Prezida Yowe Museveni aheruka gusubiza ibaruwa yandikiwe na mugenzi we Nkurunziza w'u Burundi

Perezida Museveni aravuga ko ibibazo Perezida Nkurunziza yamugejejeho nibabyemera azabiganiraho na bagenzi be mu nama yabo isanzwe izaba tariki ya 27 z'uku kwezi.

Ariko ku giti cye Museveni aravuga ko yemeranya na Perezida Nkurunziza ko ikibazo kiri hagati y'u Rwanda n'u Burundiu kigomba kuganirwaho ku nyungu z'abaturage n'ubuhahirane.

Ku kibazo cyo gushyikirana n'abashatse guhirika ubutegetsi bw'u Burundi, Perezida Museveni aravuga ko umuhuza atavuga ko byanze bikunze leta y'u Burundi igomba kwicarana nabo.

Ariko aravuga ko nanone kwicarana n'abo mwahanganye atari igitangaza.

Aratanga urugero kuri Uganda avuga ko abo yahangaye nabo ari inyeshyamba ubu basangiye ubutegetsi muri icyo gihugu.

Ati icyo nicyo cyatumye Uganda itengamara.

EAC ntishaka kwivanga

Aranahumuriza leta ya Nukurunziza avuga ko umuryango w'Afurika y'uburasirazuba udashaka kwivanga mu butegetsi bw'u Burundi.

Aravuga ko uwo muryango winjiye mu bibazo bw'icyo gihugu nyuma y'ukwezi kwa 10, 2015 mu gihugu hamaze kuvuka imidugararo yatewe no kutumvikana ku bihembwe by'umukuru w'igihugu.

Aramwibutsa ko ari nako byagenze ubwo hasinywaga amasezerano y'amahoro y'Arusha mu mwaka wa 2000.

Ati ayo masezerano yashyizweho umukono kubera igitutu cy'uwo muryango kuri leta ya Petero Buyoya n'ubwo abarwanyi ba CNDD batari batsinze intambara mu buryo budasubirwaho.

Ati uwo muryango washakaga demokarasi n'amahoro kuri bose.