Zaila Avant-garde: Umwirabura wa mbere w'umunyamerika watwaye irushanwa ryo kuvuga imigemo

Umukobwa usanzwe afite ubuhanga budasanzwe muri basketball yabaye umwirabura wa mbere w'umunyamerika utwaye irushanwa ryo kuvuga imigemo y'amagambo rizwi nka US Scripps National Spelling Bee.

Zaila Avant-garde w'imyaka 14 wo mu mujyi wa New Orleans muri leta ya Louisiana, yageze ku ntsinzi amaze kuvuga adasobanya imigemo igize ijambo "murraya", ubwoko bw'ibiti.

Mbere yo kugera aho yari yabanje kuvuga neza imigemo igize amagambo "querimonious" na "solidungulate".

Nubwo yitoza amasaha arindwi ku munsi, avuga ko kwiga imigemo y'amagambo ari ikintu akora ku ruhande - intego ye y'ibanze ni ukuzaba umukinnyi wa basketball wabigize umwuga.

Asanzwe afite imihigo itatu y'isi yo kudunda imipira myinshi icya rimwe, kandi yabonetse mu mashusho yamamaza ari kumwe n'icyamamare muri NBA Steph Curry.

Zalia yahigitse abandi 11 bageze ku kiciro cya nyuma kuwa kane yegukana iki gihembo cy'agaciro ka $50,000 (50,000,000Rfw) mu gikorwa cyabereye muri Orlando, Florida.

Kuri 'final' yatsinze Chaitra Thummala w'imyaka 12 uva ahitwa Frisco muri Texas.

Kuva mu 2008 ni ubwa mbere umuntu udafite inkomoko muri Aziya y'epfo yegukanye Scripps National Spelling Bee nk'uko bivugwa n'ibiro ntaramakuru Associated Press.

Zalia wigira mu rugo, yabwiye ikinyamakuru cy'iwabo New Orleans Times-Picayune ati: "Mu kumenya imigemo, ubundi ngerageza gukora amagambo 13,000 [ku munsi], kandi ibyo ubundi bisaba amasaha arindwi cyangwa arenga.

"Ntabwo kandi biba birangiye. Mba ngomba no kwiga amasomo no gukina basketball."

Zalia yabaye umwirabura wa kabiri utwaye iri rushanwa - Jody-Anne Maxwell wo muri Jamaica, yaryegukanye mu 1998 afite imyaka 12.