Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Mdude Nyagali unenga Perezida Magufuli wa Tanzaniya yashimuswe
Polisi yo mu gace ka Songwe mu magepfo ya Tanzaniya yatangaje ko itazi amakuru yo gufatwa kwa Mdude Nyagali, umurwanashyaka w'ishyaka Chadema ritavuga rumwe n'ubutegetsi bivugwa ko yashimuswe n'abantu bataramenyekana.
Bwana Nyagali azwi cyane kuko akunze kunenga ku mugaragaro bimwe mu byemezo bya politiki bya Perezida John Pombe Magufuli n'ishyaka rye Chama Cha Mapinduzi(CCM).
Ku mbuga nkoranyambaga, abantu banyuranye muri Tanzaniya no hanze yayo bari kwandika cyane bati '#BringBackMdudeAlive' basaba ko agarurwa iwe ari muzima.
Ishyaka abarizwamo Chama cha Demokrasia na Maendeleo (CHADEMA), ryatangaje ko ryifuza ko uyu murwanashyaka waryo agarurwa ari muzima.
CHADEMA ivuga ko Mdude Nyagali yafashwe n'abagabo bane bitwaje intwaro kuwa gatandatu nimugoroba avuye aho akorera. Kugeza ubu ntibazi aho aherereye.
Mu itangazo iri shyaka ryasohoye bagira bati "Turasaba inzego zose ndetse na polisi ishinzwe umutekano gukurikirana ishimutwa rya Mdude akaboneka ari muzima, kandi abakoze ibi bakamenyekana bakagezwa imbere y'amategeko".
George Kyando, umukuru wa polisi mu gace ka Songwe, yabwiye ikinyamakuru Mwanainchi ko bakiri gukurikirana, ariko ko nta makuru arambuye arabona ku ishimutwa rya Bwana Mdude.
Si bishya ku banenga Magufuli
Kuva mu mwaka wa 2015 Bwana Magufuli yatorerwa kuyobora Tanzaniya, hari abamunenga bagiye batotezwa, barafungwa abandi barishwe.
Mu bihe byashize, Bwana Nyagali yagiye aterwa ubwoba ku mbuga nkoranyambaga ko azagirirwa nabi, ibi kandi byabaye ku bandi batavuga neza Perezida Magufuli nka depite Tundu Lissu.
Ku itariki ya 11 z'ukwa kabiri 2018, umuyobozi mu ishyaka CHADEMA, Daniel John, yashimuswe n'abantu batamenyekanye aricwa umubiri we uboneka ku itariki 14 z'ukwa kabiri.
Ku itariki 7 z'ukwa cyenda 2017, Tundu Lissu, umudepite wo ku ruhande rutavuga rumwe n'ishyaka CCM riri ku bugegetsi, yarashwe n'abantu batamenyekanye ku bw'amahirwe isasu ntiryamuhitana.
Ku itariki 21 z'ukwa 11/2017 Azory Gwanda, umunyamakuru w'ikinyamakuru Mwanainchi, yaburiwe irengero kugeza n'ubu ntaraboneka.
Mu 2018, muri Tanzaniya abantu 21 barashimuswe, bakaba bari biganjemo abatavuga rumwe na leta, muri bo 17 babashije kuboneka nyuma ari bazima.
Muri iyi myaka ya vuba ishize, gushimuta abantu no kubagirira nabi byakunze kwigaragaza muri iki gihugu.
