Bill Gates 'yasabye imbabazi abo bakorana' bigendanye n'ibyo avugwaho ku mubano we na Jeffrey Epstein

Bill Gates yasobanuye ku mugaragaro isano ye na Jeffrey Epstein, wahamwe n'ibyaha bifitanye isano no gusambanya abangavu. Ibi yabikoreye mu nama yagiranye n'abakozi b'umuryango we w'ubugiraneza.

Mu itangazo ryashyizwe ahagaragara na Gates Foundation, hagaragajwe ko "Bill yavuganye n'abakozi mu mucyo, asubiza ibibazo bitandukanye mu buryo burambuye."

Ikinyamakuru The Wall Street Journal (WSJ) cyatangaje ko Gates yasabye imbabazi abakozi, akemera ko yagiranye umubano wihariye n'abagore babiri b'Abarusiya, kandi ko Epstein yaje kubimenya.

Ku bijyanye na Epstein waguye muri gereza, Gates yagize ati: "Nta gikorwa kinyuranyije n'amategeko nakoze, kandi nta na kimwe nabonye."

Gates yongeye kuvugwaho cyane mu itangazamakuru no mu ruhame ku birebana n'umubano we na Epstein, nyuma y'itangazwa ry'amadosiye yashyizwe ahagaragara na Minisiteri y'Ubutabera ya Leta Zunze Ubumwe za Amerika muri Mutarama (1) uyu mwaka.

Uyu mukuru wa sosiyete ya Microsoft, ufite imyaka 70, ntabwo yigeze ashinjwa icyaha na kimwe n'abagore bavugwa ko yahuye nabo kubera Jeffrey Epstein.

Ikinyamakuru Wall Street Journal (WSJ) cyatangaje ko Gates yavuze ko byari "ikosa rikomeye kumarana igihe na Epstein", ariko yizeza ko "ntigeze marana igihe n'abagore bagize ikibazo cyangwa abo yari afite hafi ye".

Nk'uko iki kinyamakuru cyo muri Amerika cyabitangaje nyuma yo gusuzuma ukuri kw'amajwi cyifashishije, Gates yabwiye abakozi be ati: "Ndisegura ku bandi bantu bashobora kuba barisanze muri ibi bintu, kubera ikosa nakoze."

WSJ yongeyeho ko Gates yavuze ko amafoto ye hamwe n'abagore, aho amasura yabo atagaragajwe, agahabwa inyito mu byitwa "Imfashanyigisho za Epstein", yavuzwe uko atari, kuko yari amafoto yafatiwe aho bari bagiye gushyingura umucuruzi wapfuye, hanyuma agasabwa kwifotozanya n'abari bamwungirije nyuma yo gukorana inama.

Gates yabwiye abakozi ba fondasiyo ye ko yahuye na Jeffrey Epstein mu 2011, imyaka myinshi nyuma y'uko Epstein yemeye ibyaha.

Yongeyeho ko yari azi ibyerekeye ikintu cyiswe "18-month thing" cyari cyarabujije ingendo za Epstein, ariko ko atari yaragenzuye neza amateka ye, nk'uko ikinyamakuru WSJ cyabitangaje.

Yakomeje asobanura uko yahuye kenshi na Epstein kugeza mu 2014, kandi yakomezaga kumarana igihe na we mu mahanga, nk'uko bivugwa, anongeraho ko "nta gihe na kimwe yigeze arara aho Epstein atuye cyangwa ngo asure ikirwa cye."

Uwo mubano wakomeje n'igihe uwahoze ari umugore Melinda Gates yagaragazaga gushidikanya, nk'uko bivugwa, anongeraho ati: "Nk'uko byari bisanzwe yakundaga gushidikanya ku birebana na Epstein."

Epstein yamubwiye ko afite umubano n'abandi bakire bakomeye, kandi yamugiriye inama ko ashobora kumufasha gukusanya amafaranga y'imishinga y'ubugiraneza Gates yari afite, nk'uko icyo kinyamakuru cyakomeje kibivuga.

Umuvugizi wa Gates Foundation yavuze mu itangazo ati: "Yari inama yateguwe hamwe n'abakozi, ikaba isanzwe ikorwa kabiri mu mwaka."

"Mu kiganiro, Bill yasubije ibibazo byatanzwe n'abakozi b'iyi fondasiyo ku nsanganyamatsiko zitandukanye, harimo no kurekura amadosiye ya Epstein, ibikorwa bya Gates Foundation mu by'ubwenge bw'ubukorano (AI), ndetse n'ahazaza h'ubuzima ku isi.

"Mu nama y;inteko rusange, Bill yavugiye mu mucyo, asubiza ibibazo byinshi mu buryo burambuye, kandi yemeye inshingano ku byo yakoze."

Gates yashinze iyi fondasiyo y'ubugiraneza hamwe n'umugore we icyo gihe, Melinda French Gates baje gutandukana muri 2021, nyuma y'imyaka 27 babana.

Mu kiganiro yagiranye na podcast ya NPR mu ntangiriro z'uku kwezi, yavuze ko kurekura amadosiye aheruka "byazanye ibihe bikomeye mu mubano wacu".

Yungeyeho ati: "Ndishimye cyane kuba kure y'uyu mwanda wose,". "Ibibazo byose bishobora kuba bihari, sinshobora no guhita mbimenya byose. Ni ibyabo, kandi ni bo bagomba kubisubiza, si jyewe."

Itangazamakuru rya Amerika ryatangaje ko mbere y'uko batandukana, Melinda yari yarababajwe n'imibanire y'umugabo we na Epstein. Nyuma y'itangazo ry'uko batandukanye, Bill Gates yemeye ko yagize umubano wihariye, n'umukozi wa Microsoft mu 2019.

Mu magambo ye, kuri uyu wa Kabiri, Gates yabwiye abakozi be ko yahuye n'abo bagore babiri avuga ko yagiranye umubano na bo binyuze mu mibanire ye n'ibikorwa by'ubucuruzi.

Ibi bije bikurikira ibyo yagaragaje mu butumwa bwo kuri email bwa Epstein bwo mu Kwakira 2013, kandi bikaba biri mu nyandiko zasohotse mu Kuboza (12), bivuga ko Gates yanduye indwara yandurira mu mibonano mpuzabitsina kandi yageragezaga kubihisha umugore we icyo gihe.

Umuvugizi wa Gates mbere yavuze ko iyo nkuru ari "ibinyoma burundu kandi bidafite ishingiro."

Gates mu kiganiro yagiranye n'ikinyamakuru cyo muri Australiya 9News mu kwezi kwa Gashyantare, yavuze ko guhura kwe na Epstein byari ku meza y'ibirori gusa kandi akaba yicuza igihe cyose bamaranye kuko yemera ko guhura na we ari rimwe mu makosa akomeye yakoze. Ati: "Ndasaba imbabazi kuba narabikoze,".

Mu itangazo ryasohotse mbere risubiza ku nyandiko nshya za Epstein, Umuryango wa Gates wavuze ko " hari bake mu bakozi babo bahuye" n'uyu mutunzi witabye Imana ku buryo yavugaga ko ashobora "gutera inkunga nyinshi ibikorwa by'ubugiraneza."

"Byarangiye umuryango udakomeje gukorana na Epstein kandi nta faranga na rimwe yigeze awuha.