Cardiau Nadolig - traddodiad pwysig neu wastraff arian?

Oes llai o gardiau Nadolig yn cael eu hanfon y dyddiau hyn?

Mae'n gwestiwn sy'n codi yn aml yr adeg hon o'r flwyddyn wrth i arferion cymdeithas newid.

Yn ogystal â'r newidiadau yn y modd y mae pobl yn cysylltu â'i gilydd, mae'r effaith amgylcheddol yn ffactor i rai tra bod eraill yn gweld pwysigrwydd mewn cadw'r hen arferion yn fyw.

Aeth Cymru Fyw i holi rhai cyfranwyr sydd ar ein rhestr cardiau Nadolig ni er mwyn cael syniad o'r farn am yr hen arfer y dyddiau hyn.

Un sydd wedi stopio gyrru cardiau Nadolig yn gyfan gwbl er blynyddoedd ydy Margaret Roberts, sy'n dod "o Frynrefail i Bentraeth", ond wedi'i geni ym Môn.

Cost y stampiau sy'n bennaf gyfrifol am hynny, meddai Margaret.

"Er mod i eisiau cefnogi elusen, y postio 'di'r broblem, mae o lot rhy ddrud.

"Mi odda' ni'n arfer rhoi ambell i gerdyn i fodryb neu ddwy oedd ddim ar Facebook a ballu ac mae'r wyrion a wyresau yn licio g'neud nhw, ond ma'r stampia'n costio gormod."

Eglurodd Margaret ei bod hi'n well ganddi i'w harian fynd tuag at elusen leol.

"Dwi'n rhoi rhodd i Bwyd Da Môn 'leni a dwi 'di rhoi i Ambiwlans Awyr Cymru 'fyd. Ma' 'na ryw bum, chwe blynedd ers i mi stopio anfon cardiau."

Ychwanegodd ei bod yn hoffi'r "syniad neis" o roi cardiau allan i ffrindiau a theulu, ond bod dymuno Nadolig Llawen ar y cyfryngau cymdeithasol yn haws hefyd.

"Falla fod o'n syniad sy' 'di mynd 'chydig yn hen ffasiwn - ti'n gallu ffonio, g'neud Facetime neu be' bynnag erbyn heddiw.

"Dyma betha' doeddan nhw methu g'neud s'talwm. 'Falla bod llai o bobl ifanc yn eu hanfon nhw o bosib? Ma' well gen i roi'r arian at achos da ynde," meddai.

Mae Jo Knell yn byw yng Nghaerdydd ers blynyddoedd ac mae hi'n berchennog ar y busnes annibynnol, Cant a mil - sy'n gwerthu llyfrau Cymraeg yn bennaf.

Ond, maen nhw'n gwerthu cardiau Nadolig yn y siop hefyd a dywedodd Jo fod gwerthiant "wedi bod yn arbennig o dda eleni".

"O beth 'de ni'n weld, ma' llawer o bobl yn anfon nhw. 'De ni'n gwerthu cardiau Cymraeg a di-iaith yn unig, felly ma' pobl yn dod yma'n unswydd."

Wedi sefydlu ers 2014, esboniodd Jo fod cardiau Nadolig wastad wedi gwerthu'n dda yn y siop a hynny ers y cychwyn cyntaf.

"Dwi wedi paratoi iddyn nhw fynd yn llai poblogaidd dros y blynyddoedd ond dydy hynny just heb ddigwydd i ni.

"Ma' rhedeg allan ohonyn nhw yn fwy o broblem!"

"Dwi'n meddwl bod pobl yn canolbwyntio ar y rhai sy'n arbennig iddyn nhw y dyddiau yma, efallai, felly 'de ni'n anelu ein cardiau at y bobl hynny," ychwanegodd Jo.

"Siŵr o fod bo' pobl ifanc wyrach yn prynu llai, ond hyd yn oed o ran nhw - dwi'n gweld nhw'n prynu i deulu, ffrindiau neu gariadon efallai.

"Dwi'n falch o ddweud fod pobl o bob oed yn prynu yma."

Dywedodd Jo fod anfon cerdyn yn rhywbeth mwy personol na anfon neges yn ei barn hi.

"Ma' pobl hefo amser i 'sgwennu be' maen nhw eisiau, dwi'n gweld pobl yn cymryd eu hamser a chymryd gofal i bigo'r cardiau ma' nhw eisiau.

"Mae hi wedi bod yn flwyddyn dda iawn i ni eleni, 'de ni wedi bod yn lwcus iawn."

Catrin Hallet ydy Pennaeth Marchnata a Chyfathrebu Tenovus - yr elusen gofal canser Cymreig - ac maen nhw'n gwerthu cardiau Nadolig pob blwyddyn.

Esboniodd fod eu ffigyrau dros y blynyddoedd diwethaf yn gadarnhaol yn gyffredinol, gyda gwerthiant cardiau i'w weld ar gynnydd.

"Blwyddyn yma ni wedi gwerthu dros 22,000 yn barod, so ni'n gobeithio gwerthu mas erbyn diwedd y mis!

"Ni bach ymlaen o flwyddyn diwetha', 20,000 oedd ffigwr y llynedd, felly ni ar y trywydd i werthu mwy 'leni ac mae mwy o stoc 'da ni tro 'ma fyd."

Doedd Catrin ddim yn siŵr pam fod y gwerthiant cymaint yn well eleni na'r llynedd, ond pwysleisiodd fod gwerthu'r cardiau ar y we yn sicr wedi helpu.

"Mae'r siop ar-lein dal yn eitha' newydd ac mae gwerthiant ar-lein dros 100% yn fwy na'r llynedd, felly mae wedi tyfu lot ac mae gwerthiant y siopau wedi tyfu hefyd.

"Mae'r ffaith bod y cardiau mewn amrywiaeth o ieithoedd wedi helpu 'fyd fi'n credu," meddai.

Cynhyrchu incwm i'r elusen ydy prif nod gwerthu'r cardiau ac mae'r incwm hwnnw'n parhau i fod yn bwysig iawn, yn ôl Catrin.

Ond nid dyma'r unig reswm bod y cardiau yn help, gan fod "codi ymwybyddiaeth a brand exposure" hefyd yn elfennau i'w hystyried.

"Mae'n ffordd dda o gefnogi elusen, mae'n codi proffil yr elusen, rhan really pwysig o be' ni'n neud 'ma."

Ychwanegodd Catrin fod y cardiau yn "100% recyclable y flwyddyn yma - dim gliter a phethau fel 'na."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.