Leta Zunze Ubumwe za Amerika zivuga ko Ubushinwa n'Uburusiya vyashize imbere imigambi yo kubohera Afrika mu madeni

Igihugu ca Leta Zunze Ubumwe za Amerika kivuga ko umugambi waco kuri Afrika ubu ugiye kuba uwo kurereka ibikorwa vy'Ubushinwa n'Uburusiya bigenda biriyongera muri uwo mugabane.

Ivyo vyashikirijwe n'umuhanuzi wa Amerika mu bijanye n'umutekano, John Bolton, aho yagirije ivyo bihugu vyombi kuba vyitwara nk'ibiri mu ruhigi muri Afrika.

Umugambi mushasha wa Amerika ku bijanye na Afrika uhagaze cane cane ku kurwanira kugira igihagararo ca mbere kw'isi.

Amerika ivuga ko gushora imitahe kwayo, ibikorwa vya gisirikare hamwe n'umutekano wayo bwite bigeramiwe n'ukwiyongera kw'inguvu z'Ubushinwa n'Uburusiya ku mugabe wa Afrika.

Nk'akarorero, muri Djibouti, Ubushinwa bwashinzeyo ikigo ca gisirikare hafi y'ica Amerika kandi bukaba butegekanya kuhashira ikivuko gikomeye.

Umuhanuzi wa Amerika mu vy'umutekano, John Bolton, yavuze ko imfashanyo ya Amerika ubu izokoreshwa mu guhangana n'abakeba.

Asaba kandi ko haba ibikorwa bifadika bizotanga inyishu zigaragara kandi vuba.

Imigambi izohahombera irimwo ibikorwa vyo guhagararira amahoro vy'ishirahamwe mpuzamakungu ONU, Amerika ivuga ko ata kamaro kagaragara bishikako.