Ethiopia – Tigray: António Guterres yasabye ko imirwano ihagarara aka kanya

Umunyamabanga mukuru w'umuryango w'abibumbye yongeye gusaba ko imirwano ihagarara aka kanya mu karere ka Tigray mu majyaruguru ya Ethiopia, aho ingabo za leta n'inyeshyamba bakomeje kurwanira kuva mu kwezi kwa cumi na kumwe mu 2020.

António Guterres yavuze ko uko ubuzima bumeze muri Tigray ari "ikuzimu", anavuga ko imiryango itanga imfashanyo icyeneye kuhagera mu buryo busesuye.

Yamaganye ihohoterwa rishingiye ku gitsina ku bagore bo muri Ethiopia rikoreshwa nk'igikoresho cyo mu ntambara.

Ubwo yaganiraga n'abanyamakuru i New York, Bwana Guterres yavuze ko nta muti ushoboka unyuze mu ngufu za gisirikare wacyemura ikibazo cy'imirwano, ubu yageze mu turere duhana imbibi na Tigray.

Yavuze ko "hagomba gushyirwaho uburyo bwo gutuma hatangira ibiganiro bya politiki biyobowe n'Abanya-Ethiopia mu gushakira umuti aya makuba".

Ati: "Ibyo biganiro bishobora gutanga umusanzu mu gucyemura impamvu zihishe zateje imirwano bikanatuma amajwi y'Abanya-Ethiopia ayobora urugendo ruganisha ku mahoro".

Abantu babarirwa muri za miliyoni bakuwe mu byabo n'imirwano, naho abandi babarirwa mu bihumbi amagana babayeho mu nzara.

Imirwano yakajije umurego kuva mu kwezi kwa gatandatu ubwo inyeshyamba - zibumbiye mu mutwe wa Tigray Defence Forces (TDF) uhuriwemo na Tigray People's Liberation Front (TPLF) n'indi mitwe yitwaje intwaro yaho - zisubizaga igice kinini cya Tigray harimo n'umurwa mukuru wayo Mekelle.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n'ingabo za leta ya Ethiopia mu kwezi kwa cumi na kumwe mu 2020.

Abakuru ba TPLF bashwanye na Minisitiri w'intebe Abiy Ahmed ku bijyanye n'amavugurura muri politiki, nubwo kuba TPLF yarafashe ibigo bya gisirikare by'ingabo za leta byo muri Tigray ari yo yabaye imbarutso y'igitero leta yayigabyeho.

Leta ya Ethiopia ivuga ko TPLF ari umutwe w'iterabwoba, ariko TPLF yo ivuga ko ari yo leta y'akarere ka Tigray yemewe n'amategeko.