Covid yo mu Buhinde irimo gushegesha gahunda yo gusaranganya inkingo ya Covax

Gahunda y'ibihugu yo gusaranganya inkingo za Covid-19 hagati y'ibikize n'ibicyennye irimo kubura doze miliyoni 140 kubera ikibazo gikomeje cya Covid mu Buhinde.

Ikigo Serum Institute of India (SII) cyo mu Buhinde, cya mbere kigemura inkingo nyinshi muri iyo gahunda izwi nka Covax, nticyohereje inkingo cyateganyaga kohereza kuva mu kwezi kwa gatatu ubwo kuzohereza mu mahanga byahagarikwaga.

Ishami ry'umuryango w'abibumbye ryita ku bana (UNICEF) ni ryo rigura rikanakwirakwiza inkingo zo muri gahunda ya Covax.

Ririmo gushishikariza abategetsi b'ibihugu 7 bihuriye mu itsinda rizwi nka G7, n'ibihugu byo mu muryango w'Ubumwe bw'Uburayi (EU/UE), gusaranganya doze zabo n'ibihugu bicyennye.

Biteganyijwe ko abo bategetsi bahurira mu nama mu Bwongereza mu kwezi gutaha kwa gatandatu.

UNICEF ivuga ko amakuru yo mu bushakashatsi yakoresheje avuga ko iri tsinda ry'ibihugu rishobora gutanga imfashanyo ya doze miliyoni 153 z'inkingo, kandi rigakomeza kugera ku ntego zaryo zo gukingira abaturage baryo.

'Umuhangayiko ukomeye'

Ikigo SII gitubura inkingo cyo mu Buhinde, cyari cyitezweho kugemura inkingo zirenga kimwe cya kabiri cy'inkingo miliyari ebyiri zo muri Covax muri uyu mwaka.

Ariko nta nkingo cyagemuye mu kwezi kwa gatatu, ukwa kane cyangwa uku kwa gatanu.

Byitezwe ko umubare w'inkingo zibura uzamuka ukagera kuri doze miliyoni 190 mu mpera y'ukwezi kwa gatandatu.

Gian Ghandi, umukozi wa UNICEF uhuza ibikorwa byo gutanga inkingo muri Covax, yagize ati:

"Mu buryo bubabaje, turi ahantu aho tutazi igihe icyiciro gikurikiyeho cya doze kizabonekera".

Ati: "Icyizere cyacu ni uko ibintu bizasubira mu buryo, ariko uko ibintu bimeze mu Buhinde biteye urujijo… n'umuhangayiko ukomeye".

UNICEF isaba ibihugu bya G7 - Canada, Ubufaransa, Ubudage, Ubutaliyani, Ubuyapani, Ubwongereza n'Amerika, ndetse n'umuryango wa EU, gutanga byihutirwa imfashanyo y'inkingo z'umurengera zabyo.

Ibihugu bimwe byatumije inkingo zihagije zo gukingira abaturage babyo inshuro nyinshi z'umurengera. Ibyo birimo nk'Ubwongereza, Amerika na Canada.

Mu kwezi kwa kabiri, Minisitiri w'intebe w'Ubwongereza Boris Johnson yasezeranyije gutanga nyinshi muri doze z'umurengera z'iki gihugu akaziha ibihugu bicyennye cyane, ariko ntabwo yatanze igihe ibyo bizakorerwa.

Ibyo ni ko bimeze kandi no kuri Amerika.

Kugeza ubu, Ubufaransa ni cyo gihugu cyonyine cyo muri G7 kimaze gutanga imfashanyo ya doze z'inkingo ku Buhinde muri iki gihe cy'amakuba.