Coronavirus - Rwanda: Abandura bari kugabanuka, abapfuye biyongereye
Ahavuye isanamu, umuyoboro.rw
Coronavirus yishe umuntu wa munani mu Rwanda, ni uwa gatatu upfuye mu minsi itandatu ishize azize iyi ndwara abantu barenga 2,100 bamaze kwandura mu gihugu.
Uyu wapfuye minisiteri y'ubuzima ivuga ko yari umugabo w'imyaka 37.
Ni uwa kabiri ukiri muto mu bagabo batanu b'imyaka 37,51,78, 51 na 65 n'abagore batatu b'imyaka 77,88 na 24 imaze kwica bose hamwe mu Rwanda.
Umwirondoro w'abapfuye watangajwe na ministeri y'ubuzima ni abapolisi babiri bari bavanywe mu butumwa bw'amahoro, n'umushoferi w'amakamyo, ari nawe muntu yishe bwa mbere mu Rwanda.
Imibare y'abandura coronavirus mu Rwanda yagabanutseho kimwe cya kabiri mu byumweru bibiri bishize ugereranyije n'ibyabanje.
Mu minsi 14 ishize minisiteri y'ubuzima igaragaza ko handuye abantu 222, mu gihe mu minsi 14 yari yabanje hari handuye abantu 528.
U Rwanda ruvuga ko rumaze gusuzuma ibipimo 314,539, abo basanzemo iyi ndwara bose hamwe bakaba kugeza ubu ari 2,189.
Ku wa mbere, nyuma y'uko hapfuye abantu babiri bikurikiranya, Ministiri w'ubuzima Dr Daniel Ngamije, yaburiye Abanyarwanda ko iki cyorezo kigihari "abantu badakwiye kwirara ku ngamba zafashwe zo kwirinda".
Minisiteri y'ubuzima ivuga ko mu bamaze kwicwa n'iyi ndwara umwe yapfiriye i Nyamasheke, abandi i Kigali.
