Cuba: Miguel Díaz-Canel yagizwe umukuru w'ishyaka wa mbere utari ba Castro

Inyandiko gusa
Miguel Díaz-Canel and Raúl Castro

Ahavuye isanamu, Getty Images

Insiguro y'isanamu, Miguel Díaz-Canel (ibumoso) agiye kuba umunyamabanga wa mbere w'akanama gakuru k'ishyaka rya gikomunisiti, asimbuye Raúl Castro (iburyo)

Ishyaka rya gikomunisiti ryo muri Cuba ryatangaje ko Miguel Díaz-Canel ari we usimbuye Raúl Castro nk'umunyamabanga wa mbere w'ishyaka.

Bwana Díaz-Canel - mu 2018 wasimbuye Bwana Castro nka Perezida wa Cuba - hari hashize igihe ahabwa amahirwe yo kwegukana uwo mwanya uvugwa ko ari wo ukomeye kurushaho w'ubuyobozi bw'ishyaka.

Iyi mpinduka ivuze ko bwa mbere kuva habaha impinduramatwara ya Cuba yo mu 1959, iki kirwa kizategekwa n'undi muntu utari Fidel cyangwa Raúl Castro.

Bwana Díaz-Canel abonwa nk'ukurikiza ibya ba Castro na politike y'ubukungu yabo.

Ku wa gatanu, mbere yuko Bwana Díaz-Canel atangazwa ku mugaragaro nk'umunyamabanga wa mbere, Raúl Castro yavuze ko azasigira ubutegetsi abakiri bato kurushaho "buzuye umuhate no kurwanya ba mpatsibihugu".

Ku myaka 61, Bwana Díaz-Canel arushwa imyaka hafi 30 n'uwo asimbuye.

Bikurikiye ibyatangajwe ku wa gatanu - ku munsi wa mbere w'inama nkuru y'ishyaka y'iminsi ine - ko Raúl Castro avuye ku mwanya ukomeye w'umunyamabanga wa mbere w'ishyaka.

Raúl Castro w'imyaka 89, yari ari kuri uwo mwanya kuva mu 2011, ubwo yawusimburagaho mukuru we Fidel Castro.

Skip Ibisomwa cane and continue reading
Ibisomwa cane

End of Ibisomwa cane

Hagati yabo, abo bavandimwe babiri bategetse Cuba kuva haba impinduramatwara yo mu 1959 yahiritse ubutegetsi bw'igitugu bwa Jenerali Fulgencio Batista.

Insiguro ya video, Abanya Cuba babariwa mu bihumbi basezera bwa nyuma kuri Castro

Fidel Castro yategetse Cuba kuva mu 1959. Yarwaye mu 2006, nyuma y'imyaka ibiri ashyikiriza ku mugaragaro ubutegetsi umuvandimwe we.

Fidel Castro yapfuye mu 2016, ariko umuvandimwe we Raúl yakomeje gutuma ishyaka rya gikomunisiti rigumana ubutegetsi bw'iki kirwa.

Miguel Díaz-Canel ni nde?

Nubwo Miguel Díaz-Canel yavutse nyuma y'impinduramatwara ya Cuba, abonwa nk'umwe mu bayishyigikiye kuri ubu mu buryo bukomeye cyane, akabonwa kandi nk'inshuti ya hafi ya ba Castro.

Former Cuban President Raul Castro (L) and Cuban President Miguel Diaz-Canel (R) participate in a torch march to celebrate Cuban National Hero Jose Marti in Havana, on January 27, 2020.

Ahavuye isanamu, AFP

Insiguro y'isanamu, Mu ijambo yavuze ku wa gatanu, Raúl Castro (ibumoso) yavuze ko "ikiganiro kirimo kubahana" hagati ya Cuba n'Amerika gishoboka

Yatangiye politike ari mu ntangiriro y'imyaka 20, nk'umwe mu bagize ihuriro ry'urubyiruko rwa gikomunisiti i Santa Clara, umujyi urimo imva ya Che Guevara, warwanye hamwe na ba Castro mu mpinduramatwara ya Cuba.

Yagiye azamuka mu ntera, mu 2009 aba Minisitiri w'amashuri makuru na za kaminuza.

Mu 2013, yabaye Visi Perezida w'akanama gakomeye ka leta. Imyaka itanu nyuma yaho, mu 2018, yatowe n'inteko ishingamategeko nka Perezida wa Cuba ku majwi 99.83%, mu gikorwa cyayobowe cyose n'ishyaka rya gikomunisiti riri ku butegetsi.