မူရှာရက်ဖ်- ပါကစ္စတန် စစ်ခေါင်းဆောင်ဟောင်းရဲ့ ရွှေထီးနဲ့မြေကြီး နိုင်ငံရေးဘဝ

အသက် ၇၉ နှစ် အရွယ်မှာ ကွယ်လွန်သွားတဲ့ ပါကစ္စတန် စစ်ခေါင်းဆောင်ဟောင်း၊ ဝန်ကြီးချုပ်ဟောင်း ပါဗက်မူရှာရက်ဖ်ဟာ ဘဝရဲ့ အမြင့်ဆုံး၊ အနိမ့်ဆုံး ဆန့်ကျင်ဘက် အစွန်းနှစ်ဖက်ကို ကြုံတွေ့ခဲ့ရသူပါ။

၁၉၉၉ ခုနှစ်မှာ ပါကစ္စတန်နိုင်ငံကို အာဏာသိမ်းယူခဲ့ပြီးနောက်ပိုင်း လုပ်ကြံသတ်ဖြတ်မှုများစွာနဲ့ ကြုံခဲ့ရသလို အစ္စလာမ်စစ်သွေးကြွတွေနဲ့ အနောက်အုပ်စုတို့ကြားမှာလည်း ကြားညပ်ခဲ့ပါတယ်။

အထူးသဖြင့် သူအာဏာရလာပြီးနောက်ပိုင်း အမေရိကန်နဲ့ မဟာမိတ်ဆက်ဆံရေး တည်ထောင်နိုင်ခဲ့တာကနေ ပါကစ္စတန်နိုင်ငံ ခေတ်မီလာအောင်နဲ့ စီးပွားရေးတိုးတက်အောင် အကူအညီ ပေးနိုင်ခဲ့တယ်လို့ အသိအမှတ်ပြုမှုတွေ ရှိပါတယ်။

ဒါပေမဲ့ ၂၀၀၈ ခုနှစ်မှာတော့ စစ်ဗိုလ်ချုပ်ကြီးဘဝကနေ အာဏာရလာတဲ့ မူရှာရက်ဖ် တစ်ယောက် ‌ရွေးကောက်ပွဲမှာ ရှုံးနိမ့်ခဲ့ပါတယ်။ အဲ့ဒီရှုံးနိမ့်မှုကနေ ရာထူးက ဖယ်ရှားခံခဲ့ရ၊ အရှက်တကွဲဖြစ် ဖမ်းဆီးခံခဲ့ရပြီး သူ့ရဲ့အာဏာ အဆုံးသတ်ခဲ့ရပါတယ်။ ပြီးတော့ သူ့ကို နိုင်ငံတော်သစ္စာဖောက်မှုနဲ့ ၂၀၁၉ ခုနှစ်မှာ မျက်ကွယ် သေဒဏ် ချမှတ်ခံခဲ့ရပါတယ်။

တကယ်တော့ သူ့ကို ၂၀၁၆ ခုနှစ် ကတည်းက ဆေးကုသမှုခံယူဖို့ ပါကစ္စတန်နိုင်ငံထဲက ထွက်ခွာခွင့်ပြုထားခဲ့တာဖြစ်လို့ သူ့ကို ချမှတ်ခဲ့တဲ့ စီရင်ချက်ကိုလည်း လက်တွေ့ အရေးယူဆောင်ရွက်ဖို့ မဖြစ်နိုင်တော့သလောက်ပါပဲ။ဒါပေမဲ့ တိုင်းပြည်ကို အကြာကြီး အုပ်ချုပ်ခဲ့တဲ့ စစ်တပ်အတွက်တော့ အရှက်ရစရာ ဖြစ်ပါတယ်။

၂၀၂၂ ခုနှစ် ဇွန်လမှာ ဒူဘိုင်းမှာ မူရှာရက်ဖ် သေဆုံးသွားပြီဆိုတဲ့ သတင်းတွေ ထွက်လာခဲ့ပါတယ်။ သူ့မှာ ရှားပါးရောဂါ ပရိုတင်းဆိုင်ရာ ရောဂါတစ်မျိုးခံစားနေရလို့ ကိုယ်တွင်းအင်္ဂါတွေ ပျက်စီးလာနေပြီး ပြန်မကောင်းလာနိုင်လောက်တော့ဘူးလို့ မိသားစုက ထုတ်ပြောပါတယ်။

အစောပိုင်းနှစ်များ

ပါဗက်ဇ် မူရှာရက်ဖ်ကို ၁၉၄၃ခုနှစ် သြဂုတ်လက ဒေလီမြို့မှာ မွေးဖွားခဲ့တာ ဖြစ်ပြီး သူ့ရဲ့ အူရဒူ စကားပြော မိဘနှစ်ပါးဟာ ၁၉၄၇ ခုနှစ်မှာ အိန္ဒိယနဲ့ ပါကစ္စတန် နှစ်ပိုင်းကွဲသွားခဲ့အပြီးမှာ ပါကစ္စတန်နိုင်ငံကို ပြောင်းရွှေ့အခြေချခဲ့ပါတယ်။

စစ်တပ်ထဲမှာ ကာလတာရှည် စစ်မှုထမ်းခဲ့အပြီး ဝန်ကြီးချုပ် နဝါ့ဇ်ရှရစ်ဖ်ရဲ့ လက်အောက် ၁၉၉၈ ခုနှစ်မှာ မူရှာရက်ဖ် စစ်ဦးစီးချုပ် ဖြစ်လာခဲ့ပါတယ်။

သူဟာ ၁၉၆၁ ခုနှစ် ပါကစ္စတန်စစ်တက္ကသိုလ်ကို မရောက်ခင် ကရာချိနဲ့ လာဟိုးမြို့တွေမှာ ကျောင်းတက်ခဲ့သူပါ။

၁၉၆၅ ခုနှစ် အိန္ဒိယ ပါကစ္စတန်စစ်ပွဲမှာ တာဝန်ထမ်းဆောင်ခဲ့ပြီး ငါးနှစ်အကြာထပ်ဖြစ်တဲ့ စစ်ပွဲမှာ တပ်ဖွဲ့ တပ်ခွဲမှူးဖြစ်လာခဲ့ပါတယ်။

အစိုးရနဲ့ မပြေမလည်မှုတွေဖြစ်ပြီး ပါကစ္စတန် စစ်တပ်အကြီးအကဲ ဗိုလ်ချုပ်ကြီး ဂျဟန်ဂီယာ ကရာမတ် ရာထူးက နုတ်ထွက်ခဲ့ချိန် ၁၉၉၈ မှာ မူရာရက်ဖ် စစ်ခေါင်းဆောင် ဖြစ်လာခဲ့တာပါ။

ဗိုလ်ချုပ်ကြီး ဂျဟန်ဂီယာ ကရာမတ်ရာထူးက နုတ်ထွက်သွားတာက ဝန်ကြီးချုပ် နဝါ့ဇ် ရှရစ်ဖ် ရဲ့ နိုင်ငံရေးအာဏာ အရပ်သားအုပ်ချုပ်ရေး ရေရှည်အနာဂတ်ကို လုံခြုံ ခိုင်မာပိုအားကောင်းလာမယ်လို့ လေ့လာသူအများအပြားက ယူဆခဲ့ကြပါတယ်။

ဒါပေမဲ့ ၁၉၉၉ ခုနှစ် အောက်တိုဘာလထဲမှာ ဝန်ကြီးချုပ် နဝါ့ဇ် ရှရစ်ဖ်က မူရှာရက်ဖ်ကို ရာထူးက ပြန်ဖြုတ်ချဖို့ ကြိုးပမ်းခဲ့ရာမှာတော့ သူ့ရဲ့လှုပ်ရှားမှုကို အကြီးတန်း စစ်တပ်အရာရှိတွေက ကန့်ကွက်ခဲ့လို့ မအောင် မြင်ခဲ့ပါဘူး။

အဲ့ဒီအချိန် နိုင်ငံပြင်ပကိုရောက်နေတဲ့ မူရှာရက်ဖ် ပါကစ္စတန်နိုင်ငံထဲကို အမြန်ပြန်လာပြီးသွေးထွက် သံယိုမရှိတဲ့ အာဏာသိမ်းမှုပုံစံနဲ့ အာဏာသိမ်းပြီး နိုင်ငံရဲ့ အမြင့်ဆုံးရာထူးနေရာကို ရယူခဲ့ပါတယ်။

သမ္မတရာထူးကို ကိုယ်တိုင်အပ်နှင်းပြီး တရားဝင်မရယူခင် ၂၀၀၁ ဇွန်လမတိုင်ခင်အထိ သမ္မတ ရာဖစ်စ်တာရာကို သမ္မတရာထူးနေရမှာ မူရှာရက်ဖ်က ထားခဲ့ပါတယ်။

သူ့ရဲ့အာဏာသိမ်းမှုကနေ အိမ်နီးချင်း အိန္ဒိယနှင့် ဆက်ဆံရေး တည်ငြိမ်မှုတွေရလာစေတာ ဒါမှမဟုတ် လမ်းကြောင်းအသစ်တစ်ခုရလာနိုင်တယ်လို့ သူအာဏာရတဲ့ အစပိုင်းမှာ အကောင်းမြင်ယူဆချက်တွေ ရှိခဲ့ပါတယ်။

၂၀၀၁ခုနှစ် ဇူလိုင်လမှာ ကျင်းပခဲ့တဲ့ အထင်ကရ ထိပ်သီးအစည်းအဝေးတစ်ခုကိုတက်ရောက်ဖို့ အိန္ဒိယနိုင်ငံကို သွားရောက်ခဲ့ပြီး အိန္ဒိယဝန်ကြီးချုပ် ဘာ့ဂျ်ပါရီးနဲ့တွေ့ဆုံဆွေးနွေးခဲ့တာ၊ ဒေလီက မူရှာရက်ဖ် မိသားစုရဲ့ ဘိုးဘွားအိမ်ကို အလည်အပတ်သွားရောက်ခဲ့တာတွေက ပါကစ္စတန်နဲ့ အိန္ဒိယဆက်ဆံရေးတိုးတက်လာပြီဆိုတဲ့ အကောင်းမြင်မှုတွေ ဖြစ်လာစေခဲ့တာပါ။

ဒါပေမဲ့ တွေ့ဆုံခဲ့မှုတွေမှာ ဘာသဘောတူညီချက်မရဘဲ ပြီးဆုံးသွားပြီး ကာလကြာရှည်စွာ အငြင်းပွားခဲ့တဲ့ ကက်ရှမီးယားအရေးက လမ်းပျောက်သွားစေတဲ့ အဓိကအကြောင်းရင်းလို့ ရှုမြင်သုံးသပ်ကြပါတယ်။

အိန္ဒိယက မူရှာရက်ဖ်ကို ၁၉၉၉ ခုနှစ် ကာဂီလ် ပဋိပက္ခကို အဓိကကြိုးကိုင်ဖန်တီးတဲ့သူအဖြစ် မှတ်ယူထားပြီး အဲ့ဒီနှစ်မှာဖြစ်ပွားခဲ့တဲ့ အာဖဂန်နစ္စတန်ကိုသွားတဲ့ အိန္ဒိယလေကြောင်းလိုင်း လေယာဉ်ပြန်ပေးဆွဲမှုမှာ ပါကစ္စတန်စစ်တပ်က ပါဝင်ပတ်သက်နေတယ်လို့ သံသယရှိ ထားပါတယ်။

အကြမ်းဖက်မှု တိုက်ဖျက်ရေး

အစ္စလာမ်စစ်သွေးကြွတွေက အမေရိကန်ကို ပစ်မှတ်ထားတိုက်ခိုက်ခဲ့တဲ့ ၂၀၀၁ ခုနှစ် စက်တင်ဘာလ ၁၁ ရက် အကြမ်းဖက် တိုက်ခိုက်မှုအပြီး အမေရိကန်သမ္မတဘွတ်ရှ်က သူတို့အစိုးရလုပ်ဆောင်နေတဲ့ အကြမ်းဖက်မှုတိုက်ဖျက်ရေး စစ်ပွဲကို ထောက်ခံပါဝင်ဖို့ မူရှာရက်ဖ်ကို တိုက်ရိုက်ဖိအားပေးခဲ့ပါတယ်။

“ခင်ဗျား ကျွန်တော်တို့ဘက်မှာ ရပ်မလား ၊ကျွန်တော်တို့နဲ့ ဆန့်ကျင်ဘက်မှာ ရပ်မလား” ဆိုတဲ့အထိ အမေရိကန် သမ္မတ ဂျော့ချ်ဒဗလျူဘွတ်ရှ်က မူရှာရက်ဖ်ကို ပြတ်ပြတ်သားသား သတိပေးတာ ခံခဲ့ရပါတယ်။

အဲ့ဒီနောက်ပိုင်း မွတ်ဆလင် အစွန်းရောက်တွေကို ခိုလှုံမှုပေးနေတဲ့ အိမ်နီးချင်း အာဖဂန်နစ္စတန်နိုင်ငံက တာလီဘန်အစိုးရကို ဖယ်ရှားဖို့ကြိုးစားတဲ့ အမေရိကန်ဦးဆောင်တဲ့ စစ်ရေးလှုပ်ရှားမှုကို ထောက်ခံအားပေးဖို့ ပါကစ္စတန်အစိုးရမူဝါဒကို အလှည့်အပြောင်းလုပ်ခဲ့ပါတယ်။

ပါကစ္စတန်နိုင်ငံထဲက အစ္စလာမ္မစ်အကြမ်းဖက်ဝါဒကို တိုက်ဖျက်မယ်လို့ ၂၀၀၂ ခုနှစ် ဇန်နဝါရီလမှာ မူရှာရက်ဖ် ကတိပြုခဲ့ပြီး အစွန်းရောက်ဝါဒကို ပြင်းပြင်းထန်ထန် ရှုတ်ချခဲ့ပါတယ်။ ဒါ့အပြင် ဗလီတွေနဲ့ အစ္စလာမ်ပညာရေးစင်တာတွေကို ထောက်ပံ့နေတဲ့ နိုင်ငံခြားရန်ပုံငွေအားလုံးကိုလည်း တားမြစ်ပိတ်ပင်ခဲ့ပြီး ပါကစ္စတန်ကိုလာတဲ့ နိုင်ငံခြားကျောင်းသားအရေအတွက်ကိုပါ ကန့်သတ်တာတွေ လုပ်ဆောင်ခဲ့ပါတယ်။

တစ်ဖက်မှာလည်း သမ္မတသစ်တာဝန်ထမ်းဆောင်နေတဲ့ မူရှာရက်ဖ်ဟာ ဒီမိုကရေစီနည်းကျ ရွေး ကောက်ပွဲတွေ ကျင်းပပေးဖို့၊ အရပ်ဖက်အုပ်ချုပ်ရေးစနစ် ပြန်လည်ထူထောင်ဖို့ ဖိအားပေးခံခဲ့ရပါတယ်။

၂၀၀၂ ခုနှစ် အောက်တိုဘာလက မူရှာရက်ဖ်ကိုထောက်ခံတဲ့ ညွန့်ပေါင်းအဖွဲ့က ပါလီမန်အမတ်နေရာအများစု အနိုင်ရခဲ့ပေမယ့် အမျိုးသားလွှတ်တော်မှာ သူတို့အဖွဲ့ လက်တွေ့ လုပ်ဆောင်မှုတွေ မလုပ်နိုင်အောင် အတိုက်အခံတွေက ၁၂လ ကျော်ကြာ တားဆီးပိတ်ပင်ခဲ့ပါတယ်။

နောက် ၂ နှစ်အကြာမှာတော့ ၁၉၉၉ ခုနှစ်က သူ့ရဲ့ အာဏာသိမ်းမှုကို တရားဝင်ဖြစ်စေမယ့် စစ်တပ် ခေါင်း ဆောင်ရာထူးရော သမ္မတရာထူးကိုပါ ပူးတွဲရယူနိုင်မယ့် သဘောတူညီချက်ကို ပူးပေါင်းထားတဲ့ အစ္စလာမ္မစ် ပါတီတွေ နဲ့ သဘောတူ လက်မှတ်ရေးထိုးနိုင်ခဲ့ပါတယ်။

စီးပွားရေး ကျဆင်းမှု ရပ်တန့်အောင်လုပ်မယ်ဆိုတဲ့ ကတိက သမ္မတမူရှာရက်ဖ် အာဏာရဖို့ဖြစ်လာခဲ့ပြီး သူ့ရဲ့ ပြုပြင်ပြောင်းလဲရေး လုပ်ဆောင်ချက်တွေကို နိုင်ငံတကာ အဖွဲ့အစည်းတွေက ယေဘုယျအားဖြင့် ချီးကျူးထောက်ခံခဲ့ကြပါတယ်။

၂၀၀၅ ခုနှစ် အောက်တိုဘာလမှာ မူရှာရက်ဖ်အစိုးရ ဖြေရှင်းခဲ့ရတဲ့ ကိစ္စတစ်ခုကတော့ ပါကစ္စတန်ဘက်ခြမ်း ကက်ရှ်မီးယားဒေသမှာ ငလျင်ကြီးလှုပ်ခဲ့ပြီး လူပေါင်း ၇၃,၀၀၀ ကျော် သေဆုံး၊ လူသုံးသန်းကျော် အိုးမဲ့အိမ်မဲ့ ဖြစ်ခဲ့ရတဲ့ကိစ္စပါ။

ပြီးတော့ အကျင့်ပျက်ခြစားမှုစွပ်စွဲချက်နဲ့ တရားသူကြီးချုပ် အဖ်တီကာ မူဟာမက် ချောင်ဒရီကို ရာထူးက ဆိုင်းငံ့ထားရတဲ့ကိစ္စကလည်း သူ့အုပ်ချုပ်မှုအပေါ် ဖိအားတွေ ဝေဖန်မှုတွေ တိုးလာပါ တယ်။

တရားသူကြီးချုပ်ကို ရာထူးက ဖယ်ရှားတဲ့ကိစ္စကို ရှေ့နေတွေက အကြီးအကျယ် ကန့်ကွက်ဆန္ဒ ပြခဲ့ကြတာကြောင့် တရားရုံးချုပ်က တရားသူကြီးချုပ်ကို ရာထူးပြန်ပေးခဲ့ရပြီး သူ့ကိုစွပ်စွဲထားတဲ့ အကျင့်ပျက် ခြစားမှုစွပ်စွဲချက်တွေ အားလုံးကိုပါ ပယ်ဖျက်ပေးခဲ့ရပါတယ်။

ဘာသာရေးခေါင်းဆောင်တွေနဲ့ ကျောင်းသားတွေက အနောက်အုပ်စုကိုထောက်ခံတဲ့ မူရှာရက်ဖ် ရဲ့မူဝါဒတွေကို ရှုတ်ချမှုတွေ ပုံမှန်လုပ်နေတဲ့နေရာ အစ္စလာမ်မာဘတ်မြို့က Red Mosque ဗလီကို ၂၀၀၇ ခုနှစ် ဇူလိုင်လက ပါကစ္စတန်စစ်တပ်က ဝင်စီးခဲ့ပါတယ်။

ဗလီထဲကို စစ်တပ်က ဝင်မစီးနိုင်ခင် ကျောင်းသားတွေနဲ့ စစ်တပ်အကြား တိုက်ခိုက်မှုတွေ ဖြစ်ပွားခဲ့ပြီး လူပေါင်း ၁၀၀ ကျော် အထိသေဆုံးခဲ့ရပါတယ်။

အဲ့ဒီနှစ် နိုဝင်ဘာလက မူရှာရက်ဖ်ကို ကံကြမ္မာဆိုးတစ်ခုဖြစ်လာစေမယ့် နောက်ဆုံးဖြတ်ချက်တစ်ခုက နိုင်ငံတော်ကို အရေးပေါ်အခြေအနေ ကြေညာခဲ့တာပါ။

သူ့ကို သမ္မတရာထူးပြန်ရစေမယ့် အငြင်းပွားဖွယ် ရွေးကောက်ပွဲအပြီး တစ်လအကြာမှာ ဖွဲ့စည်းပုံ အခြေခံဥပဒေကို ဆိုင်းငံ့ထားဖို့နဲ့ တရားသူကြီးချုပ် လူစားထိုးဖို့ ကို မူရာရှက်ဖ် လုပ်ဆောင်ခဲ့ပါတယ်။ ဒါပေမဲ့ အရေးပေါ်အခြေအနေ ပြဋ္ဌာန်းတဲ့ကိစ္စ အတိုက်အခံတွေနဲ့ သူ့ရဲ့ အဓိကနိုင်ငံတကာလုပ်ဖော်ကိုင်ဖက်တချို့ရဲ့ ဆန့်ကျင်တာခံခဲ့ရပြီး သူ့ရဲ့ လူကြိုက်များမှုကိုလည်း ကျဆင်းသွားစေခဲ့ပါတယ်။

အာဏာ လက်လွတ်လာ

၂၀၀၇ ခုနှစ် ဒီဇင်ဘာလမှာ အသေခံဗုံးခွဲသမားတစ်ယောက်က ၀န်ကြီးချုပ်ဟောင်း ဘနာဇီယာဘူတို လုပ်ကြံခဲ့တဲ့ ထိတ်လန့်တုန်လှုပ်စရာကောင်းတဲ့ လုပ်ကြံသတ်ဖြတ်မှု ဖြစ်ခဲ့ပါတယ်။ ဒါကြောင့် ပါကစ္စတန်ရဲ့ အနာဂတ်က သူ့လက်ထဲမှာ လုံခြုံတယ်လို့ မူရှာရက်ဖ်ရဲ့ အခိုင်အမာပြောဆိုမှုကို မယုံမကြည် ဖြစ်လာစေခဲ့ပါတယ်။

၂၀၀၈ ခုနှစ်အစောပိုင်း ရွေးကောက်ပွဲတွေမှာ ဘနာဇီယာဘူတိုရဲ့ ပါကစ္စတန်ပြည်သူ့ပါတီ အနိုင်ရခဲ့ပါတယ်။ သူတို့က မူရှာရက်ဖ်ကို ရာထူးကနုတ်ထွက်ဖို့ အတင်းအကျပ်ဖိအားပေးလုပ်ဆောင်မှုတွေလုပ်ခဲ့ပြီး စွပ်စွဲအရေးယူမယ့် လုပ်ငန်းစဥ်တွေကိုပါ စတင်လုပ်ဆောင်လာကြပါတယ်။

၂၀၀၈ ခုနှစ် ဩဂုတ်လ ၁၈ ရက်နေ့မှာ မူရှာရက်ဖ်က သူရာထူးက နုတ်ထွက်ကြောင်း မိန့်ခွန်းရှည်ကြီး တစ်ခုကို ပြောကြားခဲ့ပြီး သူဆောင်ရွက်ခဲ့တဲ့ ဆုံးဖြတ်ချက်တွေနဲ့ ပတ်သက်ပြီးတော့လည်း သူ့မှာဘာမှ အပြစ်မရှိကြောင်း ခုခံကာကွယ်ခဲ့ပါတယ်။

ရာထူးကအနားယူပြီးနောက်ပိုင်း လန်ဒန်နဲ့ ဒူဘိုင်းမှာ သူ့ဘဝကို အေးအေးချမ်းချမ်း အနား ယူနေထိုင်ခဲ့ပေမယ့် ပါကစ္စတန်ကို ပြန်လာပြီး အာဏာရဖို့ ကြိုးစားတဲ့ လုပ်ဆောင်မှုတွေလည်း လုပ်ဆောင်ခဲ့ပါတယ်။

၂၀၁၃ ခုနှစ် မတ်လမှာ ရွေးကောက်ပွဲ ဝင်ပြိုင်ဖို့ ပါကစ္စတန်နိုင်ငံကို မူရှာရက်ဖ် ရုတ်တရက် ပြန်လာခဲ့ပါတယ်။ ဒါပေမဲ့ သူ့ကို ရွေးကောက်ပွဲ ဝင်ပြိုင်ခွင့် တားမြစ်ခံခဲ့ရပြီး သူ့ရဲ့ APML ပါတီကလည်းအကြီးအကျယ် ရှုံးနိမ့်ခဲ့ပါတယ်။

အဲ့ဒီနောက် မူရှာရက်ဖ်ဟာ ၂၀၀၇ ခုနှစ် အရေးပေါ်အခြေအနေ ချမှတ်ခဲ့တာနဲ့ ပတ်သက်ပြီး နိုင်ငံတော်ပုန်ကန်မှုနဲ့ ရုံးတင် တရားစွဲခံခဲ့ရပါတယ်။ အဲ့ဒီအမှုနဲ့ ပါကစ္စတန်နိုင်ငံရဲ့ အမြင့်ဆုံး တရားရုံးတွေမှာ နှစ်ပေါင်းများစွာ တရားရင်ဆိုင်ခဲ့ရပါတယ်။

၂၀၁၆ ခုနှစ်မှာ ဆေးကုသခွင့် အကြောင်းပြချက်နဲ့ သူ့ရဲ့ ခရီးသွားလာခွင့် ပိတ်ပင်မှုကို ရုပ်သိမ်းပေးခဲ့ပြီး မူရှာရက်ဖ်လည်း ပါကစ္စတန်နိုင်ငံကနေ ပြန်ထွက်ခွင့်ရခဲ့ပါတယ်။

နိုင်ငံတော်ပုန်ကန်မှုနဲ့စွပ်စွဲခံရတဲ့အမှုက တရားရုံးမှာ သုံးနှစ်ကျော်ကြာခဲ့ပြီး မူရှာရက်ဖ်ကို အပြစ်ရှိတယ်လို့ ဆုံးဖြတ်ပြီး သေဒဏ်ချမှတ်ခဲ့ပါတယ်။

ဒါပေမဲ့ သေဒဏ်ချပြီးချိန်မှာ မူရှာရက်ဖ်က ဒူဘိုင်းမှာရောက်နေတာကြောင့် သေဒဏ်ပြစ်ဒဏ်ကို လက်တွေ့ မခံစားလိုက်ရပါဘူး။

ဆေးရုံခုတင်တစ်ခုကနေ ဗီဒီယိုကတဆင့် ပြောကြားခဲ့တာမှာလည်း ကျန်းမာရေးမကောင်းတဲ့ အတွက် ပါကစ္စတန်ကို သွားဖို့မဖြစ်နိုင်ဘူးလို့ မူရှာရက်ဖ်က ပြောပါတယ်။

နောက်ထပ်လှည့်ကွက်တစ်ခုကတော့ သူ့ကို သေဒဏ် စီရင်ချက်ချပြီး တစ်လအကြာမှာ သူ့ကိုတရားစွဲတဲ့ လုပ်ငန်းစဉ်တစ်ခုလုံးက ဖွဲ့စည်းပုံအခြေခံဥပဒေနဲ့ မညီဘူးလို့ လာဟိုး အထက်တရားရုံက ကြေညာခဲ့ပါတယ်။

သူ့ကိုသေဒဏ်ချတဲ့ စီရင်ချက်ရဲ့တရားဝင်မှုက မသေမချာဖြစ်ခဲ့ပြီး သူ့ကိုချမှတ်ခဲ့တဲ့ သေဒဏ်ကပါ အလိုအလျောက် ပျက်ပြယ်သွားမှာလားဆိုတဲ့ အချက်ကိုလည်း ရှင်းရှင်းလင်းလင်း မသိရပါဘူး။

မူရှာရက်ဖ်ရဲ့ ကိုယ်တွင်းအင်္ဂါတွေ ပျက်စီးနေပြီလို့ သူ့မိသားစုက ၂၀၂၂ခုနှစ် ဇွန်လက ထုတ်ပြန်ပြောကြားခဲ့ပြီးနောက်ပိုင်းမှာလည်း ပါကစ္စတန်က သူ့အိမ်မှာ ငြိမ်းငြိမ်းချမ်းချမ်း ခေါင်းချသေဆုံးခွင့်ပြုဖို့ တောင်းဆိုသူတွေ ရှိခဲ့ပါတယ်။

ပါကစ္စတန် စစ်တပ်ကတော့ မူရှာရက်ဖ်နဲ့ ပတ်သက်ပြီး မိသားစုကလိုအပ်တာကို ကူညီ ထောက်ပံ့ ပေးမယ်လို့ ရှင်းရှင်းလင်းလင်း ပြောထားတယ်။

ဒါပေမဲ့ စစ်ဦးစီးချုပ်ဟောင်း မူရှာရက်ဖ်ကို ဖမ်းဆီးပေးဖို့ တောင်းဆိုခဲ့သူတွေလည်း အများအပြားရှိပြီး သူကျူးလွန်ခဲ့တဲ့ ပြစ်မှုတွေအတွက် ဖြေရှင်းပေးရမယ်လို့ ပြောခဲ့ကြပါတယ်။