungenge.

Ibigo by'ubuzima bya Kanyinya, Gatsata na Rwampala nabyo byari byaragizwe ahantu hihariye ho kuvurira abarwaye Covid byafunzwe mu mezi ashize uko bagiye bagabanuka.

Dr Sabin Nsanzimana ukuriye ikigo cy'u Rwanda cy'ubuzima, RBC, yabwiye BBC ko iyi ntambwe yo kugabanuka kwa virus igezweho kubera ingamba zikomeye zo kuyirinda no kuyukingira.

Ati: "Muri Kigali abantu 90% barengeje imyaka 18 bafashe doze ebyiri, mu turere twinshi naho tumaze kurenza 50% by'abakingiwe inkingo zombi, ibyo byose byaciye intege iyi virus."

Muri iki gihe ibikorwa by'ubuzima busanzwe bisa n'ibigenda bisubira nk'uko byahoze mbere ya Covid.

Dr Nsanzimana avuga ko akenshi abantu iyo babona imibare iri hasi "bagira ngo byakemutse, ariko twe buriya ni bwo tuba dufite impungenge nyinshi ko byakongera kwiyongera".

Yongeraho ati: "Uko imirimo ifunguka ni nako virus nayo ishobora kongera ikihembera cyane cyane iyo twegereza iminsi mikuru isoza umwaka, n'umwaka ushize byarabaye."

Ikigo cy'ubuzima cya Kanyinya, kiri hanze gato ya Kigali, kizakomeza kuba giteguriwe kwakira abarwayi ba Covid mu gihe iyi virus yakongera kwiyongera, nk'uko Dr Nsanzimana abivuga.