ကင်ဂျုံအန် ဘာကြောင့် နိုင်ငံခြားရုပ်ရှင်တွေ ဂျင်းတွေ ဗန်းစကားတွေကို တားဆီးပိတ်ပင်နေတာလဲ
ပြည်ပလွှမ်းမိုးမှုတွေပါတဲ့ နိုင်ငံခြားရုပ်ရှင်တွေ၊ နိုင်ငံခြားက အဝတ်အ စားတွေနဲ့ နိုင်ငံခြားဘာသာဗန်းစကားတွေအသုံးပြုတာတွေကို ပြင်းပြင်း ထန်ထန် တားဆီးအရေးယူမယ့် ဥပဒေအသစ်တစ်ရပ်ကို မြောက်ကိုရီးယားမှာ မကြာခင်က ထုတ်ပြန်လိုက်ပါတယ်။ဒီဥပဒေကို ဘာကြောင့် ထုတ်ပြန် ရတာပါလဲ။
တောင်ကိုရီးယားဇာတ်ကားကို လက်ထဲမှာမိလို့ လူတစ်ယောက်ကို ဖမ်းပြီး ကွပ်မျက်လိုက်တာကို သူအ သက်၁၁နှစ်မှာ ယွန်မီဆို ပထမဆုံး တွေ့ခဲ့ရပါတယ်။
အဲ့ဒီလူ လုပ်ကြံခံရတာကို မဖြစ်မနေလာကြည့်ကြဖို့ အိမ်နီးနားချင်းအားလုံးကို မြောက်ကိုရီးယား အာဏာပိုင်တွေက အမိန့်ပေးခိုင်းစေခဲ့ပါတယ်။
သူတို့ခိုင်းတဲ့အတိုင်း သွားမကြည့်ရင် နိုင်ငံတော်သစ္စာဖောက်မှုနဲ့ စွပ်စွဲခံရမှာ လို့ ဆိုးလ်မြို့မှာရှိတဲ့ သူ့အိမ်ကနေ ဘီဘီစီကိုပြောပြခဲ့ပါတယ်။
ဒီလိုလုပ်ရတဲ့ရည်ရွယ်ချက်က တရားမဝင်ဗီဒီယိုတွေ ခိုးသွင်းလာတဲ့ ဘယ်သူမဆို သေဒဏ်ခံရနိုင်တယ်လို့ မြောက်ကိုရီးယားပြည်သူအားလုံးကို အာဏာပိုင်တွေက သေသေချာချာ သိစေချင်တာဖြစ်ပါတယ်။
"မျက်နှာကို အဝတ်စည်းခံထားရပြီး မျက်ရည်တွေစီးကျနေတဲ့ လူတစ်ယောက်ကို ကျွန်မ ဦးနှောက်ထဲမှာ အခုထိ သေသေချာချာ မှတ်မိနေပါသေးတယ်။ သူ့မျက်နှာကို စည်းထားတဲ့ အဝတ်မှာလည်း မျက်ရည်တွေ စိုရွှဲနေ တယ်။ သူ့ကို သတ်မယ့်နေရာကို ခေါ်သွားပြီး ပစ်သတ်လိုက်ကြတာပါ။ "
လက်နက်မဲ့ စစ်ပွဲ
တိုင်းပြည်ခေါင်းဆောင်တွေ ပြောစေချင်တာတွေပဲ လွှင့်တဲ့ အစိုးရပိုင် ရုပ်မြင်သံကြားလိုင်း တချို့ ၊ လူမှုကွန်ရက်ဆိုရှယ်မီဒီယာတွေ မရှိ၊ အင်တာနက်လည်း လုံးဝမရှိဘဲ ပိတ်လှောင်ခံထားရတဲ့ တိုင်းပြည်တစ်ခုအကြောင်းကို ပြောမယ်ဆိုရင် အဲ့ဒီတိုင်းပြည်က မြောက်ကိုရီးယား ဖြစ်ပါတယ်။
ပြီးတော့ မြောက်ကိုရီးယားခေါင်းဆောင် ကင်ဂျုံအန်က အဲ့လို ပိတ်ပင်ထားတာနဲ့တင် မကျေနပ်နိုင်သေးဘဲ ပိုမိုတင်းကျပ်တဲ့ အထက်ပါ ဥပဒေအသစ်ကို ထုတ်ပြန်လိုက်ပါတယ်။
ဒီဥပဒေအရ တောင်ကိုရီးယား၊ အမေရိကန်နဲ့ ဂျပန်နိုင်ငံတွေက ရုပ်ရှင်တွေနဲ့ အတူမိတဲ့ ဘယ်သူမဆို သေဒဏ်ကျခံရနိုင်သလို ကြည့်တဲ့ သူတွေကလည်း ထောင် ၁၅ နှစ်ထိ ပြစ်ဒဏ် ကျခံရနိုင်ပါတယ်။
နိုင်ငံခြားရုပ်ရှင် ကြည့်တာတွေကို ပိတ်ပင်တာတင်မက အခြားဟာတွေလည်း ရှိပါသေးတယ်။
လူငယ်တွေကြားမှာ ရှိနေတဲ့ မသတီစရာ၊တစ်ကိုယ်ကောင်းဆန်တဲ့ ဆိုရှယ်လစ်စနစ်ကို ဆန့်ကျင်တဲ့ အရာတွေကို တိုက်ထုတ်ပစ်ကြဖို့ မြောက်ကိုရီးယား လူ ငယ် အဖွဲ့ကို ကင်ဂျုံအန်က မကြာသေးခင်ကမှ တိုက်တွန်းတောင်းဆိုထားတာလည်း ရှိပါသေးတယ်။
တိုင်းတစ်ပါးက ပြောတာတွေ ဆံပင်ပုံစံတွေနဲ့ အဝတ်အစားတွေဟာ သူပြောခဲ့တဲ့ ကြောက်စရာကောင်းတဲ့ အဆိပ်တွေလို့ ရည်ညွှန်းချင်ပုံရပါတယ်။
တောင်ကိုရီးယား အဆိုတော် K-pop တွေရဲ့ ပုံစံအတိုင်း အတုခိုးပြီး ဆံပင်ညှပ် ခြေမျက်စိအပေါ်အနားလုံးချုပ် ဘောင်းဘီဝတ်ထားတဲ့ မြောက်ကိုရီးယား ဆယ်ကျော်သက် လူငယ် ၃ယောက်ကို ပြုပြင်ထိန်းသိမ်းရေးစခန်းကို ပို့ခံရတယ်လို့ တောင်ကိုရီးယားအခြေစိုက် The Daily NK အွန်လိုင်းသတင်းဌာနက ဖေါ်ပြခဲ့ပါတယ်။
ဒါပေမယ့် ဒီသတင်းကို ဘီဘီစီအနေနဲ့ သီးခြားအတည်မပြုနိုင်ပါဘူး။
ဒါတွေအားလုံးက ကင်ဂျုံအန် ဆင်နွှဲ နေတဲ့ နျုကလီးယားလက်နက်တွေ ဒုံးကျည်တွေ မပါတဲ့ နောက်ထပ် စစ်ပွဲတစ်ခုလို့ ပြောနိုင်ပါတယ်။
တိုင်းပြည်ထဲမှာရှိနေတဲ့ လူတွေရဲ့ ရပ်တည်ရေး ဘဝက ပိုပိုကျပ်တည်းလာနေတဲ့ အလားတူ တစ်ဖက်မှာလဲ ခေါင်းဆောင်ကြီးကင်ဂျုံအန်ကလည်း ပြည်ပကလာတဲ့ သတင်းတွေ လူထုဆီမရောက်အောင် ကြိုးစားတားဆီးနေတယ် လို့ ကျွမ်းကျင်သူတွေက ပြောနေကြပါတယ်။
အခုဆို မြောက်ကိုရီးယား ပြည်သူ သန်းနဲ့ချီပြီး အငတ်ဘေးနဲ့ ရင်ဆိုင်ရမယ့် အခြေအနေကြုံလာနိုင်တယ်လို့ ယူဆရပါတယ်။ဒါပေမယ့် လူတွေကြုံရမယ့် အငတ်ဘေးကို ဖြေရှင်းရမှာထက် အိမ်နီးနားချင်း တောင်ကိုရီးယားက ရုပ်ရှင်တွေ သူ့တိုင်းပြည်ထဲ မရောက်လာဖို့က သူ့အတွက်ပို အရေးကြီးနေပုံရပါတယ်။
အခုဆိုရင် မြောက်ကိုရီးယားဟာ ကိုဗစ်၁၉ရောဂါကို ကာကွယ်တားဆီးတဲ့အနေနဲ့ ပြီးခဲ့တဲ့နှစ်က နယ်စပ်ကို ပိတ်ပင်တာတွေလုပ်ပြီး နောက်ပိုင်း တိုင်းပြည် အပြင်ဘက်က အခြားကမ္ဘာနဲ့ ဆက်စပ်မှုတွေကို ပိုမို ပိတ်ပင်တားဆီးတာတွေလုပ်ဖို့ ဖြစ်လာနေပါတယ်။
အရေးကြီးတဲ့ အထောက်အပံ့ပစ္စည်းတွေ တင်သွင်းနေတဲ့ တရုတ်ပြည်နဲ့ ကုန်သွယ်ရေးကလည်း မြေပြင်အခြေအနေမှာ ရပ်တန့်လုနီးပါးဖြစ်နေပါတယ်။
တစ်ချို့ ပို့ကုန်ပစ္စည်းတွေစပြီး တင်သွင်းတာတွေ ရှိလာနေပေမဲ့လည်း ပြည်ပက ကုန်ပစ္စည်းတင်သွင်းမှုကိုလည်း အကန့်အသတ်နဲ့ ပိတ်ပင်ထားဆဲ ဖြစ်ပါတယ်။
ဒီလို တိုင်းပြည်ထဲကို ကုန်ပစ္စည်းတင်သွင်းမှု ကြပ်မတ်လိုက်တဲ့ ကိစ္စဟာ မြောက်ကိုရီးယား အာဏာရှင်ရဲ့ နျုကလီးယား ရည်မှန်းချက်တွေကြောင့် ငွေတွေ ဖြုန်းတီးသလိုဖြစ်နေတဲ့ တိုင်းပြည်ရဲ့ စီးပွားရေးအခြေအနေကို ပိုမို ဆိုးရွားလာစေပါတယ်။
ဒါပေမယ့် သူ့ပြည်သူတွေ ရင်ဆိုင်နေရတဲ့ အဆိုးရွားဆုံးအခြေအနေကို ကျော်ဖြတ်နိုင်အောင် လုပ်ဆောင်ရမယ်လို့ ဒီနှစ်အစောပိုင်းတုန်းက ကင်ဂျုံအန်းက ကတိပေးပြောကြားထားပါတယ်။
ဥပဒေသစ်က ဘာတွေပြဌာန်းထားတာလဲ
မြောက်ကိုရီးယားက ထုတ်ပြန်လိုက်တဲ့ ဥပဒေသစ်ထုတ်ပြန်ချက်ကို ပထမဆုံး ရလိုက်တာက The Daily NK ဖြစ်ပါတယ်။
"ကြေညာချက်ထဲမှာ ဖေါ်ပြထားတာက စက်ရုံတစ်ရုံမှာ အလုပ်သမားကိုမိရင် စက်ရုံမှူးကို အရေးယူမယ်။ ကလေးတစ်ယောက်ယောက် ကျုးလွန်လို့ မိရင် မိဘကို အရေးယူမယ်လို့ ရေးထားပါတယ်။ဒီဥပဒေရဲ့ ရည်ရွယ်ချက်က အချင်းချင်း မဖြစ်မနေ စောင့်ကြည့်ကြအောင် လုပ်ထားတဲ့ပါ" လို့ မြောက်ကိုရီးယားက ရတဲ့ သတင်းအချက်အလက်တွေကို အွန်လိုင်းကနေ ဖြန့်ဝေပေးနေတဲ့ The Daily NK ရဲ့ အယ်ဒီတာချုပ် လီဆန်ယွန်က ဘီဘီစီကို ပြောပါတယ်။
"တောင်ကိုရီးဘက်က အခြေအနေတွေကိုကြည့်ပြီး အားကျကြိုးစားချင်နေတဲ့ လူငယ် မျိုးဆက်တွေကို ပိတ်ပင်ဖို့ ရည်ရွယ်တာ။ ပြီးတော့ ကြေညာချက်ထဲမှာ အခြားတိုင်းပြည်တွေရဲ့ ယဥ်ကျေးမှုလွှမ်းမိုးလာတာတွေကို ကာကွယ်တားဆီး ရမယ်ဆိုတာကိုလည်း ထည့်ထားပါ တယ်"လို့ သူကပြောပါသေးတယ်။
"လူတွေ ပိုကျပ်တည်း ပိုဒုက္ခရောက်အောင် ပြင်းထန်တဲ့ ထုတ်ပြန် အရေးယူမှု တွေဖြစ်လာအောင် လုပ်တာ။ ခင်ဗျား ဗိုက်ပြည့်နေရင် တောင်ကိုရီးယား ရုပ်ရှင်လေးကြည့်ပြီး ဇိမ်ခံရင် ဇိမ်ခံ နေမှာလေ။ ဒါပေမယ့် ခင်ဗျားမှာ စားစရာမရှိရင် အကျပ်အတည်းတွေ တွေ့မယ် ဒေါသတွေထွက်ပြီး အဲ့ဒါတွေလည်း ကြည့်နိုင်တော့မှမဟုတ်ဘူး"လို့ မနှစ်ကမှ မြောက် ကိုရီးယားက ထွက်ပြေးလာတဲ့ Choi Jong-hoon ချိုဂျွန်ဟွန်းက လည်း ဒီဥပဒေသစ်နဲ့ ပတ်သက်လို့သူ့ အမြင်ကိုပြောပါတယ်။
အလုပ်ကော ဖြစ်ပါ့မလား
ပြီးခဲ့တဲ့ ကာလတွေတုန်းက နှိမ်နင်းမှုတွေက တရုတ်နယ်စပ်ကနေ တရားမဝင်ဝင်လာတဲ့ ရုပ်ရှင်တွေကို ဖြန့်ချိပြီး ကြည့်နေကြခဲ့ကြတဲ့ ကြံရည်ဖန်ရည်ရှိတဲ့သူတွေ ဘယ်လောက်ရှိနေတယ်ဆိုတာ သိနိုင်ပါတယ်။
ရုပ်ရှင်တွေကို USB စတစ်တွေထဲထည့် ဖွင့်ကြည့်ရင် မတွေ့အောင် အပေါ်က တစ်ခုခု နဲ့ဖုံး၊ password စကားဝှက်တွေခံထားပြီး ပြီးခဲ့တဲ့နှစ်တွေအတွင်း ပုံမှန်ခိုး သွင်းနေ ကြတာလို့ မစ္စတာချို အပြောအရ သိရပါတယ်။
"ပတ်စ်ဝါ့ဒ်ကို ၃ကြိမ်မှားရိုက်မိရင် USB က အထဲကဟာတွေကို ဖျက်ပစ်လိုက်တယ်။ ပတ်စ်ဝါ့ဒ်ကို တစ်ကြိမ်မှားရိုက်မိတယ်ဆိုရင်တောင် အထဲမှာရှိတဲ့ဟာတွေက စပြီး လှုပ်လှုပ်ရှားရှားဖြစ်နေပြီ။
ပြီးတော့ သတ်မှတ်ထားတဲ့ ကွန်ပျုတာမှာပဲ ယူအက်စ်ဘီနဲ့ တစ်ကြိမ်ပဲ ကြည့်လို့ရပြီး အခြားသူ တွေကို ပေးဖို့အတွက်လည်း USB ကနေ အခြားပစ္စည်းတစ်ခုခုထဲကို ထည့်လို့မရဘူး။ အဲ့ဒါကြောင့် အဲ့ဒါကိုဖြန့်ချင်တယ်ဆိုရင်တောင် ဖြန့်လို့မရဘူး။"
သူ့ရပ်ကွက်ထဲမှာ စွန့်စွန့်စားစား ရုပ်ရှင်ခိုးကြည့်ခဲ့ရတဲ့ အတွေ့အကြုံကိုလည်း မီဆိုက အမှတ်ရနေပါသေးတယ်။
ကားဘက်ထရီတစ်လုံးကို ငှား မီးစက်တစ်လုံးနဲ့ချိတ်ပြီး သူတို့ ရုပ်ရှင်ကြည့်ခဲ့ရတာပါ။ အဲ့ဒီတုန်းက သူကြည့်ခဲ့ရတဲ့ တောင်ကိုရီးယားရုပ်ရှင်နာမည်က "Stairway to Heaven" နိဗ္ဗာန် ဘုံ လှေကား အကြောင်းကို လည်း သူ သတိရနေပါသေးတယ်။မိထွေးနဲ့ ရန်ဖြစ်ပြီး ကင်ဆာရောဂါဝေဒနာ ခံစားရတဲ့ မိန်းကလေးတစ်ယောက် ဇာတ်လမ်းကို ရိုက်ထားတဲ့ ဒီရုပ်ရှင် လွန်ခဲ့တဲ့ နှစ်၂၀ကျော်တုန်းက မြောက်ကိုရီးယားမှာ လူကြိုက်များခဲ့ပါသေးတယ်။
တရုတ်ကဝင်တဲ့ စျေးပေါတဲ့ စီဒီတွေနဲ့ ဒီဗီဒီတွေက တစ်ဆင့် နိုင်ငံခြားရုပ်ရှင်တွေကို စွဲလန်းခဲ့ကြတာလို့ မစ္စတာချိုကလည်း ပြောပါတယ်။
စဖမ်းတဲ့အချိန်
နောက်ပိုင်းမှာတော့ မြောက်ကိုရီးယား အစိုးရက အဲ့ဒီကိစ္စကို သတိထားမိလာပါတယ်။ ၂၀၀၂ပတ်ဝန်းကျင်က တက္ကသိုလ်တစ်ခုကို အစိုးရတပ်ဖွဲ့တွေ ဝင်ရောက်စီးနင်းပြီး စီဒီချပ် နှစ်သောင်း ကျော်ကို ရှာဖွေသိမ်းဆီးခဲ့တာ ကို သူမှတ်မိနေပါသေးတယ်။
"ဒါက တက္ကသိုလ်တစ်ခုတည်းမှာပဲ ရှာ သိမ်းလို့ရခဲ့တာ။ တစ်နိုင်ငံလုံးမှာ ဆိုရင် ဘယ်လောက်ရှိ မလဲဆိုတာ တွေးသာကြည့်လိုက်ပေါ့ ဗျာ။ ဒါကြောင့် အစိုးရက လန့်သွားပြီး အရေးယူမှုတွေ ပိုတင်းကျပ်ဖို့ လုပ်လာတာပါ။"
၂၀၀၉ခုနှစ်မှာ တရားမဝင် ဗီဒီယိုတွေကို မျှဝေမှုနဲ့ ကင်ဂွမ်ဟုခ်တစ်ယောက် အထူးတပ်ဖွဲ့ရဲ့ အဖမ်းခံခဲ့ရတုန်းကဆို သူ့ အသက်က ၁၆နှစ်သာ ရှိပါသေးတယ်။ ဒီဗီဒီယိုတွေ ဖြန့်ဝေမှုနဲ့ ဆက်စပ်သူအားလုံး အဖမ်းခံခဲ့ရပါတယ်။
တောင်ကိုရီးယား ပေါ့သီချင်း ဒီဗီဒီတွေကို သူ့အဖေက တရုတ်ပြည်ဘက်က ခိုးသွင်းလာတာဖြစ်ပြီး သူက သူ့ငယ်ချင်းတစ်ယောက်ကို ဒီဗီဒီတစ်ချို့ပေးခဲ့မိလို့ အဖမ်းခံခဲ့ရတာပါ။
ဓာတ်ပုံ ရင်းမြစ်, SBS
သူ့ကို အရွယ်ရောက်ပြီးသား လူကြီးတစ်ယောက်ကို စစ်သလို လျို့ဝှက်စစ်ကြောရေး စခန်းတစ်ခုမှာ စစ်ဆေးခဲ့ပြီး အိပ်ခွင့်လည်းမရခဲ့သလို ထိုးကြိတ် ကန်ကျောက်တာတွေ လေးရက် ဆက်တိုက် ခံခဲ့ရပါတယ်။
"အရမ်းလန့်ခဲ့ရသလို ကျွန်တော့်ဘဝကြီးကတော့ ပြီးသွားပြီလို့တောင် တွေးခဲ့မိတယ်။ ဒီဗီဒီယို ဘယ်လိုရလဲ လူဘယ်နှစ်ယောက်ကိုပြခဲ့သလဲဆိုတာ သူတို့က မေးကြတယ်။ တရုတ်ပြည်ဘက်ကနေ အဖေ ယူလာတယ်ဆိုတာကိုတော့ ကျွန်တော် ထုတ်မပြောဘူး။ ပြောလိုက်ရင် ကျွန်တော့်အဖေ ဒုက္ခရောက်သွားမှာပေါ့။ ကျွန်တော်ဘာမှ မသိဘူး လွှတ်ပေးပါလို့ပဲ ပြောခဲ့တာ။"
ဒါပေမယ့် ဂွမ်ဟုခ်ဟာ ပြုံယမ်းမှာနေတဲ့ အထက်တန်းလွှာမိသားစု ဝင်တစ်ယောက်ဖြစ်လို့ သူလွှတ်အောင် သူ့ အဖေက လုံခြုံရေးတပ်ဖွဲ့ကို လာဘ်ထိုးခဲ့ရပါတယ်။ ဒါပေမယ့် ကင်ဂျုံအန် အခုထုတ်လိုက်တဲ့ ဥပဒေအသစ်အောက်မှာဆိုရင် တော့ ဒီလိုမျိုးလွတ်ဖို့က မဖြစ်နိုင်ပါဘူး။
အဲ့ဒီအချိန်တုန်းက သူ့လိုမျိုးအမှုနဲ့ အဖမ်းခံရတဲ့ လူအများစုကတော့ အလုပ်စခန်းတွေကို ပို့ခံကြရ ပါတယ်။ အပြစ်မရှိကြောင်း သေသေချာချာ မပြနိုင်တဲ့လူတွေကိုလည်း ထောင်နှစ်တိုးချတာတွေ လုပ်ခဲ့ပါတယ်။
"အဖမ်းခံရတဲ့လူတွေဟာ ပထမဆုံးအနေနဲ့ အလုပ်ကြမ်းစခန်းမှာ တစ်နှစ်နီးပါး နေကြရပြီး နောက်ပိုင်းမှာ ၃နှစ် ထပ်တိုးတဲ့ အပြစ်ဒဏ်တွေလည်း ရခဲ့ကြပါတယ်။
အခုဆို အလုပ်ကြမ်းစခန်းမှာ ရောက်နေတဲ့ လူငယ် ၅၀ ရာခိုင်နှုန်းကျော်က နိုင်ငံခြား မီဒီယာတွေကိုကြည့်လို့ ရောက်နေတာ။ တရားမဝင်ရုပ်ရှင် ၂နာရီလောက်ကြည့်မိရင် အလုပ်ကြမ်းစခန်းမှာ ၃နှစ်နေရတာကတော့ တကယ့် ပြဿနာကြီး ပေါ့ဗျာ"လို့ မစ္စတာချိုက ထပ်ပြောပါတယ်။
စုံစမ်းမိရသလောက် သတင်းတွေအရလည်း မြောက်ကိုရီးယားက တချို့ အကျဥ်းစခန်း တွေကိုလည်း မနှစ်တုန်းကတည်းက ထပ်ချဲ့ထားတယ်လို့ သိရပါတယ်။ အဲ့ဒါက ဥပဒေသစ် ထုတ်ပြန်မှုနဲ့ တိုက်ရိုက်ဆက်စပ်တယ်လို့ မစ္စတာချိုက ပြောပါတယ်။
"ရုပ်ရှင်တစ်ကားကြည့်တာက ဇိမ်ခံတဲ့ကိစ္စပါ။ ဒါပေမယ့် မိသားစုဝင်ထဲကတစ်ယောက်ယောက် အလုပ်ကြမ်းစခန်းပို့ ခံရရင်တော့ စားဖို့ကိစ္စတောင်ခက်လာပါလိမ့်မယ်။"
လူတွေဘာလို့ ဆက်လုပ်နေကြတာလဲ
"ဒီရုပ်ရှင်တွေကို ကြည့်ဖို့ အကြိမ်များစွာကြိုးစားခဲ့ကြတယ်။ ဘယ်သူက မှကျွန်တော်တို့ရဲ့ ကြည့် ချင်တဲ့ စိတ်ကို တားလို့မရပါဘူး။ ကျွန်တော်တို့ နိုင်ငံအပြင်ဘက်မှာ ဘာတွေဖြစ်နေလဲဆိုတာ ကျွန် တော်တို့သိချင်တယ်" လို့ ဂွမ်ဟုခ်က ပြောပြပါတယ်။
နောက်ဆုံးမှာတော့ သူ့ တိုင်းပြည်ရဲ့ အခြေအနေအမှန်ကို ဂွမ်ဟုက်ခ်တစ်ယောက် အပြင်ကနေ လေ့လာခွင့်ရခဲ့ပါတယ်။ သူ့ကို မြောက်ကိုရီးယားနိုင်ငံကနေ တရုတ်ပြည်ကို လေ့လာသင်ယူဖို့ စေလွှတ်ခံရပြီးနောက် အင်တာနက် ဆိုတာကြီးနဲ့ သူထိတွေ့ခွင့်ရခဲ့ပါတယ်။
"မြောက်ကိုရီးယားနိုင်ငံနဲ့ ပတ်သက်ပြီး သရုပ်ဖော်ရေးသားချက်တွေကိုတွေ့ရတော့ ပထပိုင်းမှာဆို ယုံတောင်မယုံနိုင်ခဲ့ဘူး။ အနောက်ကလူတွေက လိမ်နေတာ၊ ဝစ်ကီပီးဒီးယားက လိမ်နေတာလို့ ထင်ခဲ့မိတာ။ အခုဆို ကျွန်တော့်နှလုံးသားနဲ့ ကျွန်တော့်ဦးနှောက်က ကွဲကွဲပြားပြားဖြစ်သွားပြီ။ မြောက်ကိုရီးယားအကြောင်း မှတ်တမ်းရုပ်ရှင်တွေအများကြီးကြည့်ပြီးသလို စာအုပ် မှတ်တမ်း တွေကိုလည်း အများကြီးဖတ်ပြီးခဲ့ပါပြီ။ ဒါကြောင့် သူတို့ပြောတာတွေက ယုတ္တိရှိ တဲ့အတွက် အမှန်တွေဖြစ်နိုင်တယ်ဆိုတာလည်း ကျွန်တော်သဘောပေါက်နေပါပြီ။
ဓာတ်ပုံ ရင်းမြစ်, COLLAGE
"ကျွန်တော့် ဦးနှောက်ထဲမှာ ဖြစ်နေတဲ့ ပြောင်းလဲမှုကိုသဘောပေါက်လာခဲ့ပေမယ့် နောက်ပြန်လှည့်ဖို့ကတော့ မဖြစ်နိုင်တော့ပါဘူး။အရမ်းနောက်ကျသွားပါပြီ။"
နောက်ပိုင်းမှာတော့ ဂွမ်ဟုက်ခ်တစ်ယောက် ဆိုးလ်မြို့ကို ထွက်ပြေးလာခဲ့ပါတယ်။
မီဆိုကလည်း သူ့ရဲ့ အိပ်မက်က ဖက်ရှင်အကြံပေးတစ်ယောက်ဖြစ်ဖို့ ကြိုးစားနေပါတယ်။ တောင်ကိုရီးယားနိုင်ငံရောက်တဲ့ အချိန်မှာ သူပထမဆုံးလုပ်ခဲ့တာက သူကြည့်ခဲ့ တဲ့ Stairway to Heavenရုပ်ရှင်ထဲက နေရာတွေကို သွားလည်ခဲ့တာပါ။
ဒါပေမယ့် သူတို့မျိုးဇတ်လမ်းတွေက တကယ့်ကို ရှားရှားပါးပါးပါ။
နယ်စပ်ကို တင်းတင်းကြပ်ကြပ် ထိန်းချုပ်ထားတဲ့ မြောက်ကိုရီးယား နိုင်ငံကနေ ထွက်လာနိုင် ဖို့ဆိုတာကလည်း မဖြစ်နိုင်သလောက် ခက်ခဲပြီး ထွက်ပြေးဖို့လုပ်တဲ့လူတွေကိုလည်း ပစ်သတ်ဖို့ အမိန့်ပေးထားပါတယ်။ပြီးတော့ ကင်ဂျုံအွန်ရဲ့ ဥပဒေသစ်ကလည်း ဘယ်လောက်တင်းတင်းကြပ်ကြပ် လက်တွေ့အကောင်အထည်ဖေါ်မယ်ဆိုတာလည်း ခန့်မှန်းဖို့ခက်ပါတယ်။
ရုပ်ရှင်ကားလေး တစ်ကား နှစ်ကားကြည့်ရုံလောက် နှစ် ဆယ်နှစ်ချီ လူတွေရဲ့ စိတ်ကိုထိန်းချုပ်လွှမ်းမိုးထားတဲ့ အတွေးအခေါ်တွေကို ပြောင်းနိုင်မှာမဟုတ်ဘူးလို့ မိသားစုကို မြောက်ကိုရီးယားမှာ ချန်ထားရစ်ခဲ့ရတဲ့ မစ္စတာချိုကလည်းယုံကြည်ထားပါတယ်။
ဒါပေမယ့် အစိုးရကလုပ်တဲ့ ဝါဒဖြန့်ချီရေးက အမှန်တွေ မဟုတ်ဘူးဆိုတာကိုတော့ မြောက်ကိုရီးယားတွေ သံသယရှိနေကြတယ်လို့ သူထင်နေပါတယ်။
"မြောက်ကိုရီးယား လူထုရဲ့ နှလုံးသားထဲမှာ မကျေနပ်ချက် နာကြည်းချက်တွေကတော့ ရှိနေမှာပါ။ ဒါပေမယ့် သူတို့မကျေနပ်ချက်ကို ဘယ်လို အကောင်အထည်ဖေါ်ရမယ် ဆိုတာကျတော့ မသိကြဘူး။ ဦးတည်ချက်မရှိတဲ့ ဘာလုပ်ရမှန်းမသိတဲ့ မကျေနပ်ချက် တစ်ခုပေါ့ဗျာ။ အဲ့ဒါကြောင့် တစ်စုံတစ်ယောက် သူတို့ကိုလှုပ်နှိုးဖို့ လိုသလို လမ်းပြပေးဖို့လည်းလိုပါ တယ်။"လို့ မစ္စတာချိုကပြောခဲ့ပါတယ်။
