Beth yw'r Gymdeithas Rieni ac Athrawon?

Efallai nad yw'n apelio at bawb, ond mae'r Gymdeithas Rieni ac Athrawon mewn gwirionedd yn rhan hollbwysig o system gefnogi ysgolion. Mae Cymdeithasau Rhieni ac Athrawon yn trefnu gweithgareddau i godi arian i'r ysgol, yn cefnogi'r plant ac yn rhoi cyfle i bawb sy'n gysylltiedig â'r ysgol gyfarfod yn gymdeithasol.

Y dyddiau hyn, pan nad yw ysgolion yn cael cymaint o arian, defnyddir arian a godir drwy weithgareddau'r Gymdeithas i brynu adnoddau mawr eu hangen fel cyfrifiaduron neu offer chwaraeon, neu i dalu rhywfaint o gostau ymweliadau addysgol i'r plant. Mae gweithgareddau'r Gymdeithas yn gyfle da i gael hwyl a chyfarfod rhieni eraill, yr athrawon a phobl sy'n gysylltiedig â'r ysgol.

Pwyllgor Rhieni ac Athrawon
Dyma'r rhieni sy'n rhoi eu hamser i drefnu'r gweithgareddau. Maent yn chwilio am wirfoddolwyr a syniadau newydd drwy'r adeg!

Syniadau er mwyn codi arian
Dyma rai o'r syniadau mwyaf poblogaidd a phroffidiol:

• Ffeiriau - mae'r rhain yn gallu bod yn broffidiol iawn, ond mae llawer o waith trefnu i'w wneud ac mae angen llawer o wirfoddolwyr i helpu. Digwyddiadau tymhorol ydynt fel arfer, sy'n cael eu cynnal adeg y Nadolig neu yn ystod yr haf. Gallant fod yn weddol fach, ac yn gyfyngedig i ddisgyblion a'u teuluoedd, neu'n agored i'r gymuned gyfan, gan werthu lle i faniau hufen iâ, stondinau byrgyrs ac yn y blaen er mwyn denu mwy o bobl.

• Disgos a dawnsfeydd - mae'r disgo ysgol traddodiadol yn hwyl ac yn ffordd dda o godi arian. Gallai disgos ar gyfer oedolion hefyd godi arian ar y cyrion, ond maent yn fwy tebygol o fod yn gyfle i gymdeithasu yn fwy na dim. Gair o rybudd: gyda disgos ar gyfer oedolion lle mae alcohol i'w werthu ar safle heb drwydded, rhaid i'r trefnwyr wneud cais am drwydded gan ynad lleol.

• Gweithgareddau noddi - ffordd dda o godi arian heb orfod cael gormod o bobl i helpu. Gallent fod yn chwaraeon (bydd angen yswiriant a goruchwyliaeth ofalus ar gyfer y rhain) neu'n weithgareddau dosbarth, fel dysgu tablau, diarhebion, barddoniaeth ac yn y blaen, sy'n dod â budd arall ar wahân i'r budd ariannol.

• Ocsiynau addewidion - bydd Cymdeithasau Rhieni ac Athrawon yn gofyn i rieni a busnesau lleol gynnig 'addewidion' a fydd wedyn yn cael eu gwerthu mewn arwerthiant. Gallai'r rhain fod yn noson o warchod plant, diwrnod o beintio tŷ, steil gwallt newydd, cacennau, pryd o fwyd mewn bwyty - mae'r posibiliadau'n ddi-ben-draw! Bydd y rhain wedyn yn cael eu gwerthu mewn arwerthiant i'r sawl sy'n cynnig y pris uchaf. Os am noson lwyddiannus, rhaid cael arwerthwr da!

• Nosweithiau gan gwmnïau lleol - mae digwyddiadau sy'n cael eu trefnu'n fasnachol fel sioeau ffasiwn, nosweithiau blasu gwin ac yn y blaen, yn ddelfrydol ar gyfer codi arian. Bydd cwmnïau fel eich cangen leol o siop gadwyn fawr, yn ogystal â chwmnïau lleol llai, yn dod i ysgol i drefnu gweithgaredd. Os ydych yn gwneud sioe ffasiwn, defnyddiwch y plant fel modelau a bydd y rhieni a'r teidiau a'r neiniau'n heidio i brynu tocynnau!

Gwefannau defnyddiol:
Cyngor a dolenni cyswllt defnyddiol gan Gymdeithas Rieni ac Athrawon Dyfnaint

Cyngor a syniadau ar gyfer codi arian

Dyw'r BBC ddim yn gyfrifol am gynnwys safleoedd rhyngrwyd allanol