Kenya: Inkangu yahitanye abantu 29 nyuma y'imvura nyinshi
Ahavuye isanamu, EPA
Abantu bagera kuri 29 ni bo bamaze gutangazwa ko bapfuye kubera inkangu yatewe n'imvura nyinshi yaguye mu karere ka West Pokot mu burengerazuba bwa Kenya.
Ku munsi w'ejo ku wa gatandatu, abategetsi babwiye ibitangazamakuru byo muri Kenya ko mu mirambo imaze kuboneka harimo n'iy'abana barindwi.
Amakuru avuga ko iyo mvura nyinshi yibasiye ibyaro bya Nyarkulian na Parua.
Perezida Uhuru Kenyatta yasohoye itangazo avuga ko "yihanganishije abikuye ku mutima" imiryango n'inshuti babuze ababo.
Bwana Kenyatta yongeyeho ko habayeho "isenyuka rikomeye" ry'imitungo n'ibikorwa remezo, ndetse avuga ko yategetse igisirikare n'inzego z'ubutabazi kujya muri ako karere gufasha.
Abategetsi bavuga ko imihanda yo muri ibyo byaro yarenzwe n'amazi kandi n'iteme rimwe ryatwawe.
Joel Bulal, umutegetsi wo mu nzego z'ibanze muri ako gace, yabwiye ikinyamakuru Daily Nation cyo muri Kenya ko ibikorwa by'ubutabazi bikomeje mu kugerageza gushakisha abantu baburiwe irengero.
Apollo Okello, umuyobozi w'ako karere, yavuze ko abandi bashobora kuba barenzweho muri iyo nkangu, ariko avuga ko ibikorwa by'ubutabazi biri gukomwa mu nkokora n'ikirere kimeze nabi.
Urubuga rwa internet rw'ikinyamakuru The Standard - nacyo cyo muri Kenya - rusubiramo amagambo ye agira ati: "Turikugerageza kugera aho iteme ryatwariwe n'imyuzure, imvura iracyagwa".
Amafoto yo ku mbuga nkoranyambaga agaragaza ibiti, icyondo n'imyanda binyanyagiye mu mihanda.
Mu butumwa bwo kuri Twitter, umuryango utabara imbabare wa Croix-Rouge - ishami rikorera muri Kenya - wemeje ko wambariye gutabara nyuma y'amakuru avuga ku nkangu "ikomeye".
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Ikigo cya Kenya cy'iteganyagihe cyari cyatanze itangazo ku itariki ya 18 y'uku kwezi kwa cumi na kumwe kiburira abatuye "ahakunze kwibasirwa n'inkangu" ko hazagwa imvura nyinshi.
Mu byumweru bicye bishize, ibihugu byo mu burasirazuba bw'Afurika byaguyemo imvura nyinshi.
Inkangu n'imyuzure byishe abantu muri Ethiopia na Tanzania, mu gihe abantu babarirwa mu bihumbi amagana bataye izabo muri Somalia kubera imvura nyinshi.
