Nigeria: Bareze Ubushinwa ngo buryozwe Covid-19, bwo bubyita “urwenya”

Ubushinwa bwavuze ko ikirego cy'abanyamategeko bo muri Nigeria ari nk' "urwenya", aba bari bareze iki gihugu basaba impozamarira kuko ariho coronavirus yavuye.

Abanyamategeko 11 bashinja Ubushinwa kunanirwa kumenyesha hakiri kare ishami ry'umuryango w'abibumbye ryita ku buzima,OMS/WHO, iby'iyi virus nshya ikiboneka.

Barasaba impozamarira za Miliyari $200 kubera "gupfusha abantu, kuzahaza ubukungu, ihungabana, kuburabuza imiryango, iyicarubozo ryo mu mutwe no guhungabanya ubuzima bwa buri munsi byabaye ku baturage ba Nigeria".

Ambasade y'Ubushinwa mu murwa mukuru wa Nigeria, Abuja, yavuze ko iki kirego nta shingiro gifite ku rwego rw'amategeko mpuzamahanga.

Yatangaje kuri Twitter igira iti: "Covid-19 yafashe isi yose itunguranye. Ubushinwa, kimwe n'ibindi bihugu byose, bwaribasiwe. Twatewe na virusi itazwi, twarwanye ku buzima bw'abantu tunarengera ubw'abatuye isi"

Iyi Ambasade ivuga ko Ubushinwa aribwo bwabwiye bwa mbere OMS iby'iyi virus, kandi bwahise buha amakuru ibindi bihugu, n'ibyo mu karere burimo.

Ivuga ko Ubushinwa aribwo bwa mbere bwatangarije isi ingamba zo kwirinda iki cyorezo.

Iyi ambasade isaba aba banyamategeko, bashaka kujyana leta y'Ubushinwa no mu rukiko mpuzamahanga rw'i La Haye, "kugira icyo bakora mu kumvikanisha abantu aho gukabiriza uko ibintu bimeze".

Iki kirego ntabwo kiraburanishwa n'urukiko rukuru rwa Nigeria rwaregewe.

Mu kwezi kwa kane, leta ya Missouri yo muri Amerika yareze leta y'Ubushinwa mu rukiko rwaho.

Iyi leta yareze ivuga ko Ubushinwa bugomba kuryozwa imbere y'amategeko ingaruka z'iki cyorezo bukanatanga impozamarira ku batuye leta ya Missouri.

Ikirego kitagize icyo kigeraho kugeza ubu.