၁၉၈၉ တရုတ် ကျောင်းသားလှုပ်ရှားမှုရဲ့ အထင်ကရဖြစ်ရပ်များ
ဓာတ်ပုံ ရင်းမြစ်, AFP
တရုတ်နိုင်ငံ နိုင်ငံရေး ပြုပြင်ပြောင်းလဲမှု လုပ်ဖို့ အစိုးရကို တောင်းဆိုခဲ့တဲ့ ကျောင်းသားတွေကို တရုတ်အစိုးရက ပစ်ခတ်ဖြိုခွင်းခဲ့တဲ့ တီယန်နန်မင် ရင်ပြင် အရေးအခင်း နှစ် ၃၀ ပြည့်ခဲ့ပြီ ဖြစ်ပါတယ်။
၂၀၁၇ ခုနှစ်မှာ ထွက်ပေါ်လာခဲ့တဲ့ စာရွက်စာတမ်းတွေအရ အဲဒီ တီယန်နန်မင် ရင်ပြင် အရေးအခင်းမှာ လူပေါင်း ၁၀,၀၀၀ ကျော် သေဆုံးခဲ့တယ်လို့ ဆိုနိုင်ပေမဲ့ အခုထိ သေဆုံးသူအရေအတွက်ကို အတိအကျ မသိရသေးပါဘူး။
တရုတ် ကွန်မြူနစ် အစိုးရက တရုတ်သမိုင်းထဲမှာ တီယန်နန်မင် ရင်ပြင် ဖြိုခွင်းမှု အကြောင်း လေသံမှ မဟနိုင်အောင် ပိတ်ပင်ထားပါတယ်။
ကျောင်းသားလှုပ်ရှားမှု ဖြိုခွင်းခံရမှု နှစ်ပတ်လည်ပွဲတွေလည်း မလုပ်နိုင်အောင် ဖိနှိပ်ထားခဲ့ပါတယ်။
အဲဒီလို တရုတ်အစိုးရက သမိုင်းထဲက ဖျောက်ထားချင်တဲ့ ၁၉၈၉ တီယန်နန်မင် ရင်ပြင် ကျောင်းသားလှုပ်ရှားမှုမှာ ဘယ်လို အရေးပါတဲ့ အပြောင်းအလဲတွေ၊ ဖြစ်ရပ်တွေ ဖြစ်ပျက်ခဲ့ပါသလဲ။
၁၉၈၉ တရုတ် ကျောင်းသားလှုပ်ရှားမှုရဲ့ အထင်ကရဖြစ်ရပ်များ
ဟူ ယောင်ပန်း သေဆုံးမှု
တရုတ် ကွန်မြူနစ်ပါတီရဲ့ အထွေထွေ အတွင်းရေးမှူးဟောင်း အသက် ၇၃ နှစ်အရွယ် ဟူယောင်ပန်း နှလုံးရောဂါနဲ ့သေဆုံးခဲ့ပါတယ်။ ကောလိပ်ကျောင်းသား အတော်များများက ဝမ်းနည်းကြောင်း ပြသဖို့ တီယန်နန်မင်ရင်ပြင်မှာ စုဝေးခဲ့ကြပြီး တရုတ်နိုင်ငံ ပြုပြင်ပြောင်းလဲရေး နှေးကွေးနေတာကို မကျေနပ်ကြောင်း ဆန္ဒထုတ်ဖော်ခဲ့ကြပါတယ်။ ပါတီတွင်း ပြုပြင်ပြောင်းလဲရေးသမား တစ်ဦးအဖြစ် သတ်မှတ်ခံထားရသူ ဟူယောင်ပန်းကို လွတ်လပ်တဲ့ သဘောထား ရှိသူ ပညာရှင်တွေနဲ့ ကျောင်းသားတွေက ကြိုဆိုခဲ့ကြပေမယ့် ၁၉၈၇ ခုနှစ်မှာ ရာထူးကနေ နုတ်ထွက်ပေးခဲ့ရပါတယ်။
ဆန္ဒပြမှုတွေ ပြန့်နှံ့သွား
ဧပြီီလ ၁၇ ရက်နေ့မှာ ဘေဂျင်းမြို့မှာ ဆန္ဒပြသူ အရေအတွက်ဟာ ထောင်နဲ့ချီ ရှိလာပါတယ်။ ပီကင်း တက္ကသိုလ်နဲ့ ရန်မင်း တက္ကသိုလ်က ကျောင်းသားတွေဟာ ပြည်သူ့ခန်းမဆောင်ကြီးရှေ့မှာ ထိုင်ဆန္ဒပြခဲ့ကြပါတယ်။ ဟူယောင်ပန်း အပေါ် စွပ်စွဲပြစ်တင်ချက်တွေကို ပြန်သုံးသပ်ပေးဖို့နဲ့ ဒီမိုကရေစီစနစ် ပြုပြင်ပြောင်းလဲပေးဖို့ အစိုးရကို ကျောင်းသားတွေက တောင်းဆိုခဲ့ကြပါတယ်။ ဆန္ဒပြမှုတွေက တဖြည်းဖြည်းနဲ့ တခြားမြို့တွေဆီ ပြန့်နှံ့သွားပါတယ်။ ဧပြီလ ၁၉ ရက်နေ့မှာ အစိုးရရုံးဌာနချုပ်ရဲ့ ရှင်ဝါမန်ဂိတ် အရှေ့မှာ ထိုင်ဆန္ဒပြခဲ့ကြပါတယ်။
ဟူယောင်ပန်းအတွက် အောက်မေ့ဖွယ်နေ့
အစိုးရက ဟူယောင်ပန်းအတွက် နိုင်ငံတော် စျာပန အခမ်းအနား ကျင်းပပေးပါတယ်။ တီယန်နန်မင် ရင်ပြင်မှာ ချထားတဲ့ အတားအဆီးတွေကို ကျောင်းသားတွေက ချိုးဖောက် ဝင်ရောက်ခဲ့ပါတယ်။ အသနားခံစာ တစ်စောင်ကို တင်ပြဖို့ ကြိုးစားခဲ့ပြီး အဲဒီအချိန်က ဝန်ကြီးချုပ်ဖြစ်သူ လီပန်းနဲ့ တွေ့ဖို့ တောင်းဆိုခဲ့ကြပါတယ်။ ရှီယန်နဲ့ ချန်ရှာမြို့တွေမှာ လူထုဆန္ဒပြမှုတွေ ဖြစ်ပွားခဲ့ပြီး အဲဒီကနေ ဆူပူအုံကြွမှုတွေ ဖြစ်လာခဲ့ပါတယ်။
ကျောင်းသား သမဂ္ဂ ထူထောင်
ဘေဂျင်းမြို့က တက္ကသိုလ် ၂၀ ကျော်က ကျောင်းသားတွေက ယာယီသမဂ္ဂ တစ်ခု ထူထောင်မယ်လို့ ထုတ်ဖော်ကြေညာလိုက်ပြီး အစိုးရက သတင်း ထိန်းချုပ်မှုတွေ လုပ်နေတာအပေါ် ရက် အကန့်အသတ်မရှိ သပိတ်စတင်လိုက်ပါတယ်။
ပြင်းပြင်းထန်ထန် စကားလုံးတွေနဲ့ အယ်ဒီတာ့အာဘော်
ပြည်သူ့နေ့စဉ် အစိုးရ သတင်းစာထဲက "ဗရုတ်သုတ်ခ အခြေအနေကို အခိုင်အမာ ဆန့်ကျင်ဖို့ လိုတယ်" လို့ ခေါင်းစဉ် တပ်ထားတဲ့ အယ်ဒီတာ့အာဘော် ဆောင်းပါးမှာ အခြေအနေတွေ ဝရုန်းသုန်းကား ဖြစ်အောင် လူတချို့က ကျောင်းသားတွေကို အသုံးချခဲ့တယ်လို့ စွပ်စွဲ ရေးသားထားပါတယ်။ အဲဒီ ဆောင်းပါးထဲမှာ ကျောင်းသားတွေရဲ့လှုပ်ရှားမှုဟာ ဝရုန်းသုန်းကား နိုင်တဲ့ ကြိုတင် ပူးပေါင်းကြံစည်မှု တစ်ခု ဖြစ်တယ်လို့ တရားဝင် သုံးနှုန်းထားပါတယ်။ ဒီဆောင်းပါးကြောင့်ဆန္ဒပြသူတွေ ပိုဒေါသထွက်ခဲ့ကြပြီး ဆန္ဒပြမှုတွေမှာ လူတွေ ပိုပူးပေါင်း ပါဝင်လာခဲ့ကြပါတယ်။
အစိုးရနဲ့ တွေ့ဆုံ ဆွေးနွေးဖို့ ကျောင်းသားတွေ တောင်းဆို
အယ်ဒီတာ့အာဘော် ဆောင်းပါး ထုတ်ပြန်တဲ့ နေ့မှာပဲ တက္ကသိုလ် အသီးသီးက ကျောင်းသားတွေ လမ်းမပေါ်ထွက် ဆန္ဒပြခဲ့ကြပါတယ်။ ယာယီ ကျောင်းသား သမဂ္ဂကို ဝူအာကိုင်ရှီ ဦးဆောင်ပြီး ဘေဂျင်း ကျောင်းသားများ ကိုယ်ပိုင်အုပ်ချုပ်ခွင့်ရ ဖက်ဒရေးရှင်း အဖွဲ့အဖြစ် ပြန်လည် ဖွဲ့စည်းခဲ့ပါတယ်။ အာဏာပိုင်တွေအနေနဲ့ ကျောင်းသား သမဂ္ဂသစ်ကို တရားဝင် အဖွဲ့အစည်း အဖြစ် လူသိရှင်ကြား အသိအမှတ် ပြုပေးဖို့နဲ့ ဧပြီလ ၂၆ ရက်နေ့က ထုတ်ပြန်ခဲ့တဲ့ အယ်ဒီတာ့အာဘော် ဆောင်းပါးကို လုံးဝ ပြန်ရုပ်သိမ်းပေးဖို့ အပါအဝင် တောင်းဆိုချက် ၃ ချက်ကို အသစ် ဖွဲ့စည်းလိုက်တဲ့ ကျောင်းသား သမဂ္ဂသစ်က တောင်းဆိုခဲ့ပြီး တွေ့ဆုံဆွေးနွေးမှု ၇ ကြိမ် လုပ်ဖို့ အစိုးရထံ တင်ပြခဲ့ပါတယ်။ အဲဒီအချိန်က အစိုးရ ပြောခွင့်ရပုဂ္ဂိုလ် ယွန်မူနဲ့ အစိုးရအဖွဲ့ တာဝန်ရှိ ပုဂ္ဂိုလ်တွေက ဘေဂျင်းမြို့ တက္ကသိုလ် ၁၆ ခုက ကျောင်းသား ၄၅ ဦးနဲ့ ပွင့်ပွင့်လင်းလင်း တွေ့ဆုံ ဆွေးနွေးခဲ့ပါတယ်။ ဒါပေမဲ့ ဝန်ဒိုင်နဲ့ ဝူအာကိုင်ရှီ တို့ကတော့ အစိုးရဖက်က ပြောတာတွေကို အယုံအကြည် မရှိဘူးလို့ ထုတ်ဖော်ကြေညာခဲ့ပါတယ်။
သွေးစည်းညီညွတ်ကြဖို့ အတွင်းရေးမှူးချုပ်ရဲ့ မိန့်ခွန်း
မေလ ၄ ရက်နေ့ လှုပ်ရှားမှု နှစ် ၇၀ ပြည့် အခမ်းအနားနေ့ မတိုင်ခင် ဆန္ဒပြမှုတွေမှာ နောက်ထပ် ကျောင်းသားတွေ ပူးပေါင်း ပါဝင်လာပါတယ်။ အဲဒီအချိန်က ကွန်မြူနစ်ပါတီ လွှတ်တော် အတွင်းရေးမှူးချုပ် အဖြစ် တာဝန်ယူနေတဲ့ ကျောက်ကျိယန် ဟာ လွတ်လပ်တဲ့ အတွေးအခေါ်ရှိသူ ပြုပြင်ပြောင်းလဲရေးသမား တစ်ဦး ဖြစ်ပြီး ကျောင်းသားတွေနဲ့ အစိုးရ တွေ့ဆုံ စကားပြောဖို့ သူက ဦးဆောင် ပြောပေးခဲ့ပါတယ်။ သူ့မိန့်ခွန်း နှစ်ခုထဲမှာ ကျောင်းသားတွေအပေါ် စာနာသနားမှုတွေ ပြခဲ့ပြီး အဂတိ လိုက်စားမှုတွေကို ကျောင်းသားတွေ အာရုံစိုက် ထောက်ပြခဲ့တာဟာ ကျိုးကြောင်းဆီလျော်တယ်လို့ ပြောသွားခဲ့ပါတယ်။ အခြေအနေတွေ လျော့ကျသွားပေမဲ့ သြဇာကြီးမားတဲ့ ကျောင်းသား ခေါင်းဆောင် တချို့က ဆန္ဒပြမှုတွေ ဆက်လုပ်နိုင်အောင် အစွန်းရောက် လုပ်ရပ်တွေ ထပ်လုပ်ကြဖို့ တိုက်တွန်းနေဆဲ ဖြစ်ပါတယ်။ ဆိုဗီယက် ခေါင်းဆောင် မီခေးလ် ဂိုဘာချော့ဗ် တရုတ်နိုင်ငံကို မလာခင် နှစ်ရက် အလိုမှာ ကျောင်းသားခေါင်းဆောင် ချိုင်လင်း ဦးဆောင်တဲ့ ကျောင်းသား ရာပေါင်းများစွာဟာ တီယန်နန်မင် ရင်ပြင်မှာ ရက်အကန့်အသတ်မရှိ အစာငတ်ခံ ဆန္ဒပြမှုကြီးတစ်ခုကို စတင်လိုက်ကြပါတယ်။
အစာငတ်ခံ
တင်းမာနေတဲ့ အခြေအနေတွေ လျော့ကျသွားပေမဲ့ သြဇာကြီးမားတဲ့ ကျောင်းသား ခေါင်းဆောင် တချို့က ဆန္ဒပြမှုတွေ ဆက်လုပ်နိုင်အောင် လှုပ်ရှားမှုတွေ ပြင်းပြင်းထန်ထန် ထပ်လုပ်ကြဖို့ တိုက်တွန်းနေဆဲ ဖြစ်ပါတယ်။ ဆိုဗီယက် ခေါင်းဆောင် မီခေးလ် ဂိုဘာချော့ဗ် တရုတ်နိုင်ငံကို မလာခင် နှစ်ရက် အလိုမှာ ကျောင်းသားခေါင်းဆောင် ချိုင်လင်း ဦးဆောင်တဲ့ ကျောင်းသား ရာပေါင်းများစွာဟာ တီယန်နန်မင် ရင်ပြင်မှာ ရက်အကန့်အသတ်မရှိ အစာငတ်ခံ ဆန္ဒပြမှုကြီးတစ်ခုကို စတင်လိုက်ကြပါတယ်။
သိက္ခာကျစရာ ခရီးစဉ်
တရုတ် ဆိုဗီယက် နှစ်နိုင်ငံ အဆင်မပြေ ဖြစ်ခဲ့ပြီးကတည်းက ပထမဆုံးအကြိမ် တရုတ် ဆိုဗီယက် ထိပ်သီး ဆွေးနွေးပွဲအတွက် ဆိုဗီယက်ခေါင်းဆောင် မီခေးလ် ဂိုဗာချော့ဗ် ဘေဂျင်းမြို့ကို ရောက်ရှိလာပါတယ်။ သူ့ရဲ့ ခရီးစဉ်ဟာ နှစ်နိုင်ငံအကြား ဆယ်စုနှစ် ၃ ခုကြာ ရန်လိုနေမှုကို တရားဝင် အဆုံးသတ်သွားစေဖို့ ရည်ရွယ်ထားတာပါ။ ဒါပေမဲ့ တီယန်နန်မင် ရင်ပြင်ကို ကျောင်းသားတွေ အပိုင်စီးထားတဲ့အတွက် ဂိုဗာချော့ဗ်ကို ကြိုဆိုတဲ့ အခမ်းအနားကို ဘေဂျင်း လေဆိပ်မှာပဲ ကျင်းပခဲ့ရတဲ့အတွက် တရုတ်အစိုးရအတွက် အကြီးအကျယ် အရှက်ရစရာ ဖြစ်ခဲ့ရပါတယ်။ ဂိုဗာချော့ဗ်နဲ့ တွေ့ဆုံအပြီးမှာ ကျောက်ကျိယန် က တရုတ်နိုင်ငံမှာ အရေးပါတဲ့ ကိစ္စရပ်တွေအားလုံးဟာ တိန့်ရှောင်ဖိန်ရဲ့ ထိန်းချုပ်မှု လိုအပ်တယ်လို့ ပြောကြားရင်း အငြိမ်းစားယူပြီးပေမဲ့ ပါတီတွင်းမှာ တိန့်ရှောင်ဖိန်ရဲ့ သြဇာ လွှမ်းမိုးနေသေးတယ် ဆိုတာကို အတည်ပြုခဲ့ပါတယ်။
ဝန်ကြီးချုပ်နဲ့ ကျောင်းသားခေါငး်ဆောင်တွေ တွေ့ဆုံ
အယူစွဲ ပြင်းထန်သူလို့ သတ်မှတ်ခံထားရတဲ့ အဲဒီအချိန်က ဝန်ကြီးချုပ် လီပန်းဟာ ဝန်ဒန်၊ ဝူအာကိုင်ရှီး အပါအဝင် တခြား ကျောင်းသားခေါင်းဆောင်တွေနဲ့ မေလ ၁၈ ရက်နေ့မှာ ပြည်သူ့ခန်းမကြီးမှာ တွေ့ဆုံခဲ့ပါတယ်။ ကျောင်းသားတွေ အစာငတ်ခံ ဆန္ဒပြနေတာကို ချက်ချင်း ရပ်တန့်ပြီး တီယန်နန်မင် ရင်ပြင်ကနေ ထွက်ခွာပေးဖို့ လီပန်းက တောင်းဆိုခဲ့ပါတယ်။ ဒါပေမဲ့ ပြည်သူ့နေ့စဉ် အစိုးရသတင်းစာပါ အယ်ဒီတာ့အာဘော် ဆောင်းပါးထဲက စကားလုံးတွေကို ပြင်ဆင်ပေးဖို့နဲ့ ကျောင်းသားလှုပ်ရှားမှုကို ဒီမိုကရေစီနညး်ကျတဲ့ မျိုးချစ် လှုပ်ရှားမှု အဖြစ် အသိအမှတ်ပြုပေးဖို့ အာဏာပိုင်တွေကို ကျောင်းသားတွေက တောင်းဆိုခဲ့ပါတယ်။ နှစ်ဖက်စလုံး သဘောတူချက် တစုံတရာ မရခဲ့ကြပါဘူး။
ကျောင်းသားတွေနဲ့ ကျောက်ကျိယန် တွေ့ဆုံ
ကွန်မြူနစ်ပါတီနဲ့ အစိုးရက ဘယ်တော့မှ လက်စားချေမှာ မဟုတ်ဘူးလို့ ကျောက်ကျိယန်က ကျောင်းသားတွေကို ကတိပြုခဲ့ပြီး ကျောင်းသားတွေ အစာငတ်ခံ ဆန္ဒပြနေတာကို မေလ ၁၇ ရက်နေ့မှာ ရပ်ဆိုင်းဖို့ တိုက်တွန်းခဲ့ပါတယ်။ ဒါပေမဲ့ ကျောင်းသားတွေကတော့ လက်မခံဘဲ ငြင်းဆန်ခဲ့ပါတယ်။ ဆန္ဒပြမှု အရှိန် တိုးမြင့်လာနေချိန်မှာပဲ တီယန်နန်မင် ရင်ပြင်မှာ ရှိတဲ့ ကျောင်းသားတွေကို ကျောက်ကျိယန် လာတွေ့ခဲ့ပြီး အစာငတ်ခံ ဆန္ဒပြနေတာကို အဆုံးသတ်ဖို့ ပန်ကြားခဲ့ပါတယ်။ နောင်မှာ ဝန်ကြီးချုပ် ဖြစ်လာမယ့် ဝန်ဂျောင်ဘောင်းလည်း သူနဲ့ အတူ လိုက်ပါလာပါတယ်။ ငါတို့ ဒီကို ရောက်လာပြီ၊ ဒါပေမဲ့ သိပ်ကို နောက်ကျသွားပြီလို့ ကျောက်ကျိယန်က လူအုပ်ကြီးကို ပြောခဲ့ပါတယ်။ ဒါဟာ လူထုရှေ့မှောက်မှာ ကျောက်ကျိယန်ကို နောက်ဆုံးအကြိမ် တွေ့ခဲ့တာ ဖြစ်ပါတယ်။
စစ်တပ် ဝင်လာပြီ
အစိုးရက စစ်ဥပဒေ ပြဌာန်းလိုက်ပြီး ဘေဂျင်းမှာ တပ်ဖွဲ့ဝင် အများအပြား ချထားလိုက်ပါတယ်။ ဒါပေမယ့် တင့်ကားတွေကို လူအုပ်ကြီးက ဝိုင်းထားပြီး လမ်းတွေပေါ်မှာ အတားအဆီးတွေ ချထားခဲ့ကြပါတယ်။
တင်းမာမှုတွေ မြင့်တက်လာနေ
ဆန္ဒပြမှုတွေ နောက်တပတ်အထိ ကူးလာခဲ့ပါတယ်။ တီယန်နင်မင် ရင်ပြင်ကို ဆက်သိမ်းပိုက်ထားမလား ဒါမှမဟုတ် အဲဒီကနေ ထွက်ပေးမလား ဆိုတာနဲ့ ပတ်သက်လို့ ကျောင်းသားတွေအကြား သဘောကွဲလွဲမှုတွေ ပိုကြီးထွားလာခဲ့ပါတယ်။ တရုတ် အာဏာပိုင်တွေက ဆန္ဒပြသူတွေကို လုံးဝ ရှင်းထုတ်ဖို့နဲ့ ဘေဂျင်းမြို့မှာ ဝရုန်းသုန်းကား အခြေအနေကို အဆုံးသတ်ဖို့ စစ်တပ်ကို သုံးပြီး အရေးယူဖို့ စဉ်းစားနေပါတယ်။
အစာငတ်ခံ ဆန္ဒပြ ကြေညာစာတမ်း
ကျောင်းသားတွေရဲ့ ဆန္ဒပြပွဲကို ထောက်ခံအားပေးတဲ့အနေနဲ့ ဘေဂျင်းမြို့ နော်မယ် တက္ကသိုလ် ကထိက လီယူ ရှောင်ဘို၊ နာမည်ကြီး ထိုင်ဝမ် အဆိုတော် ဟူ တီချီယန်းနဲ့ နောက် နာမည်ကြီး အနုပညာရှင် နှစ်ဦးတို့ တီယန်နင်မင်း ရင်ပြင်မှာ အစာငတ်ခံ ဆန္ဒပြခဲ့ကြပါတယ်။ ဇွန်လ ၂ ရက်နေ့ကို အစာငတ်ခံ ဆန္ဒပြကြောင်း ကြေညာတဲ့နေ့အဖြစ် သတ်မှတ်ခဲ့ပြီး ၇၂ နာရီကြာ ဆန္ဒပြမယ်လို့ ပြောပါတယ်။ တရုတ်တော်လှန်ရေးကို တန်ပြန်တဲ့ ဆူပူအုံကြွမှုတွေကို အင်အားသုံး ဖြိုခွဲဖို့ ဆုံးဖြတ်ချက်ကို ကွန်မြူနစ်ပါတီ ခေါင်းဆောင် လူကြီးပိုင်းက လက်ခံ အတည်ပြုခဲ့ပါတယ်။
သွေးချောင်းစီးတဲ့ ည
ညနေပိုင်းမှာ တင့်ကားတွေ၊ သံချပ်ကာကားတွေနဲ့ စစ်သား အများအပြား ရောက်လာပြီး ပိုစတာတွေကို ဖယ်ရှားခဲ့ကြပါတယ်။ တပ်ဖွဲ့ဝင် တချို့က ကျည်ဆံအစစ်နဲ့ ပစ်ခတ်ခဲ့တဲ့အတွက် လက်နက်မကိုင်ထားတဲ့ အရပ်သား အတော်များများ သေဆုံးခဲ့ပါတယ်။ ဆန္ဒပြသူတွေကလည်း စစ်သားတချို့ကို ရန်ပြု တိုက်ခိုက်ခဲ့ကြပါတယ်။
ဒေါသနဲ့အတူ တုန်လှုပ် ထိတ်လန့်ခဲ့ကြ
သွေးထွက်သံယိုမှုတွေ ဖြစ်ခဲ့အပြီး တီယန်နင်မင် ရင်ပြင်ကို ရှင်းလင်း သန့်စင်ခဲ့ပါတယ်။ ဘေဂျင်းမြို့မှာ သေနတ်သံတွေကို တနေ့လုံး ကြိုကြားကြိုကြား ကြားနေရဆဲပါ။ ဒီဖြစ်ရပ် အကြောင်းနဲ့ ပတ်သက်တဲ့ မှတ်တမ်းတွေကို ထုတ်ပြန်ပေးဖို့ တရုတ်အစိုးရက ငြင်းဆိုထားတဲ့အတွက် အဲဒီတုန်းက လူဘယ်နှစ်ယောက် သေဆုံးခဲ့သလဲ ဆိုတာကို ဒီကနေ့အထိ အတိအကျ မသိနိုင်ဘဲ ရှိနေဆဲပါ။ ဟောင်ကောင်နဲ့ မကာအို အပါအဝင် မြို့ကြီး အတော်များများမှာ စည်းလုံးညီညွတ်ကြောင်း ပြသတဲ့ လူထုဆန္ဒပြမှုတွေ ပေါ်ပေါက်ခဲ့ပါတယ်။
လူအစုလိုက် အပြုံလိုက် ထွက်ပြေးခိုလှုံ
တရုတ်အစိုးရက ကျောင်းသားခေါင်းဆောင် ၂၁ ဦးကို အလိုရှိသူများ စာရင်းထဲ ထည့်ကြေညာလိုက်ပါတယ်။ ငှက်ဝါ လှုပ်ရှားမှုလို့ သိကြတဲ့ ဟောင်ကောင်က အထူး ကယ်ဆယ်ရေး လှုပ်ရှားမှုရဲ့ အကူအညီနဲ့ ကျောင်းသားခေါင်းဆောင် အတော်များများ ပြည်ပကို ထွက်ပြေး ခိုလှုံခဲ့ကြပါတယ်။
