Covid: Canada mu kwa munani izafungura umupaka ku Banyamerika bakingiwe
Ahavuye isanamu, Getty Images
Mu kwezi gutaha Canada izafungura imipaka yayo ku baturage ba Leta Zunze Ubumwe za Amerika bakingiwe byuzuye nyuma y'amezi 17 ifunze.
Uku koroshya ingamba bije nyuma y'uko hari umubare munini w'abamaze gukingirwa muri Canada na Covid ikagabanuka.
Nibikomeza kugenda gutyo, mu kwezi kwa cyenda Canada izatangira guha ikaze n'abandi bo mu yandi mahanga bakingiwe byuzuye.
Abagenzi bose bazaba bagomba kwerekana icyangombwa ko batanduye Covid-19 mbere yo kwinjira.
Izo mpinduka ku bagenzi b'Abanyamerika n'abafite uburenganzira bwo kuhatura zizatangira kubahirizwa tariki 9 z'ukwa munani.
Leta ya Canada yafunze bwa mbere imipaka yayo mu kwa gatatu 2020, ibuza kwinjira abantu bose bo mu mahanga badafite impamvu zikomeye.
Canada na Amerika byumvikanye kubuza kwambuka kutihutirwa cyane ku mupaka w'ubutaka wabyo ureshya na 8,850km.
Amerika yo ntiratangaza niba izemerera Abanyacanada kwinjira baciye ku mupaka w'ubutaka ku bagenzi bose.
Abanyacanada n'abemerewe kuhatura bavuye muri Amerika bagombaga kujya mu kato k'iminsi 14 igihe binjiye muri Canada bavuye muri Amerika, harimo n'iminsi itatu y'akato muri hoteli zemejwe na leta.
Mu ntangiriro z'uku kwezi, Ottawa yakuyeho ayo mabwiriza ku Banyacanada bose bakingiwe byuzuye. Izo ngamba ariko ziracyariho ku bataratewe inkingo za Covid Canada yemera - Pfizer-BioNTech, Moderna, AstraZeneca na Johnson & Johnson.
Kuva mu kwezi gutaha, abinjira muri Canada bavuye muri Amerika bazajya berekana ko bakingiwe inkingo zombi iminsi 14 mbere yo kuza muri Canada.
Nyuma yo gutangira bigenda buhoro, gukingira muri Canada byaje kwihuta.
Hafi kimwe cya kabiri cy'abaturage ba Canada bamaze gukingirwa byuzuye, barimo 56% by'abarengeje imyaka 12. Hafi 70% by'Abanyacanada bafashe nibura doze ya mbere y'urukingo.
Ibi bitandukanye no muri Amerika aho gushidikanya izi nkingo byatumye ubu abamaze kuzifata bagera hafi kuri 48% n'ubwo igihugu gifite ubushobozi bwo gukingira abaturage bose.
