Uganda iramagana 'imbaraga z'umurengera' z'u Rwanda ku baturage bayo b'abasivile

Leta ya Uganda yandikiye leta y'u Rwanda ku "mpungenge zikomeye" ivuga ko itewe n'iyicwa rya bamwe mu baturage bayo ryabereye ku butaka bw'u Rwanda.

Bikubiye mu ibaruwa yo ku munsi w'ejo ku wa kabiri yashyikirijwe ambasaderi w'u Rwanda muri Uganda, Jenerali Majoro Frank Mugambage.

Ubutegetsi bwa Uganda buvuga ko bwamaganye ibyo bikorwa by'iraswa ry'abaturage b'icyo gihugu bikozwe n'inzego z'umutekano z'u Rwanda.

Uruhande rw'u Rwanda rwatangaje ko abarashwe barimo bakora ubucuruzi bwa magendu baca ku mipaka itemewe kandi ari nijoro.

Leta ya Uganda ivuga ko abaturage ba Uganda babiri bishwe barashwe n'abashinzwe umutekano b'u Rwanda i Tabagwe, ku gace k'umupaka ka Kamwezi.

Itangazo rigenewe abanyamakuru rya leta ya Uganda rivuga ko abishwe ari Job Byarushanga na Bosco Tuhirirwe.

'Imbaraga z'umurengera'

Uganda ivuga ko yamaganye "mu magambo akomeye ashoboka" iyicwa ry'abaturage bayo bishwe n'inzego z'umutekano z'u Rwanda zibashinja gukora ubucuruzi bwa magendu ku mupaka usangiwe".

Iri tangazo rigira riti: "Icyo cyaha bacyekwaho ntabwo gishobora gusobanura ikoreshwa ry'imbaraga z'umurengera, [biriya] ni icyaha cy'abashinzwe umutekano b'u Rwanda ku basivile badafite intwaro ku mupaka duhuriyeho".

Komiseri wa Polisi Jean Bosco Kabera umuvugizi wa polisi y'u Rwanda kuwa mbere yabwiye abanyamakuru i Kigali ku iyicwa ry'aba baturage ba Uganda.

Yagize ati: "Kugenda nijoro ukanyura ahantu hatemewe ugashaka kurwanya inzego z'umutekano icyo gihe izo nzego ziritabara mu buryo bushoboka bwose".

Leta ya Uganda ivuga ko ibyo bibangamiye ibikorwa bikomeje byo kugerageza kuzahura umubano hagati y'ibihugu byombi.

Uganda isaba ko hakorwa iperereza rihuriweho kuri ubwo bwicanyi, ababikoze bakabiryozwa.

Itangazo rya leta ya Uganda, ryashyizweho umukono na Ofwono Opondo, umuvugizi wa leta, rinavuga ku Munyarwanda Peter Havugimana.

Bwana Havugimana ku itariki ya 4 y'uku kwezi yarashwe n'abashinzwe umutekano b'u Rwanda arakomereka nk'uko abategetsi ku ruhande rwa Uganda babibwiye BBC.

Uganda ivuga ko Havugimana w'imyaka 28 wo mu cyaro cya Kabaya yarashwe mu rutugu ahagana saa moya n'igice z'ijoro, agahungira muri Uganda aho yari avanye ibirayi atashye mu Rwanda.

Uganda ivuga ko nubwo ari Umunyarwanda, iraswa rye rigaragaza "uburyo bukomeje bwo gukoresha imbaraga z'umurengera bw'inzego z'umutekano z'u Rwanda ku baturage basanzwe b'abasivile baturiye ku mupaka uhuriweho".

Leta ya Uganda ivuga ko yiteguye gusubiza Havugimana abategetsi bireba ba leta y'u Rwanda mu gihe nyir'ubwite aza ashatse gusubira mu Rwanda.

Komiseri wa Polisi Jean Bosco Kabera yavuze ko abarashwe ibyo bakoze "bitabujijwe abaturage ba Uganda gusa ahubwo n'abanyarwanda".