Centrafrique: Eric Danboy Bagale warindaga François Bozizé araregwa ibyaha byo mu ntambara

Polisi y'Ubufaransa yataye muri yombi umwe mu bahoze barinda uwahoze ari perezida wa Centrafrique, imushinja ibyaha byo mu ntambara n'ibyaha byibasira inyoko-muntu.

Eric Danboy Bagale yajyanwe mu murwa mukuru Paris nyuma yuko ku wa kabiri atawe muri yombi mu burasirazuba bw'Ubufaransa, nkuko bitangazwa n'ibiro ntaramakuru AFP.

Ashinjwa kuyobora umutwe w'intagondwa wa Anti-Balaka wiganjemo abavuga ko ari abakristu, ucyekwaho gukora ubwicanyi bwo kwihorera nyuma y'ihirikwa rya Perezida François Bozizé mu mwaka wa 2013.

Abantu babarirwa mu bihumbi biciwe mu bikorwa by'urugomo byakurikiyeho.

Kuva Centrafrique - yakolonijwe n'Ubufaransa - yabona ubwigenge mu mwaka wa 1960, yakomeje kurangwamo ibibazo by'umutekano mucye.

Ariko mu mwaka wa 2013, inyeshyamba z'abo mu idini ya isilamu zo mu mutwe wa Seleka zafashe ubutegetsi muri iki gihugu cyiganjemo abo mu madini ya gikristu.

Bwana Bagale aregwa ibyaha byo mu gihe yari akuriye itsinda ry'abarindaga uwari Perezida François Bozizé, ndetse n'ibyo aregwa nyuma ubwo yari akuriye umutwe wa Anti-Balaka, nkuko bitangazwa na AFP.

Uwo wahoze ari perezida na we ubwe yafatiwe ibihano n'umuryango w'abibumbye (ONU/UN) kubera ibikorwa by'intagondwa za Anti-Balaka.

Mu mwaka ushize wa 2019, leta n'imitwe 14 yitwaje intwaro bashyize umukono ku masezerano y'amahoro, ariko ibikorwa by'urugomo birakomeje.

Abantu barenga miliyoni imwe bataye ingo zabo cyangwa biba ngombwa ko bahunga bava muri Centrafrique, nkuko ishami rya ONU ryita ku mpunzi ribivuga.