EU yasubitse inkunga igenewe Ethiopia kubera imirwano muri Tigray

Umuryango w'Ubumwe bw'Uburayi wasubitse hafi miliyoni 90 z'ama-euro y'inkunga yo mu ngengo y'imari ya Ethiopia kubera impungenge ku bibera muri leta ya Tigray.

Ayo arenga miliyari 108 uyabaze mu mafaranga y'u Rwanda.

Ana Pisonero-Hernandez, umuvugizi w'akanama k'Uburayi, yavuze ko iyo nkunga ku ngengo y'imari ya Ethiopia izatangwa ari uko iki gihugu cyemeye ko imiryango itanga imfashanyo iyigeza muri Tigray.

Mu butumwa yoherereje BBC, EU ivuga ko mu bindi isaba leta ya Ethiopia harimo ko abaturage b'abasivile bagomba kwemererwa guhungira mu bihugu bituranye na Ethiopia kandi ko ingamba zo kwibasira abantu kubera ubwoko bwabo ndetse n'amagambo y'urwango bigomba guhagarara.

EU yongeraho ko hagomba gushyirwaho uburyo bwo gukora iperereza ku birego by'ihonyorwa ry'uburenganzira bwa muntu.

Inasaba ko imirongo y'itumanaho ikwiye gusubizwaho byuzuye muri Tigray, n'abanyamakuru bakemererwa kuhagera.

Ariko, EU ivuga ko iki cyemezo cyo gusubika inkunga kitareba ibikorwa by'imfashanyo by'uyu muryango bisanzwe birimo gukorwa muri Ethiopia cyangwa ibindi bikorwa by'iterambere, ngo byo bizakomeza uko bisanzwe.

Ntacyo leta ya Ethiopia yari yatangaza ku mugaragaro kuri iki cyemezo cya EU.

Kuva ku itariki ya 4 y'ukwezi kwa 11, ingabo za leta ya Ethiopia zirwana n'abarwanyi b'ishyaka Tigray People's Liberation Front (TPLF) ryari risanzwe riri ku butegetsi muri Tigray.

Abantu babarirwa mu magana, bishoboka ko baba banabarirwa mu bihumbi, byibazwa ko biciwe muri iyo mirwano, mu gihe abagera hafi ku 50,000 bahungiye muri Sudan baturanye.