၂၀၂၁ ခုနှစ်အတွက် အကောင်းဆုံး ဒါရိုက်တာ အော်စကာဆုကို ဟောလီးဝုဒ်လောက ပြင်ပက တရုတ်အမျိုးသမီး ကလိုဝီ ဂျောင်း ဆွတ်ခူး

ကလိုဝီ ဂျောင်း ဟာ အော်စကာဆု သမိုင်းမှာ လူဖြူမဟုတ်တဲ့ အမျိုးသမီးတစ်ဦး ပထမဆုံး ဒါရိုက်တာဆု ရခဲ့တာ ဖြစ်ပြီး ဒုတိယမြောက် အမျိုးသမီး ဒါရိုက်တာလည်း ဖြစ်ပါတယ်။

ဗြိတိန်နိုင်ငံမှာ ပညာဆည်းပူးခဲ့ပြီး အမေရိကန် အခြေစိုက်တဲ့ တရုတ်နိုင်ငံဖွား ကလိုဝီ ဂျောင်းဟာ သူ့ရဲ့ တတိယမြောက် ရုပ်ရှင်ကား ဖြစ်တဲ့ Nomadland ရုပ်ရှင်ကားအတွက်လည်း အကောင်းဆုံး ရုပ်ပုံဆု ဆွတ်ခူးခဲ့ပါတယ်။

မကြာခဏဆိုသလို သူ့ရဲ့ ရုပ်ရှင်ကား ၃ ခုစလုံးထဲမှာ ပါဝင် သရုပ်ဆောင်သူတွေဟာ ရုပ်ရှင်လုပ်ငန်းနဲ့ အသက်မွေးဝမ်းကျောင်း မလုပ်သူတွေ ဖြစ်ပြီး အမေရိကန်အနောက်ပိုင်းက လူမှုအသိုင်းအဝိုင်းအကြောင်း အခြေခံ ရိုက်ကူးထားတာ ဖြစ်ပါတယ်။

ဒါပေမဲ့ သူအသစ်ရိုက်မယ့် ရုပ်ရှင်ကတော့ အဲဒီအကြောင်းမျိုး မဟုတ်တော့ဘဲ Eternals ဆိုတဲ့ Marvel ကာတွန်းရုပ်ရှင်ကား တစ်ကားဖြစ်ပါလိမ့်မယ်။

ကလိုဝီ ဂျောင်း ဆိုတာဘယ်သူလဲ

The Hurt Locker ဆိုတဲ့ ရုပ်ရှင်ကားနဲ့ အကောင်းဆုံး ဒါရိုက်တာဆုကို ကက်သရင်း ဘစ်ဂယ်လို က ပထမဆုံးအမျိုးသမီးဒါရိုက်တာအဖြစ် ဆွတ်ခူးရခဲ့အပြီး ၁၁ နှစ်အကြာမှာ အသက် ၃၉ နှစ်အရွယ် ကလိုဝီ ဂျောင်းဟာ အခုနှစ်ပိုင်းတွေအတွင်း အထူးခြားဆုံးနဲ့ အထူးချွန်ဆုံး ရုပ်ရှင်ဒါရိုက်တာတွေထဲက တစ်ဦးအဖြစ် ပေါ်ထွက်လာခဲ့တာပါ။

တရုတ်နိုင်ငံ ဘေဂျင်းမြို့မှာ မွေးဖွားခဲ့တဲ့ ကလိုဝီ ဂျောင်းရဲ့ ဖခင်ဟာ အောင်မြင်တဲ့ သံမဏိလုပ်ငန်း တစ်ခုရဲ့ အမှုဆောင် လူကြီး တစ်ဦးဖြစ်ပြီး သူ့မိထွေးကတော့ နာမည်ကြီး တရုတ် ဟာသမင်းသမီး ဆွန်းဒန်ဒန် ဖြစ်ပါတယ်။

တနင်္ဂနွေနေ့က အော်စကာဆု တက်ယူခဲ့စဉ်မှာ ကလိုဝီဂျောင်းက "အခက်အခဲတွေ ရင်ဆိုင်ခဲ့ရချိန်မှာ ကျွန်မ ဘယ်လို ရှေ့ဆက်ကျော်ဖြတ်နိုင်ခဲ့သလဲ ဆိုတာကို ခုတလောလေးတင် ကျွန်မ ခဏခဏ တွေးမိခဲ့ပါတယ်။ ဒီလို ကျော်ဖြတ်နိုင်ခဲ့တာဟာ ကျွန်မ ကလေးဘဝက ရခဲ့တဲ့ သင်ခန်းစာတွေကြောင့် ပဲလို့ ထင်ပါတယ်"လို့ ပြောသွားပါတယ်။

"တရုတ်နိုင်ငံမှာ ကျွန်မကြီးပြင်းခဲ့စဉ်တုန်းက ကျွန်မအဖေနဲ့ကျွန်မ ကစားနည်းတစ်မျိုး ကစားလေ့ ရှိပါတယ်။ တရုတ် ရှေးဂန္ထဝင် ကဗျာတွေ၊ စာသားတွေကို အလွတ်ရအောင် ကျက်ကြပြီး ဘယ်သူက အမြန်ပြီးအောင် ပြန်ရွတ်နိုင်သလဲဆိုတာကို ပြိုင်တဲ့ ကစားနည်းပါ"

"အဲဒီထဲမှာ ကျွန်မခုချိန်ထိ ရင်ထဲစွဲအောင် အမှတ်ရနေတဲ့ စာသားတစ်ခုက Three Character Classics ဆိုတဲ့ ရှေးဂန္ထဝင်စာအုပ်ထဲက ပထမဆုံးစာကြောင်း ဖြစ်တဲ့ "လူတွေဟာ စိတ်သန္ဓေကောင်းကောင်းနဲ့ မွေးဖွားလာကြတယ်"ဆိုတဲ့ စာသားပါ။ အဲဒီစာသားလေးဟာ ကျွန်မရဲ့ ကလေးဘဝအပေါ် အကြီးအကျယ် ရိုက်ခတ်လွှမ်းမိုးခဲ့ပါတယ်။ ခုချိန်ထိ ဒီစာသားကို ကျွန်မ တကယ်ယုံကြည်နေဆဲပါ"

"တစ်ခါတလေမှာ ဒီစာသားနဲ့ ဆန့်ကျင်ဘက်က မှန်ကောင်းမှန်နေပုံ ရပေမယ့်လည်း ကျွန်မကတော့ ကမ္ဘာတလွှား ဘယ်ပဲသွားသွား၊ ဘယ်သူနဲ့ပဲတွေ့တွေ့ အကောင်းဖက်ကပဲ တွေးခဲ့ မြင်ခဲ့ပါတယ်"

"ဒီလိုစိတ်မျိုး ထားတတ်တဲ့ သူတိုင်းဟာ သူတို့ကိုသူတို့လည်း အကောင်းပဲ မြင်တတ်မှာ ဖြစ်ပြီး ဒီလို လုပ်ဖို့ဘယ်လောက်ပဲ ခက်ခက် အချင်းချင်းလည်း စိတ်ကောင်း ထားတတ်ကြပါလိမ့်မယ်"

"ဒီတော့ အားလုံးကို ပြောချင်ပါတယ်။ အခက်အခဲတွေ ကျော်ဖြတ်ပြီး ရှေ့ဆက်သွားနိုင်တဲ့ ကျွန်မကို ကြည့်ပြီး အတုယူကြပါ"

တရုတ်နိုင်ငံထဲက ချီးမွမ်းသံတွေနဲ့ ဝေဖန်မှုတွေ

ကလိုဝီ ဂျောင်းဟာ သူ့မွေးရပ်မြေ တရုတ်နိုင်ငံနဲ့တော့ ဆက်ဆံရေး အဖုအထစ် ရှိဖူးပါတယ်။ အထူးသဖြင့် ၂၀၁၃ ခုနှစ်တုန်းက တွေ့ဆုံမေးမြန်းခန်းတစ်ခုမှာ ကလိုဝီ ဂျောင်းက "သူမွေးဖွား ကြီးပြင်းခဲ့ချိန်တုန်းက တရုတ်နိုင်ငံမှာ မုသာဝါဒတွေ မိုးလုံးပြည့် ရှိခဲ့တယ်" ဆိုပြီး ပြောသွားခဲ့စဉ်က ဖြစ်ပါတယ်။

ကျွန်မငယ်ငယ်တုန်းက သိခဲ့ရတဲ့ သတင်းအချက်အလက် အတော်များများဟာ လုံးဝမမှန်ခဲ့ပါဘူး။ အဲဒီနောက် ကျွန်မမိသားစုကိုရော ကျွန်မနောက်ကြောင်းဘဝကိုပါ အရမ်းကို ဆန့်ကျင် ပုန်ကန်တဲ့ စိတ် ဖြစ်လာခဲ့ပါတယ်။

သူရိုက်တဲ့ Nomadland ရုပ်ရှင်ကားကို တရုတ်နိုင်ငံမှာ ပြသင့် မသင့် ဆိုတာနဲ့ ပတ်သက်လို့ မေးခွန်းထုတ်စရာတွေ ဖြစ်ခဲ့ပြီး တရုတ်စျေးကွက်မှာ ကြော်ညာတာမျိုး၊ ဆိုရှယ်မီဒီယာပေါ်မှာ ဖော်ပြတာမျိုးတွေကို တရုတ်အာဏာပိုင်တွေက ဆင်ဆာဖြတ်ခဲ့တယ်လို့ သတင်းတွေက ဆိုပါတယ်။

ဒါပေမဲ့လည်း ဒီဇာတ်ကားနဲ့ အော်စကာဆုရတယ် ဆိုတဲ့ ကြေညာချက်ထွက်လာအပြီးမှာ တရုတ်အမွေအနှစ် ရှေးဂန္ထဝင် စာသားကို ဆုပေးပွဲမိန့်ခွန်းထဲ ထည့်ပြောသွားခဲ့တဲ့ ကလိုဝီ ဂျောင်းကို တရုတ်နိုင်ငံရဲ့ လင်းရောင်ခြည် အဖြစ် ဝေဘို တရုတ်လူမှုကွန်ရက် စာမျက်နှာပေါ်မှာ ချီးကျူးပြောဆိုသံတွေ ဝေသွားခဲ့ပါတယ်။

တစ်ယောက်ကဆိုရင် ကလိုဝီရဲ့ မိန့်ခွန်းဟာ ပိုလေးနက်တဲ့ နိုင်ငံရေး အနက်အဓိပ္ပာယ်ပါတဲ့ ပုံရှိတယ် လို့ ကွန်မန့်မှာ ရေးပြီး ထက်မြက်တဲ့သူ ဆိုရင် တရုတ်စျေးကွက်ကို စွန့်ဖို့ စဉ်းစားမှာ မဟုတ်ဘူးလို့ ဆက်ရေးထားပါတယ်။

ဒါပေမဲ့ တချို့ကတော့ ကလိုဝီ ဂျောင်းရဲ့ နာမည်ရော၊ အော်စကာဆုပေးပွဲအကြောင်းပါ ဝေဘို လူမှုကွန်ရက်စာမျက်နှာမှာ လူတွေ ရှာအကြည့်ဆုံး စာရင်းထဲမပါတာက အတော့်ကို ထူးဆန်းနေတယ်လို့ ထောက်ပြထားကြပါတယ်။

ကလိုဝီ ဂျောင်းနဲ့ ပတ်သက်လို့ အခြေအတင် အငြင်းပွားစရာတွေ ဖြစ်ခဲ့တာကြောင့်ရော၊ စကာတင် ဆုစာရင်းထဲ ပါခဲ့တဲ့ Do Not Split ဆိုတဲ့ ဟောင်ကောင် ဒီမိုကရေစီ လှုပ်ရှားမှုအကြောင်း မှတ်တမ်းတို ရုပ်ရှင်ကားကြောင့်ပါ အော်စကာဆုပေးပွဲအကြောင်းကို တရုတ်နိုင်ငံမှာ ထုတ်လွှင့် ပြသမှာ မဟုတ်ဘူးလို့ သတင်းတွေက ဆိုပါတယ်။

ဆယ်ကျော်သက် စိတ်ခံစားမှု

အင်္ဂလိပ်စကား လုံးဝ မပြောတတ်တဲ့ ကလိုဝီ ဂျောင်းဟာ အသက် ၁၄ နှစ်အရွယ်မှာ အင်္ဂလန်နိုင်ငံ ဘရိုက်တန်မြို့မှာ စာသင်ဖို့ ရောက်လာခဲ့ပါတယ်။

ဘရိုက်တန် ကောလိပ် ဘော်ဒါကျောင်းက ဆရာမဟောင်း အယ်လစ်ဆန် ဝစ်သာစ် က ကလိုဝီ့အကြောင်း အမှတ်ရဆုံးက အကောင်းဘက်က ပြောရရင် စိန်ခေါ်မှုကို ကြိုက်တဲ့သူလို့ ဆိုနိုင်ပါတယ် လို့ ဘီဘီစီကို ပြောပါတယ်။

"သူက တခြားနိုင်ငံ၊ တခြားယဉ်ကျေးမှုအသိုင်းအဝိုင်းက လာတာဆိုတော့ ကျွန်မတို့ တစ်ခုခု လုပ်ရင် ဘာလို့ ဒီလို လုပ်တာလဲလို့ အမြဲ မေးခွန်းထုတ်တတ်ပါတယ်။ သူတော်တာကတော့ သိသာပါတယ်။ အင်္ဂလိပ်စကားကို ချက်ချင်းပဲ ကျွမ်းကျွမ်းကျင်ကျင် ပြောတတ်ခဲ့ပါတယ်"

ကလိုဝီ ဂျောင်းကိုယ်တိုင်လည်း ဘရိုက်တန်မြို့ ကမ်းခြေပေါ်မှာ သူစိတ်ခံစားချက် ပြင်းထန်ခဲ့ပုံတွေအကြောင်း အမှတ်တရ ပြန်ပြောပြခဲ့ဖူးပါတယ်။ "ဆယ်ကျော်သက်အရွယ် ပေါက်ကွဲမှုတွေ အများကြီး ရှိခဲ့ပါတယ်။ ဒါပေမဲ့ အဲဒီအချိန်တွေဟာ ဖန်တီးမှုနှစ်ကာလ အချိန် တချို့ လို့ ဆိုရမှာပါ" လို့ ကလိုဝီ ဂျောင်းက ပြောပါတယ်။

ဘရိုက်တန်ကနေ အမေရိကန်နိုင်ငံ မက်ဆာချူးဆက်ပြည်နယ်မှာ နိုင်ငံရေး သိပ္ပံဘာသာ သွားသင်ယူခဲ့ပြီး အဲဒီနောက် ၂၀၁၀ ခုနှစ်မှာတော့ နယူးယောက် တက္ကသိုလ် Tisch School of the Arts မှာ အနုပညာ ဒါရိုက်တာ စပိုက်ခ် လီး ရဲ့ ရုပ်ရှင်သင်တန်းမှာ တက်ရောက် ပညာသင်ခဲ့ပါတယ်။

အဲဒီကာလဟာ ကလိုဝီ ဂျောင်းအတွက် အရေးပါတဲ့ ကာလတစ်ခု ဖြစ်ခဲ့ပါတယ်။ သူ့ရဲ့ ပထမဆုံး ရုပ်ရှင်ဖြစ်တဲ့ Songs My Brothers Taught Me ရုပ်ရှင်ကားကို စရိုက်ကူးခဲ့ပါတယ်။ တောင်ဒါကိုတာ ပြည်နယ်က မူလတိုင်းရင်းမျိုးနွယ်တစ်ခုအကြောင်း အဲဒီဇာတ်ကားထဲမှာ ပါတဲ့ ဇာတ်ကောင်တွေဟာ ရုပ်ရှင်လုပ်ငန်းနဲ့ အသက်မွေးသူတွေ မဟုတ်သူတွေ ပါဝင် သရုပ်ဆောင် ထားကြတာပါ။

နယူးယောက် တက္ကသိုလ်မှာ စာသင်ယူနေစဉ်မှာ အင်္ဂလန်နိုင်ငံ ကောန်ဝေါလ်ခရိုင်ကနေ သူ့လိုပဲ ကျောင်းလာတက်တဲ့ ကျောင်းနေဖက် ဂျော့ရှူဝါ ဂျိမ်းစ် ရစ်ချာ့ဒ်နဲ့ တွေ့ဆုံခဲ့ပြီး စီးပွားဖက်၊ ကြင်ဖော်ဖက် ဖြစ်လာခဲ့ပါတယ်။ ကလိုဝီရဲ့ ရုပ်ရှင်ကား ၃ ကားစလုံးမှာ ဂျော့ရှူဝါ ဂျိမ်းစ် ရစ်ချာ့ဒ်က ရုပ်ရှင်ဂရပ်ဖစ်သမား အဖြစ် တာဝန်ယူ လုပ်ခဲ့ပါတယ်။

"ကျွန်တော်တို့ နှစ်ယောက် အကြိုက်ချင်းတူရာကနေ နှောင်ကြိုးတွယ်ခဲ့ပြီး လူချင်းလည်း စိတ်ဝင်စားခဲ့ကြတာပါ" လို့ ဂျော့ရှူဝါ ဂျိမ်းစ် ရစ်ချာ့ဒ်က IndieWire သတင်းမီဒီယာကို ပြောပြပါတယ်။

ဂျော့ရှူဝါ ဂျိမ်းစ် ရစ်ချာ့ဒ် ကိုယ်တိုင်လည်း Nomadland ရုပ်ရှင်ကားအတွက် အကောင်းဆုံး ရုပ်ရှင် ဂရပ်ဖစ် အော်စကာ စကာတင်ဆုစာရင်းထဲ ပါခဲ့ပါတယ်။

Songs My Brothers Taught Me ရုပ်ရှင်ကား ရိုက်ကူးစဉ် ကလိုဝီ ဂျောင်းဟာ ဘရက်ဒီ ဂျန်ဒရို ဆိုတဲ့ မြင်းစီးသမားနဲ့ ဆုံခဲ့ပြီး နောက်ရိုက်မယ့် ရုပ်ရှင်ကားမှာ သူ့ဘဝအကြောင်း ရိုက်ကူးဖို့ ဆုံးဖြတ်ခဲ့ပါတယ်။

ကလိုဝီ ဂျောင်းရဲ့ ဖခင်က အမှုဆောင် ထုတ်လုပ်သူအဖြစ် တာဝန်ယူခဲ့တဲ့ အဲဒီ The Rider ရုပ်ရှင်ကားဟာ မြင်းစီးရင်း မတော်တဆ အကြီးအကျယ် ဒဏ်ရာရခဲ့သူ ဘရက်ဒီ ဆိုတဲ့ လူငယ်လေးရဲ့ တကယ့် ဖြစ်ရပ်မှန်ဘဝအကြောင်း ရိုက်ကူးထားတာ ဖြစ်ပြီး ၂၀၁၇ ခုနှစ်မှာ ရုံတင်ခဲ့ပါတယ်။

အပြင်လူလိုပဲ အမြဲ ခံစားမိတယ်

အဲဒီရုပ်ရှင်ကို အမေရိကန် ရုပ်ရှင်ဝေဖန်တဲ့အဖွဲ့ US National Society of Film Critics နဲ့ BBC Radio 4 ရဲ့ ရုပ်ရှင်အစီအစဉ်တွေက အဲဒီနှစ်ရဲ့ အကောင်းဆုံး ရုပ်ရှင်ကားအဖြစ် ဖော်ပြခဲ့ကြပါတယ်။

ကလိုဝီ ဂျောင်းနဲ့ ဂျော့ရှူဝါ ဂျိမ်းစ် ရစ်ချာ့ဒ် တို့ ဖန်တီးထုတ်လုပ်တဲ့ The Rider ရုပ်ရှင်ကားဟာ နေရောင်ခြည် တောက်ပနေတဲ့ လေဟာပြင် ကွင်းပြင်ကြီးထဲမှာ သရုပ်ဆောင် မဟုတ်တဲ့ တကယ့်ဇာတ်ကောင်တွေနဲ့ တကယ့် ဖြစ်ရပ်မှန် ဘဝအကြောင်း ရင်ထဲစွဲနင့်သွားအောင် ကွက်ကွက်ကွင်းကွင်း ဖော်ပြနိုင်ခဲ့တဲ့ ဒရာမာ ရုပ်ရှင်ကား တစ်ကား ဖြစ်ခဲ့ပါတယ်။

သူ့ကို ဆွဲဆောင်စေခဲ့တဲ့ ဇာတ်လမ်းတွေ အကြောင်း ကလိုဝီ ဂျောင်းက The Telegraph သတင်းစာနဲ့ တွေ့ဆုံမေးမြန်းခန်းမှာ ပြောပြခဲ့ပါတယ်။ "ကျွန်မဘဝမှာ ဘယ်တော့မဆို ကျွန်မကိုကျွန်မ အပြင်လူအဖြစ်ပဲ ခံစားမိပါတယ်။ ဒါ့ကြောင့်လည်း လူမှုအသိုင်းအဝိုင်း အပြင်ဘက်က လူတွေအကြောင်းကိုပဲ ကျွန်မ စိတ်ဝင်စားမိတာပါ"

တစ်နေရာထဲမှာ အတည်တကျ မနေဘဲ ဗန်ကားတွေနဲ့ လှည့်လည်နေထိုင် ကျင်လည်နေတဲ့ တိုင်းရင်းလူမျိုးစု အမေရိကန်လူမျိုးနွယ်တွေရဲ့ တကယ့်ဘဝအကြောင်း စာရေးဆရာမ ဂျက်ဆီကာ ဘရူဒါရဲ့ ၂၀၁၇ ခုနှစ်ထုတ် Nomadland: Surviving America in the Twenty-First Century ဆိုတဲ့ ဝတ္ထုဇာတ်လမ်းကို ကလိုဝီ ဂျောင်းက အရမ်းစိတ်ဝင်စားခဲ့တာပါ။

အဲဒီဇာတ်လမ်းထဲက လူအတော်များများရဲ့အကြောင်းကို အသေအချာ သိအောင် ကလိုဝီ ဂျောင်းက လုပ်ခဲ့ပြီး Nomadland ရုပ်ရှင်ကားထဲမှာ အဓိက ဇာတ်ကောင် ဖန်းန်ဆိုတဲ့ အမျိုးသမီးနေရာမှာ သရုပ်ဆောင်တဲ့ ဖရန်စစ်စ် မက်ခ်ဒေါမန်နဲ့အတူ အဲဒီလူတွေကို ကိုယ်တိုင် ဝင်သရုပ်ဆောင်ခိုင်းခဲ့တာပါ။

အဲဒီ ဇာတ်ကားထဲမှာ ဖန်းန်ဟာ သူ့ခင်ပွန်းဖြစ်သူ ကွယ်လွန်၊ အလုပ်နဲ့ အိမ်လည်း ဆုံးရှုံးခဲ့ရအပြီးမှာ ဗင်ကားနဲ့ လှည့်လည်နေထိုင်သူတွေနဲ့အတူ လမ်းပေါ်မှာ ဘဝသစ် ထူထောင်ခဲ့ပါတယ်။

ဒီရုပ်ရှင်ကားဟာ တော်ရွန်တို ရုပ်ရှင်ပွဲတော်နဲ့ ဗင်းနစ်စ် ရုပ်ရှင်ပွဲတော် နှစ်ခုစလုံးမှာ ထိပ်တန်းဆုတွေ ရခဲ့တဲ့ ပထမဆုံး ရုပ်ရှင်ဖြစ်လာခဲ့အပြီး စက်တင်ဘာလကတည်းက အော်စကာဆုရမယ်လို့ သတင်းထွက်နေတာပါ။

ဒါပေမဲ့လည်း ဒီရုပ်ရှင်ကားပါ ဇာတ်ဝင်ခန်းတွေထဲက အမေဇုံ ကုန်လှောင်ရုံတစ်ခုမှာ ဘရူဒါ အလုပ်လုပ်ခဲ့စဉ်နဲ့ ဖန်းန်နဲ့ သူ့သူငယ်ချင်းတွေ ယာယီ လုပ်တွေ လုပ်ခဲ့စဉ်က ကြုံခဲ့ရတဲ့ အတွေ့အကြုံ ပြဿနာ တချို့အကြောင်းတွေကို အရေးမပါသလို ရိုက်ကူးခဲ့တဲ့အတွက်တော့ အခြေအတင် ပြောစရာ၊ ဝေဖန်စရာတွေလည်း ဖြစ်ခဲ့ပါတယ်။

ဒါပေမဲ့လည်း ဒီဝေဖန်ချက်တွေက ကလိုဝီ ဂျောင်းကို ထူးချွန်ဆုတွေ ချီးမြှင့်ခံရမှု ဒါမှမဟုတ် ဟောလီးဝုဒ်ရဲ့ ဂုဏ်ပြုထိုက်ဆုံး ရုပ်ရှင်ဖန်တီးသူတစ်ဦးအဖြစ် ချီးမွမ်းပြောဆိုမှုတွေကိုတော့ ရပ်မသွားစေခဲ့ပါဘူး။

ကလိုဝီ ဂျောင်းဟာ ကမ္ဘာ့ရုပ်ရှင်လောကထဲကို ခြေလှမ်း ဝင်ရောက်ထားခဲ့ပြီး ဖြစ်ပါတယ်။ နာမည်ကြီး သရုပ်ဆောင်တွေ ဖြစ်တဲ့ အန်ဂျယ်လီးနား ဂျိုလီ၊ ဆာလ်မာ ဟာယက်၊ ရစ်ချာ့ဒ် မက်ဒန်၊ ကူမေးလ် နန်ဂျီယန်နီ တို့ ပါဝင် သရုပ်ဆောင်ထားတဲ့ Marvel's Eternals ဆိုတဲ့ ကာတွန်းရုပ်ရှင်ကားထဲမှာ ကလိုဝီဂျောင်းက သူ့ရဲ့ ထူးခြားပြောင်မြောက်တဲ့ အမြင် သဘောထားတွေကို ထည့်သွင်း ရိုက်ကူးထားပါတယ်။

သူဟာ Marvel Cinematic Universe ရုပ်ရှင်ကုမ္ပဏီက ထုတ်တဲ့ ရုပ်ရှင်ကားတွေကို ဆယ်စုနှစ် တစ်ခုကြာလောက် နှစ်သက် အားပေးလာခဲ့တဲ့ ပရိသတ်တစ်ဦး ဖြစ်ပါတယ်။

ကျွန်မ Marvel ရုပ်ရှင်ကား တစ်ကား ရိုက်ချင်တယ်လို့ ထုတ်ပြောလိုက်တော့ ကျွန်မဆီကို သင့်တော်တဲ့ ရုပ်ရှင်ဇာတ်လမ်းတစ်ခု ရလာခဲ့တာပါ လို့ ကလိုဝီက ပြောပြပါတယ်။

အဲဒီ Eternals ရုပ်ရှင်က နိုဝင်ဘာလမှာ ရုံတင်မှာပါ။ အဲဒီနောက်မှာတော့ Dracula အကြောင်း အနာဂတ် အနောက်တိုင်း သိပ္ပံ ဇာတ်ကားတစ်ကား ရိုက်ဖို့ စီစဉ်နေတယ်လို့ သတင်းတွေက ဆိုပါတယ်။

ကလိုဝီ ဂျောင်းက အနောက်တိုင်း မြင်းစီးသမားတွေရဲ့ ဘဝအကြောင်းပဲဖြစ်ဖြစ် ဒါမှမဟုတ် ကာတွန်းသူရဲကောင်း ဇာတ်ဆောင်တွေအကြောင်းပဲဖြစ်ဖြစ် ရုပ်ရှင်လောကမှာ ကြွယ်ဝပြီး ယုံကြည်စိတ်ချရတဲ့ ကမ္ဘာတစ်ခု ဖန်တီးရတာဟာ သူအနှစ်သက်ဆုံး အရာပါလို့ ပြောခဲ့ပါတယ်။

သူ့ရဲ့ Marvel ရုပ်ရှင်အကြောင်း Variety မဂ္ဂဇင်းကို ပြောပြခဲ့စဉ်မှာ ကလိုဝီ ဂျောင်းက အဲဒီ ရုပ်ရှင်ဇာတ်လမ်းကို ယုတ္တိလည်း ရှိ၊ အကွေ့အကောက်လေးတွေလည်း ပါအောင် ရိုက်ထားတယ်လို့ ဆိုပါတယ်။

"အဲဒါက ကျွန်မကို စိတ်လှုပ်ရှားစေတာပါ။ မြင်းစီးသမားတွေရဲ့ ဘဝအကြောင်း သွားရိုက်တာမျိုးနဲ့ ကွာခြားချက် ဘာမှ မရှိပါဘူး"