အိန္ဒိယနဲ့ ဂျာမနီ သံတမန်ရေး အားပြိုင်ပွဲ ဖြစ်လာတဲ့ ကလေးငယ်

သူကလေးက အိန္ဒိယ အစားအစာတွေကို ကြိုက်ပုံရပါတယ်။ သူ့မိဘတွေ ရှယ်ထားတဲ့ ဗီဒီယိုတွေထဲမှာတော့ အားလုံး ပြုံးပျော်နေကြပါတယ်။

ဒါပေမယ့် ဒီ"ဘေဘီအမ်"လို့ ခေါ်တဲ့ ကလေးငယ်ဟာ ဂျာမနီနိုင်ငံ ဘာလင်မြို့အနီးမှာ ရှိတဲ့ အထူးပြုစုစောင့်ရှောက်ရေး စင်တာမှာရောက်နေပြီလို့ သူ့မိခင်က ပြောပါတယ်။

တကယ်တော့ ဒီကလေးငယ်ဟာ အိန္ဒိယနဲ့ ဂျာမနီတို့ အကြား သံတမန်ရေး အားပြိုင်ပွဲ တခုရဲ့ အလယ်ဗဟိုမှာ ရောက်နေတာ ဖြစ်ပါတယ်။ ပြီးခဲ့တဲ့ ၂၀၂၁၊ သူ ၇ လသမီး အရွယ်မှာ သူ့မိဘတွေက ကလေးကို ကောင်းကောင်း မထားဘူးဆိုတဲ့ စွပ်စွဲချက်တွေနဲ့ သူ့ကို မိဘရင်ခွင်ထဲကနေ ဆွဲထုတ်သွားခဲ့ကြတာ ဖြစ်ပါတယ်။

ဒီနှစ် ဇွန်လထဲမှာတော့ ဘာလင်မြို့က တရားရုံးက သူ့မိဘတွေ ဖြစ်ကြတဲ့ ဒီယာနဲ့ ခင်ပွန်းသည် အမစ်တို့ရဲ့ မိဘအုပ်ထိန်းခွင့်ကို ရုပ်သိမ်းပစ်ခဲ့ပါတယ်။

အခု သုံးထားတဲ့ နာမည်တွေက ဥပဒေရေးအရ လွှဲပြောင်းသုံးစွဲထားတဲ့ နာမည်တွေ ဖြစ်ပါတယ်။

ကလေးကိုလည်း ဂျာမနီက ကလေးသူငယ် ပြုစုစောင့်ရှောက်ရေး ဌာနကို အုပ်ထိန်းခွင့် ပေးခဲ့ပါတယ်။ နောက်ပြီး ကလေးကို အိန္ဒိယကို ပြန်ပို့ပေးဖို့ မိဘတွေရဲ့ တောင်းဆိုမှုကိုလည်း တရားရုံးက ပယ်ချခဲ့ပါတယ်။ မိဘတွေကတော့ ဒီအမှုကိစ္စတွေဟာ လုပ်ဇာတ်တွေပါလို့ ဆိုကြပါတယ်။

ဒီယာက အခု အိန္ဒိယမှာ ရှိနေပါတယ်။ သူ့ ရင်သွေးကို ပြန်ခေါ်ယူနိုင်ဖို့ အကူအညီတွေ ရှာဖွေနေပါတယ်။ ဘီဘီစီနဲ့ တွေ့ဆုံတော့လည်း သူ့ သမီးလေးနဲ့ ခွဲရပုံတွေကို မျက်ရည်ကြားက ပြောပြခဲ့ပါတယ်။

ပြီးခဲ့တဲ့ ၂၀၁၈ က သူ့ခင်ပွန်း အမစ် ဘာလင်မှာ အလုပ်ရတာကြောင့် သူတို့ မိသားစု အဲဒီကို ပြောင်းရွှေ့ခဲ့ကြတာ ဖြစ်ပါတယ်။ ဘေဘီအမ်လေးကို ပြီးခဲ့တဲ့ ၂၀၂၁ ဖေဖော်ဝါရီလ ၂ ရက်နေ့မှာ မွေးဖွားခဲ့ပါတယ်။

တရားရုံးက မှတ်တမ်းတွေအရတော့ အခုလို ကလေးမိသားစုနဲ့ အာဏာပိုင်တွေအကြား ပြဿနာတွေ စခဲ့တာက ဘေဘီအမ်လေး ၇ လသမီး အရွယ်မှာ သူ့ရဲ့ လိင်အင်္ဂါမှာ ဒဏ်ရာ ရခဲ့တာကြောင့် ဖြစ်ပါတယ်။ ဆရာဝန်တဦးကဆို သူ့တသက်မှာ မွေးကင်းစ ကလေးတယောက်ရဲ့ လိင်အင်္ဂါမှာ အဲဒီလောက် ဆိုးရွားတဲ့ ဒဏ်ရာမျိုးရတာ မတွေ့ဖူးဘူးလို့ ပြောပါတယ်။ အဲဒီ ဒဏ်ရာတွေကို ခွဲစိတ်ကုသ ပြုပြင်ပေးခဲ့ရပါတယ်။

ကလေးသူငယ် ကာကွယ်စောင့်ရှောက်ရေး ဌာနက လိင်ပိုင်း အသုံးချ စော်ကားမှုတွေ ရှိနိုင်တယ်လို့ သံသယဝင်ပြီး ကလေးကို ခေါ်ယူသွားခဲ့ပါတယ်။ သူ့မိသားစုဘက်ကတော့ ဒီလို မဟုတ်ကြောင်း ငြင်းကြပါတယ်။

ဆေးရုံကလည်း နောက်ပိုင်းမှာ ဒီလိုကိစ္စမျိုး မဖြစ်နိုင်ကြောင်း ပြောခဲ့ပါတယ်။ ဆရာဝန်တွေက လိင်ပိုင်း ကျူးလွန်ထားတဲ့ လက္ခဏာမျိုး ဘာမှ မရှိတဲ့ အကြောင်း ရှင်းလင်းပေးခဲ့လို့ ရဲကလည်း ဘာမှ စွဲချက်မတင်တော့ဘဲ အမှုပိတ်ပေးခဲ့ပါတယ်။

သူ့မိဘတွေက ဒီဒဏ်ရာဟာ မတော်တဆ ရခဲ့တာ ဖြစ်တယ်လို့ ပြောပါတယ်။ အမေရိကန်ပြည်ထောင်စုနဲ့ အိန္ဒိယက သီးခြား ဆရာဝန် ၂ ယောက်ကလည်း ကလေးရဲ့ ဆေးမှတ်တမ်းတွေကို ကြည့်ပြီး ဆေးစစ်ချက် မှတ်တမ်းတွေကို လက်ခံခဲ့ကြပါတယ်။

ဒီဒဏ်ရာဟာ မတော်တဆမှုကြောင့် ရခဲ့တဲ့ ဖြစ်နိုင်ခြေ အတော်များပါတယ်။ ဘယ်မိဘကရော ကိုယ့်ရင်သွေးကို တမင်တကာ အကြိမ်ကြိမ် ဒဏ်ရာရအောင် လုပ်ပြီး ဆေးရုံကို ခေါ်သွားကြမှာလဲလို့ တရားရုံးကို တင်သွင်းခဲ့တဲ့ အစီရင်ခံစာထဲမှာ ဆိုထားကြပါတယ်။ နောက်ပြီး ဒဏ်ရာတွေကို စစ်စစ်ပေါက်ပေါက် ကြည့်ခဲ့ကြတဲ့အတွက် အခြေအနေတွေတောင် ပိုပြီး ဆိုးကောင်း ဆိုးသွားနိုင်ခဲ့တဲ့အကြောင်းလည်း ပြောထားပါတယ်။

ဒါပေမယ့် ကလေးသူငယ် ကာကွယ်စောင့်ရှောက်ရေး အာဏာပိုင်တွေကတော့ ဘေဘီအမ်ကို အိမ်မှာ ထားရင် လုံခြုံမှာမဟုတ်ဘူးလို့ ဆိုခဲ့ကြပြီး တရားရုံးကလည်း ဒါနဲ့ပတ်သက်လို့ လက်ခံခဲ့ပါတယ်။

အဲဒါကြောင့်ပဲ ကလေးဟာ အခုဆို ထိန်းသိမ်းစောင့်ရှောက်ရေး ဌာနမှာပဲ နေခဲ့ရတာ ၂ နှစ်နီးပါး ရှိလာပြီ ဖြစ်ပြီး မိဘတွေကလည်း သူတို့ ကလေးနဲ့ တွေ့ခွင့် သိပ်မရဘူးလို့ ပြောကြပါတယ်။

ကလေးနဲ့ သူ့မိသားစုကို ကြည့်ရှုဖို့ တာဝန်ပေးခံရတဲ့ လူမှုဝန်ထမ်းတွေကတော့ သူ့မိဘတွေဟာ သဘောမနော ကောင်းကြသူတွေ ဖြစ်တယ်၊ ကလေးကလည်း မိဘတွေနဲ့ဆို ပျော်ရွှင် ဆော့ကစား နေတတ်တယ်လို့ ဆိုကြပါတယ်။

တရားရုံးက ခန့်အပ်ထားတဲ့ စိတ်ပညာရှင် ကတော့ ဘေဘီအမ်ကို သူ့မိဘ တယောက်နဲ့ မိဘနဲ့ ကလေးတွေ တွေ့ဆုံဖို့ ထားတဲ့ နေရာမှာ သာနေစေပြီး ဝန်ထမ်းတဦးကနေ စောင့်ကြည့်ပေးဖို့ အကြံပြုခဲ့ပါတယ်။

ပြီးခဲ့တဲ့ သီတင်းပတ်အတွင်းကတော့ ကလေးသူငယ်အရေးရုံး Jugendamt က သူ့မိဘတွေကို ကလေးကို သူတို့နဲ့ တွေ့ဆုံဖို့ ခေါ်လာပေးမယ့် လူမရှိတာကြောင့် မိဘနဲ့ ကလေးတွေ့ဆုံရေး တွေကိုအကုန်လုံးကို ဖျက်သိမ်းထားကြောင်း ပြောခဲ့တယ်လို့ ဒီယာ ကပြောပါတယ်။ သူတို့မှာ ဗီဒီယိုကောလ်နဲ့တောင် ဆက်သွယ်ပြီး တွေ့ခွင့်မရတော့ဘူးလို့ ပြောပါတယ်။

မွေးစား အိမ်ကနေ ကလေးသူငယ် အထူးပြုစုမှု လိုတဲ့သူတွေကို ပြုစု စောင့်ရှောက်ပေးတဲ့ နေရာကို ပို့လိုက်ပြီး နောက်မှာ သူတို့ ကလေးကို ဘယ်သူတွေက ပြုစု စောင့်ရှောက်ပေးနေလဲ ဆိုတာလည်း မသိရဘူး၊ ကလေးနဲ့ ပတ်သက်ပြီး လျှို့ဝှက်မှုတွေက တော်တော် ကိုးရိုးကားရား နိုင်တယ်လို့ ပြောပါတယ်။

ဒီယာက ယဉ်ကျေးမှုခြင်း မတူညီတာနဲ့ နားလည်မှု လွဲတာတွေကြောင့် သူ့ဆီကနေ ကလေးကို လုယူသွားကြတယ်လို့ ဂျာမန် အာဏာပိုင်တွေကို စွပ်စွဲပါတယ်။ သူက ဂျာမန်စကား မပြောတတ်သလို သူ့ကို ပေးတဲ့ ဘာသာပြန်သူကလည်း ဟင်ဒီလိုပဲ တတ်ပြီး ဂူဂျာရတီ စကား မတတ်ဘူးလို့ ဆိုပါတယ်။ ဘီဘီစီက ကလေးသူငယ်အရေးရုံးကို ဒါနဲ့ ပတ်သက်လို့ ဆက်သွယ်ခဲ့ပေမယ့် အခုထက်ထိ အကြောင်းမပြန်သေးပါဘူး။

ဘေဘီအမ်ရဲ့ အမှုကိစ္စကို အိန္ဒိယမှာရော ဂျာမနီမှာပါ အတော် စိတ်ဝင်စားကြပါတယ်။ အိန္ဒိယက မြို့ကြီးတွေမှာ ဆန္ဒပြပွဲတွေ လုပ်ခဲ့ကြသလို ဖရန့်ခ်ဖတ်နဲ့ ဒမ်းစတတ်ဒ် တို့မှာလည်း အိန္ဒိယ နွယ်ဖွားတွေက မိဘတွေကို ထောက်ခံကြောင်း ဆန္ဒဖော်ထုတ်ခဲ့ကြပါတယ်။

ဒေလီမှာလည်း ဒီယာက အိန္ဒိယ ပြည်ပရေးရာ ဌာနက တာဝန်ရှိသူတွေနဲ့ တွေ့ဆုံခဲ့သလို သူတို့ ကို ထောက်ခံတဲ့ ပါလီမန် အမတ်တွေကလည်း ဂျာမန် သံအမတ်ကြီး ဖိလစ် အက်ကာမန်းဆီကို ကလေးကို အိန္ဒိယကို ပို့ပေးဖို့ တောင်းဆိုတဲ့ စာကိုရေးသား ပေးပို့ခဲ့ကြပါတယ်။

နောက်ပြီး ပါလီမန် အမတ် တဦးကလည်း ကလေးကို ပြန်ခေါ်နိုင်ဖို့ လိုအပ်သလို ဆောင်ရွက်ပေးဖို့ အိန္ဒိယ အစိုးရကို တောင်းဆိုထားပါတယ်။ နောက် နိုင်ငံရေး သမား တယောက်ကလည်း ဝန်ကြီးချုပ် နရင်ဒြာ မိုဒီကို ရှေ့လပိုင်းမှာ ဒေလီကို ဂျီ ၂၀ ထိပ်သီး ဆွေးနွေးပွဲ တက်ရောက်ဖို့ ဂျာမန် ဝန်ကြီးချုပ် အိုလပ်ဖ် ရှို့လ်ဇ် ရောက်လာတဲ့ အခါ ဒီကိစ္စကို ဆွေးနွေးဖို့ အတွက် တောင်းဆိုထားပါတယ်။

ဒီယာကတော့ သူ့မှာ မစ္စတာ မိုဒီကိုပဲ အားကိုးရတော့မယ်၊ သူ ဝင်ပြောပေးရင်တော့ သမီးလေး ပြန်လာလို့ ရမယ်လို့ ဆိုပြီး မစ္စတာ မိုဒီကို ကူညီပေးဖို့ တောင်းဆိုထားပါတယ်။

ဒီလို ဘေဘီအမ် အတွက် အငြင်းပွားကြတာကြောင့် လွန်ခဲ့တဲ့ ၂၀၁၁ က နော်ဝေးနိုင်ငံမှာ အိန္ဒိယကလေး ၂ ယောက်ကို ခေါ်သွားခဲ့တဲ့ ကိစ္စကို ပြန်အမှတ်ရစေပြန်ပါတယ်။ အဲဒီ ကလေးတွေကတော့ ၁ နှစ်လောက် ကြာပြီးနောက် အိန္ဒိယကို ပြန်ရောက်လာခဲ့ကြပါတယ်။

အဲဒီ နော်ဝေးက အိန္ဒိယ မိသားစုကို ကူညီပေးခဲ့တဲ့ ရှေ့နေနဲ့ တက်ကြွလှုပ်ရှားသူ ဆူရန်ယာ အိုင်ယာက အခု ဘေဘီအမ်ရဲ့ မိဘတွေကိုလည်း ကူညီပေးနေပါတယ်။ သူက ဒီလို အမှုတွေက ဖြစ်လေ့ဖြစ်ထ မရှိတဲ့ ဟာမျိုးတော့ မဟုတ်ပါဘူး။

ဘာမှ ဆက်ပြီး ဆွေးနွေးနေစရာ မလိုအောင် လက်ခံနိုင်တဲ့ အဖြေတခုပဲ လိုကြောင်း ပြောပါတယ်။

ကလေးသူငယ်အရေးရုံး Jugendamt ရဲ့ နယ်စပ်ဖြတ်ကျော် မိသားစုကြား အငြင်းပွားစရာ ကိစ္စတွေနဲ့ ပတ်သက်လို့လည်း ဥရောပ ပါလီမန်ရဲ့ ဝေဖန်ပြစ်တင် မှုတွေ ရှိပါတယ်။ ပြီးခဲ့တဲ့ ၂၀၁၈ အတွင်းက ဥရောပ ပါလီမန်က ဒီအဖွဲ့ဟာ လူမျိုးရေး ခွဲခြားတယ်၊ ရွှေ့ပြောင်း နေထိုင်သူတွေရဲ့ ကလေးတွေအပေါ် မျှမျှတတ မရှိဘူး၊ သူတို့ ခေါ်ယူသွားတဲ့ ကလေးတွေရော မိဘတွေရဲ့ အခွင့်အရေးတွေကိုပါ ထိခိုက်နစ်နာ စေတယ်လို့ စွပ်စွဲခဲ့ပါတယ်။

ပြီးခဲ့တဲ့ မေလအတွင်းက ထုတ်ပြန်ခဲ့တဲ့ ကြေညာချက်ထဲမှာလည်း အခုထက်ထိ သူတို့ရဲ့ လက်မှတ်ထိုး တောင်းဆိုမှု ရေးရာ ကော်မတီမှာ Jugendamt နဲ့ ပတ်သက်တဲ့ တိုင်ကြားမှုတွေ ရနေဆဲ ဖြစ်တယ်လို့ ပြောပါတယ်။ လူငယ်ရေးရာ ရုံးတွေရဲ့ ဆောင်ရွက်မှုတွေဟာ လိုအပ်တာထက် ပိုနေတယ်။ ပြည်ပက လာကြတဲ့ မိဘတွေဟာ ဂျာမန် မိဘတွေလောက် အခွင့်အရေး မရကြဘူးလို့ ခံစားကြရကြောင်း ဆိုပါတယ်။

ဒီလို ကိစ္စတွေအတွက် အကောင်းဆုံး အဖြေက နိုင်ငံတော်ကနေ အဲဒီလို မိသားစုတွေက ကလေးတွေကို ပြုစုစောင့်ရှောက်ပေးဖို့ လူမှုဝန်ထမ်းတွေ တာဝန်ချထားပေးတာပဲ ဖြစ်တယ်လို့ မစ္စ အိုင်ယာက ပြောပါတယ်။

ဘေဘီအမ်ရဲ့ ကိစ္စမှာတော့ အစိုးရက ဝင်ပါရမယ့် အဖြေတခုပဲ ရှိတယ်လို့ ဆိုပါတယ်။ ကလေးက ဘာမှ အမှားလုပ်ထားတာ မရှိဘူး။ ဆိုတော့ သူ့ကို အိန္ဒိယကို ပြန်ပို့ပေးပေါ့၊ သူက အိန္ဒိယ နိုင်ငံသားလည်း ဖြစ်တော့ ပြန်ဖို့ အခွင့်အရေးလည်း အပြည့်ရှိတယ်လို့ ပြောပါတယ်။

အိန္ဒိယ အစိုးရတော့ ဒီအမှုကိစ္စကို အရေးကြီးကိစ္စအဖြစ် ဆောင်ရွက်နေတယ်လို့ ပြောပါတယ်။ ပြည်ပရေးရာ ဝန်ကြီးဌာနရဲ့ ပြောရေးဆိုခွင့်ရှိသူ အရင်ဒမ် ဘဂ်ချီက ဒီလအစောပိုင်းက အိန္ဒိယရဲ့ စိုးရိမ်မှုတွေကို ဂျာမန် သံအမတ်ကြီးကို ဆင့်ခေါ်ပြောပြခဲ့ပြီး ဖြစ်တယ်လို့ ပြောခဲ့ပါတယ်။

ဒီကလေးရဲ့ ယဉ်ကျေးမှု အခွင့်အရေးနဲ့ လူ့ အခွင့်အရေးတွေ ထိပါးခံနေရတယ်လို့ ယူဆတဲ့အကြောင်း မစ္စတာ ဘဂ်ချီက သတင်းစာ ရှင်းလင်းပွဲမှာ ပြောကြားခဲ့ပါတယ်။ ဒီကလေးကို မြန်မြန် ပြန်ပို့ပေးဖို့ တောင်းဆိုခဲ့သလို ဒီကိစ္စနဲ့ပတ်သက်ပြီး ဂျာမနီအစိုးရကို အမြဲ သတိပေး တောင်းဆိုနေမှာ ဖြစ်ကြောင်း ပြောပါတယ်။

ဂျာမနီ သံရုံးက ပြောရေးဆိုခွင့် ရှိသူကတော့ ဒီကိစ္စနဲ့ ပတ်သက်ပြီး တစုံတရာ မှတ်ချက်ပေးဖို့ ငြင်းဆိုခဲ့ပါတယ်။ ဒါပေမယ့် ဂျာမနီက အစိုးရနဲ့ နီးစပ်တဲ့ သတင်းရင်းမြစ်တွေကတော့ ဒီအမှုက တရားရုံး ရောက်သွားပြီဆိုတော့ အစိုးရလက်ထဲမှာ မရှိကြောင်း၊ ဒါကြောင့် အိန္ဒိယနဲ့ အတူလက်တွဲပြီး အဖြေရှာဖို့ ကြိုးစားနေကြောင်း ပြောပါတယ်။

အိန္ဒိယ အာဏာပိုင်တွေကတော့ ဘေဘီအမ်ရဲ့ မိသားစုရှိတဲ့ နိုင်ငံအနောက်ပိုင်းက ဂူဂျာရတ် ပြည်နယ်ထဲမှာပဲ ကလေးကို မွေးစားပေးမယ့် မိသားစုကို တွေ့ရှိထားပြီ ဖြစ်တယ်လို့ ပြောပါတယ်။

အငြိမ်းစား ကလေး အထူးကုနဲ့ ဒေလီအစိုးရရဲ့ ကလေးသူငယ် ပြုစုစောင့်ရှောက်ရေး ဆိုင်ရာ ကော်မတီဝင်ဟောင်း ဒေါက်တာ ကီရန် အဂ်ဂါဝါးလ်ကလည်း ကလေးဟာ သူ့မိဘတွေနဲ့သာ အတူရှိသင့်တယ်လို့ ပြောပါတယ်။

အိန္ဒိယမှာ ကလေးသူငယ် ကာကွယ်ရေးနဲ့ ပတ်သက်ပြီး တင်းကြပ်တဲ့ ဥပဒေတွေ ရှိယတ်။ ဂျာမန် တရားရုံးက ပြန်ပို့ပေးမယ် ဆိုရင်လည်း ကလေးကို အိန္ဒိယမှာ ကောင်းကောင်း စောင့်ရှောက်ပေးနိုင်ပါတယ်လို့ ဆိုပါတယ်။

တနေကုန်သွားတိုင်း သူ့သမီးကို တဖြည်းဖြည်းချင်း ဆုံးရှုံးနေရသလို ခံစားမိတယ်လို့ ဒီယာက ပြောပါတယ်။

သူ့သမီးဟာ မိခင်ဘာသာ စကားဖြစ်တဲ့ ဂူဂျာရတ်တီဘာသာကိုလည်း မသိကြားနိုင်ဘူး။ ဂျာမန်တမျိုးပဲ ပြောတတ်တယ်၊ သူကိုယ်တိုင်တောင် သမီးဖြစ်သူနဲ့ ဘယ်လို စကားပြောရမှန်း မသိကြောင်း ပြောပါတယ်။

လတ်တလော သူတို့ မိသားစုဟာ မွေးစားမိသားစုနဲ့ အမှုကိစ္စ အတွက် ပေးဖို့ ရှိတဲ့ ဒေါ်လာ ၁၀၈,၄၇၇ ကို ပေးဖို့ အတော် ရုန်းကန်နေရပါတယ်။

အများရံပုံငွေထောင်ပြီး ငွေရှာတယ်၊ ရလာတာနဲ့ ရူပီးငွေ ၅ သန်းလောက် ပေးပြီး ပြီ ဖြစ်တယ်လို့ ဆိုပါတယ်။ သူတို့ မိသားစုက အလယ်အလတ် တန်းစားတွေ ဖြစ်တယ်၊ ဒီလူတွေကြောင့် စိတ်ရော ကိုယ်ပါ ဆင်းရဲရပြီးပြီ အခု ငွေကြေးအရပါ နစ်နာအောင် လုပ်နေကြတယ်လို့ ဒီယာက ပြောပါတယ်။