Indege z'intambara za mbere nyinshi za China zinjiye mu karere k'ubwirinzi bwa Taiwan

Taiwan yashishikarije Ubushinwa kureka "ibikorwa by'ubushotoranyi bitarimo gushyira mu gaciro", nyuma yuko umubare wa mbere munini w'indege z'intambara z'Ubushinwa zinjiye mu karere k'ubwirinzi bwayo mu kirere.

Uko kuvogerwa ko ku wa mbere gutumye uba umunsi wa kane wikurikiranya indege z'intambara z'Ubushinwa zivogereye ako karere.

Ubu indege hafi 150 zose hamwe ni zo zimaze koherezwa muri ako karere k'ubwirinzi bwa Taiwan.

Abasesenguzi bamwe bavuga ko izo ngendo z'indege zishobora kubonwa nka gasopo kuri Perezida wa Taiwan mbere y'umunsi mukuru w'igihugu w'iki kirwa (izinga mu Kirundi) wizihizwa ku itariki ya 10 y'ukwezi kwa cumi.

Ubushinwa bufata Taiwan nk'intara yabwo yabwikuyeho.

Ariko Taiwan, irimo demokarasi, yo yibona nka leta yigenga.

Mu nyandiko yasohoye mu kinyamakuru Foreign Affairs kuri uyu wa kabiri, Perezida wa Taiwan Tsai Ing-wen yaburiye ko habaho ingaruka "mbi cyane" ku mahoro na demokarasi muri Aziya mu gihe iki kirwa cyaba cyigaruriwe n'Ubushinwa.

Yanditse ati: "Byaba bigaragaje ko mu ihatana ry'indangagaciro mu isi yo muri iki gihe, ubutegetsi bw'igitugu ari bwo bufite ijambo kurusha demokarasi".

Madamu Tsai yongeyeho ko nubwo Taiwan idashaka ubushyamirane, "izakora igishoboka cyose mu kwirwanaho".

Taiwan imaze umwaka urenga yinubira indege z'igisirikare cy'Ubushinwa kirwanira mu kirere zakomeje kugurukira hafi yayo.

Izo ndege z'intambara z'Ubushinwa zagurukiye muri ako karere ka Taiwan ku wa mbere, zari zirimo nk'indege 34 zo mu bwoko bwa J-16, na 12 zo mu bwoko bwa H-6 zifite ubushobozi bwo kumisha ibisasu kirimbuzi bya nikleyeri, .

Zose zagurukiye mu karere kari hafi y'ibirwa bya Pratas Islands bigenzurwa na Taiwan, nkuko bigaragazwa n'ikarita yatanzwe na leta ya Taiwan.

Izindi ndege enye z'intambara z'Ubushinwa zagaragaye ku wa mbere nijoro, bituma izagaragaye muri ako karere zose hamwe mu munsi umwe zigera kuri 56.

Urwego rukuru rwa Taiwan rw'igenamigambi ku Bushinwa, ruzwi nka Mainland Affairs Council (MAC), rwashinje Ubushinwa "kwangiza bikomeye uko ibintu bimeze ku bijyanye n'amahoro n'ituze mu bunigo bwa Taiwan".

Mu itangazo, umuvugizi wa MAC Chiu Chui-cheng yagize ati: "Turasaba abategetsi ba Beijing guhita bahagarika ibikorwa byayo bitagamije amahoro kandi bitarimo gushyira mu gaciro by'ubushotoranyi".

Yongeyeho ati: "Ubushinwa ni bwo buteza ubushyamirane hagati y'impande ebyiri z'ubunigo (bwa Taiwan) kandi bwarushijeho gushyira inkeke ku mutekano n'ituze by'akarere".

Yavuze ko Taiwan "nta na rimwe izagamburuzwa" no gushyirwa ku nkeke.

Mu gusubiza, Ubushinwa bwashinje Leta Zunze Ubumwe z'Amerika kuba nyirabayazana, buyiburira kwirinda gushyigikira ubwigenge bwa Taiwan.

Minisiteri y'Ubushinwa yagize iti: "Kugira uruhare mu bwigenge bwa Taiwan ni ukwigerezaho. Ubushinwa buzafata ingamba zose zicyenewe bushwanyaguze imigambi yose igamije ubwigenge bwa Taiwan".

Yongeyeho ko Amerika ikwiye kureka gushyigikira no "gukabiriza" ingabo zishaka kwigenga kwa Taiwan.

Mbere, abasesenguzi bari baburiye ko Ubushinwa burimo kurushaho guhangayikishwa no kuba leta ya Taiwan irimo kwerekeza iki kirwa hafi y'itangazwa ku mugaragaro ry'ubwigenge, bukaba bwashakaga guha gasopo Perezida wa Taiwan Tsai Ing-wen ngo ntafate ingamba ziganisha muri icyo cyerekezo.

Ariko Perezida Tsai yakomeje kuvuga ko Taiwan isanzwe yaramaze kuba leta yigenga, ko rero kubitangaza ku mugaragaro bidacyenewe.

Iki kirwa gifite itegekonshinga ryacyo, igisirikare, ndetse n'abategetsi batowe binyuze mu nzira ya demokarasi.

Ubushinwa buvuga ko n'ingufu zishobora gukoreshwa kugira ngo bugere ku kwihuza na Taiwan.

Ubushinwa na Taiwan: Iby'ibanze