Abashingamateka ba Venezuela batavuga rumwe n’ubutegetsi bahungiye mu nyubakwa z’ubuserukizi

Abashingamateka batatu batavuga rumwe n'ubutegetsi bahungiye mu nyubakwa z'ubuserukizi bw'igihugu vyo hanze inyuma y'aho bakuriweko ubudahangarwa buhabwa abashingamateka.

Abo bari mu bashingamateka cumi bakuweko ubudahangarwa inyuma y'aho Sentare nkuru y'igihugu ca Venezuela itegekeye ko bogirwako amatohoza ku vyo bagirizwa vy'uguhungabanya inzego z'igihugu z'igihugu, ubugarariji hamwe n'uguhemukira igihugu.

Mu ndwi iheze, abatavuga rumwe n'ubutegetsi muri ico gihugu barongowe na Juan Guaidó baragerageje gutembazaga ubutegetsi bihetse ku karwi k'abasirikare.

Ku munsi wa gatatu, icegera ca Bwana Guaidó, Edgar Zambrano, yarahagaritswe n'inzego zijejwe igendereza, akaba agipfunzwe.

Américo de Grazia na Mariela Magallanes bahungiye bompi mu biro vy'ubuserukizi bw'Ubutaliyano, mu gihe mugenzi wabo, Richard Blanco, yahungiye mu biro vy'ubuserukizi bwa Argentine.

Ubushikiranganji bw'imigenderanire bw'Ubutaliyano bwaremeje ku munsi wa gatatu ko umupfasoni Magellanes asanzwe yubakanye n'Umutaliyano akaba mbere yari yarasavye n'ubwenegihugu, yashitse mu biro vy'ubuserukizi bw'ico gihugu, kandi ko "azokingirwa uko bishoboka kwose".

Uno munsi kuwa gatanu naho, abategetsi b'Ubutaliyano bemeje ko Bwana Grazia ari mu biro vy'ubuserukizi bwabo.

Ku ruhande rwiwe, Bwana Blanco yabwiye ikinyamakuru El Nacional co mu gihugu ca Venezuela ko yagiye nyubakwa y'ubuserukizi bwa Argentina inyuma y'aho Bwana Zambrano ahagarikiwe, akagiriza Perezida Maduro ko ariko "arabahohotera".

Hagati aho, igihugu ca Espanye ciyemeje ko kizokingira umutekano w'uwundi munyapolitike atavuga rumwe n'ubutegetsi, Leopoldo López, yahungiye mu nyubakwa y'ubuserukizi bw'ico gihugu ku mugwa mukuru Caracas, acitse abari baje kumufata mu nzu iwe.

Espanye yafashe iyo ngingo yirengangije amajambo yavuzwe n'umushikiranganji wa mbere mfatakibanza wa Venezuela, Josep Borrell, ati: "Espanye ntizokwemera ko ubuserukizi bwayo bucika ikigo c'abakora politike".

Hari abandi bashingamateka indwi nabo nyene bashobora guhagarikwa umwanya n'umwanya.

Inama nkuru y'igihugu (National Constituent Assembly (ANC)) - urwego rwashizweho n'umukuru w'igihugu kandi rugizwe n'abamushigikiye - rwaratse ubudahangarwa abo bashingamateka muri iyi ndwi, kw'itegeko bahawe na Sentare nkuru y'igihugu.

None ibintu bimeze gute muri Venezuela?

Bwana Guaidó yaritangaje ko ari we mukuru w'igihugu mfatakibanza yisunze ibwirizwashingiro, akagiriza Bwana Maduro yakoresheje amanyanga mu gutorerwa ikindi kiringi nk'umukuru w'igihugu mu matora yo mu mwaka uheze.

Kuva ico gihe, icuka kibi hagati y'abashigikiye Bwana Guaidó n'abashigikiye Bwana Maduro kigenda ciyongera. Igisirikare nico kibonwa ko ariyo nkingi y'ubutegetsi muri ico gihugu.

Kw'igenekerezo rya 30 z'ukwezi kwa kane, abicishije mw'ireresi yafashwe ari ku kigo ca gisirikare i Caracas, Bwana Guaidó yasavye igisirikare ko comufasha gutembagaza Perezida Maduro.

Bwana Zambrano ni umwe mu bashingamateka babonetse muri iyo reresi bariko baravugana hampande y'ikigo c'abasirikare barwanira mu kirere.

Mu gihe akarwi gatoya k'abasirikare bashigikiye Bwana Guaidó, abategetsi bakuru ba gisirikare baciye bihutira kumenyesha ko bashigikiye Perezida Maduro, ibintu bica bibandanya uko vyari bimeze.

Kuva ico gihe, Bwana Guaidó abwira BBC ko ashobora kuraba ingene yosaba Leta Zunze Ubumwe za Amerika ko zotegura kwinjira kumufasha gisirikare.