Unenga Perezida Mnangagwa wa Zimbabwe yatawe muri yombi

Inyandiko gusa
Muri Zimbabwe hakomeje urubanza rwashojwe n'abatavuga rumwe n'ubutegetsi ku ntsinzi ya Perezida Mnangagwa mu matora yabaye mu kwezi gushize kwa karindwi

Ahavuye isanamu, Getty Images

Insiguro y'isanamu, Muri Zimbabwe hakomeje urubanza rwashojwe n'abatavuga rumwe n'ubutegetsi ku ntsinzi ya Perezida Mnangagwa mu matora yabaye mu kwezi gushize kwa karindwi

Ishyirahamwe riharanira uburenganzira bwa muntu ryo muri Zimbabwe, ryatangaje ko umwe mu banenga Perezida Emmerson Mnangagwa w'iki gihugu yatawe muri yombi ashinjwa gutangaza ubutumwa ku rubuga nkoranyambaga rwa Facebook bwafashwe nk'ububangamiye perezida.

Iri shyirahamwe ry'abanyamategeko baharanira uburenganzira bwa muntu, ryatangaje ko polisi y'iki gihugu yataye muri yombi Munyaradzi Shoko, inamushinja ibikorwa by'urugomo kubera ko ivuga ko yitabiriye imyigaragambyo y'abatavuga rumwe n'ubutegetsi yabaye mu kwezi gushize kwa karindwi.

Igisirikare cyishe kirashe abantu batandatu muri iyo myigaragambyo.

Bwana Shoko ni umuyobozi w'ishyirahamwe ry'abana bafite ababyeyi barwaniye ubwigenge bwa Zimbabwe.

Iri shyirahamwe rikorana bya hafi na Grace Mugabe, umugore wa Robert Mugabe wahoze ari Perezida wa Zimbabwe agakurwa ku butegetsi mu mwaka ushize wa 2017 - ubutegetsi yari amazeho imyaka 37.

Polisi kandi ishinja Bwana Shoko kurwana, ikamushinja ko mu mwaka ushize ubwo yari muri hoteli yasagariye umunyamuryango w'ishyaka Zanu-PF riri ku butegetsi muri Zimbabwe.