Papa Francis yamaganye ubuhezanguni mu ruzinduko rw'amateka muri Iraq

Papa Francis yamaganye ubuhezanguni bukorwa mu izina ry'idini, mu ruzinduko rwanditse amateka arimo muri Iraq aho yavuze ku kibazo cya ba nyamucye b'abakristu.

Mu isengesho rihuriwemo n'abakuru b'amadini, yagize ati: "Ubushyamirane, ubuhezanguni n'urugomo ntabwo bivuka mu mutima usenga".

"[Ibyo] Ni ibigambanira iyobokamana".

Iraq imaze igihe ishegeshwa n'urugomo rushingiye ku myemerere y'idini, rwibasira ba nyamucye, ndetse no hagati y'abayisilamu b'aba Shia n'aba Sunni.

Papa Francis yanasuye Grand Ayatollah Ali al-Sistani, umwe mu bakuru bakomeye cyane ba Shia Islam.

Uru ni rwo ruzinduko rwa mbere Papa Francis akoreye mu mahanga kuva iki cyorezo cya coronavirus cyatangira mu mwaka urenga umwe ushize - rukaba ari narwo ruzinduko rwa mbere na mbere Papa akoreye muri Iraq.

Covid-19 n'ubwoba bw'umutekano mucye byatumye uru ruba uruzinduko rwe rwa mbere kugeza ubu rurimo kwiharahaza.

Uyu mukuru wa Kiliziya Gatolika ku isi w'imyaka 84, mbere yabwiye abanyamakuru ko yumvaga "afite inshingano" yo gukora uru rugendo "rufite icyo ruvuze kinini", azasuramo ahantu henshi muri Iraq mu gihe cy'iminsi ine.

Ni iki kindi Papa Francis yavuze?

Yatanze ubutumwa bwe ari ahahoze umujyi wa kera wa Ur, ufatwa nk'ahantu h'amavuko h'Umuhanuzi Abraham, wubahwa mu madini ya Judaism, aya gikristu no muri Islam.

Isengesho rya rusange ryahuje abahagarariye amadini yo muri Iraq, arimo aba Shia, aba Sunni, abakristu n'abakuriye idini rya Yazidi.

Papa Francis yagize ati: "Twebwe abemera ntidushobora guceceka igihe iterabwoba ryandavuje idini".

"Ni koko, duhamagarirwa byeruye gukuraho ukutumvikana kose. Mureke ntitwemere ko urumuri rw'ijuru rupfukiranwa n'ibicu by'urwango".

Yavuze by'umwihariko ku baturage b'aba Yazidi, "bakoze ikiriyo cy'impfu z'abagabo benshi bakanabona abagore babarirwa mu bihumbi, abakobwa n'abana bashimutwa, bakagurishwa nk'abacakara, bagakorerwa urugomo ku mubiri kandi bagahindurirwa idini ku gahato".

Kuki kujya gusura Ayatollah byari ingenzi cyane?

Grand Ayatollah Ali al-Sistani akuriye abayisilamu b'aba Shia babarirwa muri za miliyoni, bakaba ari bo benshi cyane muri Iraq.

Kwakira abantu k'uyu Ayatollah w'imyaka 90 ukunze kuba yitaruye abantu bibaho by'imbonekarimwe, ariko yakiriye Papa mu gihe cy'iminota igera muri 50, baganira batambaye udupfukamunwa.

Uyu Ayatollah yakiriye umushyitsi we mu rugo rwe ruri mu mujyi nyobokamana wa Najaf.

Ba nyamucye b'abakristu bo muri Iraq bamaze igihe bibasirwa n'inkubiri z'ibikorwa by'urugomo, kuva mu mwaka wa 2003 ubwo ingabo z'amahanga ziyobowe n'Amerika zagabaga ibitero muri Iraq.

Grand Ayatollah Sistani "yemeje uguhangayika kwe ko abaturage b'abakristu bakwiye kubaho nk'abandi Banya-Iraq bose mu mahoro no mu mutekano, kandi hubahirizwa uburenganzira bwabo bwose buteganywa n'itegekonshinga".

Papa Francis yashimiye uyu Ayatollah ku kuba "yazamuye ijwi rye ashyigikira abanyantege nkeya cyane kurusha abandi n'abatotejwe cyane kurusha abandi" muri bimwe mu bihe byabayemo urugomo rwinshi cyane byo mu mateka ya vuba aha ya Iraq, nkuko bitangazwa n'ibiro ntaramakuru Associated Press.

Yavuze ko ubutumwa bw'amahoro bw'uwo mukuru w'aba Shia bwashimangiye "ukutavogerwa k'ubuzima bw'umuntu n'akamaro k'ubumwe bw'abaturage ba Iraq".

Abashinzwe umutekano ba Iraq bagera hafi ku 10,000 bagabwe ngo bacungire umutekano Papa Francis muri uru ruzinduko rwe, mu gihe n'amasaha y'umukwabu yashyizweho mu kugabanya ikwirakwira ry'ubwandu bwa coronavirus.

Amakuru avuga ko imitwe imwe y'intagondwa zo mu ba Shia idashyigikiye urwo ruzinduko, ibona ko ari nko kwivanga kw'ibihugu by'i Burayi n'Amerika mu bijyanye n'ubuzima bw'igihugu cya Iraq.