Igihugu ca Amerika cavuze ko kigiye kugabanya abasirikare baco bari muri Afrika

Igihugu ca Leta Zunze ubumwe za Amerika catangaje ko kigiye kugabanya inteko zaco ziri muri Afrika ku bice 10% mu myaka mike iri imbere.

Muri kino gihe abasirikare 7200 ba Amerika nibo bari ku mugabane wa Afrika.

Itangazo ryavuye mu biro bikuru vya gisirikare, Pentagone, rivuga ko muri Afrika y'uburengero ahakorera intagondwa nyinshi z'aba Islamu, "ugufasha mu buhinga bwa gisirikare" bizosubirigwa no gutanga impanuro, gufasha, guhererekana amakuru y'iperereza".

Komanda Candice Tresch, umuvugizi wo muri Pentagone, yabwiye Reuters ko kugabanya abo basirikare bizotuma ata gusubira guhangana n'imigwi y'intagondwa mu bihugu vyinshi nka Somalia, Djibouti na Libya.

Umutegetsi wa Amerika atipfuje ko izina ryiwe rimenyekana yavuganye na Reuters, yavuze ko kugabanya izo nteko bizotangura mu myaka itatu, bigahera mu bihugu vya Kenya, Cameroun na Mali.

Abajijwe ko ukwo kugabanya inteko kwoba gukurikiranye n'igitero cagabwe mu gihugu ca Niger mu kwezi kwa cumi mu 2017 aho abasirikare bane ba Amerika bishwe, uwo mukozi wo mu rwego rwa gisirikare yavuze ko ivyabaye ico gihe ata ruhara vyagize mu gufata iyo ngingo, nkuko amakuru ava mw'iradiyo Ijwi rya Amerika avuga.

"Ibiganiro bijanye n'iyi ngingo vyatanguye gukogwa imbere y'ico gitero," niko uwo mukozi yavuze.

Umushikiranganji wo kwivuna abansi muri Amerika, James Mattis yipfuza kuziganya amahera yakoreshwa ku mugabane wa Afrika, mu ndyane zokwaduka muri kazoza hagati y'ico gihugu n'Uburusiya hamwe n'Ubushinwa, niko ibinyamakuru vya Amerika bivuga.