Interpol yinginze Ubushinwa ngo bukureho urujijo ku mukuru wayo Meng Hongwei waburiwe irengero

Ubuyobozi bwa polisi mpuzamahanga Interpol bwasabye leta y'Ubushinwa gukuraho urujijo ku mukuru wayo Meng Hongwei waburiwe irengero ubwo yari mu rugendo muri iki gihugu.

Interpol yavuze ko ihangayikishijwe n'imibereho y'umukuru wayo.

Umuryango we ntiwongeye kumenya amakuru ye kuva yava mu biro bye biri ku cyicaro gikuru cya Interpol mu mujyi wa Lyon mu Bufaransa. Hari ku itariki ya 25 y'ukwezi gushize kwa cyenda.

Ubushinwa ntacyo bwari bwatangaza ku mugaragaro.

Itangazo ryanyujijwe ku rubuga rwa interineti rwa Interpol risubiramo amagambo ya Jürgen Stock, umunyamabanga mukuru wa Interpol - ari na we uri kuyiyobora muri iki gihe - rigira riti:

"Interpol yasabye abategetsi b'Ubushinwa ibinyujije mu buryo bwemewe n'amategeko ibisobanuro ku mukuru wayo Meng Hongwei."

Ryongeyeho riti:

"Ubunyamabanga bukuru bwa Interpol butegereje n'amashyushyu menshi igisubizo cy'abategetsi b'Ubushinwa gikuraho urujijo ku mpungenge ku mibereho y'umukuru wayo."

Bwana Stock ni we urebye ugenzura ibikorwa bya buri munsi bya Interpol ihuriwemo n'ibihugu binyamuryango 192.

Akazi ka Bwana Meng ahanini kajyanye no kwitabira imihango n'inama zitandukanye.

Mbere yaho, Interpol yari yavuze ko ikibazo cy'ibura rya Bwana Meng ari icyo gukurikiranwa n'"inzego zibishinzwe mu bihugu byombi Ubufaransa n'Ubushinwa." Ubufaransa bwatangije iperereza.

Ikinyamakuru The South China Morning Post cyo muri Hong Kong cyasubiyemo amagambo y'umuntu uvuga ko Bwana Meng w'imyaka 64 y'amavuko, "yatwawe" ngo ahatwe ibibazo mu Bushinwa.

Iki kinyamakuru cyongeyeho ko bitazwi impamvu ari guhatwa ibibazo n'"abategetsi bashinzwe imyitwarire" cyangwa aho ibyo biri kubera.

Mu ntangiriro y'iki cyumweru, umukinnyikazi wa filime Fan Bingbing wari waburiwe irengero mu Bushinwa mu kwezi kwa karindwi uyu mwaka, yongeye kugaragara.

Yasabye imbabazi mu ruhame ndetse acibwa amande angana na miliyoni 129 z'amadolari y'Amerika kubera kudatanga imisoro n'ibindi byaha.

Mu nshingano za Interpol, ishobora gusohora impapuro zo guta muri yombi umuntu ushakishwa.

Ariko nta bubasha ifite bwo kohereza abapolisi mu bihugu ngo bate muri yombi abantu bashakishwa.