Rwanda: Hatangajwe impinduka mu bategetsi no mu kwirinda Covid-19

Jean Marie Vianney Gatabazi wari Guverineri w'intara y'amajyaruguru yagizwe Minisitiri w'ubutegetsi bw'igihugu, Gasana Emmanuel agirwa Guverineri w'intara y'iburasirazuba, nk'uko biri mu itangazo rya minisitiri w'intebe.

Mu mpinduka zatangajwe mu butegetsi, Prof Shyaka Anastase wari Minisitiri w'ubutegetsi bw'igihugu kuva mu 2018 yasimbujwe Bwana Gatabazi, nawe umwanya yariho uhabwa Dancille Nyirarugero.

Umwaka ushize, Gatabazi na Gasana, usanzwe ari umupolisi w'ipeti rya Commissioner General of Police (CGP), ubwo bakurwaga ku mirimo leta yavuze ko "hari ibyo bakurikiranyweho".

Nyuma gato, Gatabazi yanditse kuri Twitter asaba imbabazi Perezida wa Repubulika n'ishyaka riri ku butegetsi ahita asubizwa mu mirimo ye, Gasana wamaze imyaka icyenda akuriye igipolisi ntiyongeye kugarukwaho.

Mu ijoro ryo ku wa mbere, Gatabazi yanditse kuri Twitter ashimira Perezida Kagame kumugirira "icyizere kigeretse ku kindi".

Kuri abo bategetsi bombi nta makuru yatangajwe ku byo bakurikiranwagaho.

BBC ntibazwa ibivuye ku zindi mbuga.

Zimwe mu zindi mpinduka zatangajwe;

Béata Habyarimana yagizwe Minisitiri w'ubucuruzi asimbuye Soraya Hakuziyaremye wagizwe uwungirije umukuru wa Banki nkuru y'u Rwanda.

François Habitegeko wari ukuriye akarere ka Nyaruguru mu majyepfo kuva mu 2011, yagizwe Guverineri w'intara y'iburengerazuba, asimbuye Alphonse Munyantwari wari kuri uwo mwanya kuva mu 2016.

Mu bindi byemezo byatangajwe na minisitiri w'intebe harimo guhindura amasaha y'umukwabu wo kwirinda coronavirus, akava saa moya z'ijoro akaba saa tatu, no gufunga ubucuruzi saa mbiri z'ijoro.

Ingendo hagati y'umujyi wa Kigali n'utundi turere nazo zafunguwe, uretse ku turere twa Bugesera, Gisagara na Nyanza.