ကျောင်းသားတွေ AI နဲ့ ဘာသာစကား ဘယ်လိုသင်ယူနေကြလဲ
ဓာတ်ပုံ ရင်းမြစ်, Christine Ro
ခရစ္စတီန်း ရိုဟာ ChatGPT ကနေ တဆင့် စပိန်ဘာသာစကားကို သင်ယူနေပါတယ်။ သူသင်ယူနေတဲ့ အကြောင်းကို သူ့ အာဂျင်တီးနားက သူငယ်ချင်းကို စိတ်လှုပ်ရှားစွာနဲ့ ပြောပြခဲ့ပါတယ်။
ChatGPT က အမှားတွေကိုတောင် ပြင်ပေးနိုင်ပြီး ဒေသိယ စပိန်ဘာသာ စကားတွေ ဖြစ်တဲ့ မက္ကဆီကိုမှာ သုံးစွဲတဲ့ စပိန်ဘာသာ၊ အာဂျင်တီးနားမှာ သုံးစွဲတဲ့ စပိန်ဘာသာ တွေသာမက အင်္ဂလိပ်စကားနဲ့ ရောနှောထားတဲ့ Spanglish ကအစ ပြောပြပေးတယ်လို့ ဆိုပါတယ်။
နောက်ပြီး သူငယ်ချင်းနဲ့ WhatsApp မှာ စကားပြောရင်တောင် အချိန်ကွာခြားမှုကို ထည့်စဉ်းစားနေရသေးတယ်လို့ ပြောလိုက်တော့ သူငယ်ချင်း ဖြစ်သူက သူ့နေရာမှာ အစားထိုးလိုက်ပြီလားလို့တောင် ပြန်စနောက်နေခဲ့ပါတယ်။
အစားတော့ မထိုးနိုင်ပါဘူး။ AI chatbot ဟာ ဘယ်လောက် အသုံးဝင်ဝင် ကိုယ်နဲ့ နှစ်ပေါင်းများစွာ ပေါင်းသင်းလာတဲ့ အတွင်းသိ အဆင်းသိ လူတယောက်နေရာကိုတော့ ဝင်ယူဖို့ဆိုတာ မဖြစ်နိုင်ပါဘူး။
တကယ်တော့ ခရစ္စတီန်း ရိုဟာ မကြာသေးခင် လတွေအတွင်းမှာ ဘာသာစကား သင်ကြားရေးမှာ AI ကဘယ်လို ထောက်ကူပေးနိုင်တယ်ဆိုတာကို ရှာဖွေ တွေ့ရှိခဲ့ကြသူတွေထဲက တယောက် ဖြစ်ပါတယ်။
ဆောက်လုပ်ရေး လုပ်ငန်းခွင်မှာ လုပ်ကိုင်နေတဲ့ ကော့စတာရီကာသား မိတ်ဆွေတယောက်ကလည်း AI သုံး ကီးဘုတ်ကနေ တဆင့် နည်းပညာပိုင်းဆိုင်ရာ အင်္ဂလိပ်စကားလုံးတွေ သင်ယူနိုင်တာကြောင့် တော်တော်အသုံးတည့်နေတယ်လို့ ဆိုပါတယ်။ ဥပမာပြရရင် ပစ္စည်းတခုကို အင်္ဂလိပ်လို ဘယ်လိုခေါ်သလဲ ဆိုတာ အချိန်ကုန်ခံ ပုံဖော်ပြောပြပြီး ရှာနေစရာ မလိုတော့တာပဲ ဖြစ်ပါတယ်။
တောင်အာဖရိက နိုင်ငံက ကဖေးဆိုင် ပိုင်ရှင်တယောက်ကတော့ သူလေ့လာနေတဲ့ စပိန်ဘာသာရဲ့ သဒ္ဒါပိုင်းမှာ တိုးတက်ဖို့ AI ရဲ့ အကူအညီကို ယူခဲ့ပါတယ်။ အာရုံစူးစိုက်မှုရာ ADHD ခံစားနေရတဲ့ သူ့အတွက် သင်ကြားရေး အထောက်အကူပြု အရာတွေ ရှာရတာဟာ ခက်ခဲနေတာကြောင့် ChatGPT ကို စပြီး သုံးကြည့်ခဲ့ပါတယ်။ အဲဒီအခါမှာ ကြိယာတွေ အသုံးပြုပုံကို ပြထားတဲ့ ဇယားလို သင်ကြားရေး အထောက်အကူပြု ပစ္စည်းတွေကို ပိုလွယ်ကူ အဆင်ပြေစွာ သုံးနိုင်လာတယ်လို့ ဆိုပါတယ်။
တီထွင်သူတွေကလည်း ဒီလို AI နဲ့ ပတ်သက်လို့ စိတ်ဝင်စားလာကြတဲ့ အပေါ်မှာ အခွင့်ကောင်းယူပြီး ဖန်တီးမှုတွေ ထပ်တိုးလုပ်ခဲ့ကြပါတယ်။ အဲဒါကြောင့် အခုဆိုရင် ဘာသာစကား သင်ယူချင်သူတွေအတွက် AI ကို စိတ်တိုင်းကျ စီစဉ်ပေးနိုင်တဲ့ အက်ပ်တွေ အများကြီး ရှိလာပြီ ဖြစ်ပါတယ်။ အဲဒီ အက်ပ် တွေက ဒီလို လေ့လာသင်ကြားလိုသူတွေ အတွက်ဆိုရင် Replika လို chatbot မျိုးတွေထက်တောင် ပိုအသုံးတည့်နိုင်ပါတယ်။
University of Hradec Králové က လက်တွေ့အသုံးချ ဘာသာစကား ဆိုင်ရာ တွဲဖက် ပါမောက္ခ Blanka Klímová က သူ့ တပည့်တွေ အင်္ဂလိပ်ဘာသာ စကား လေ့ကျင့်ရာမှာ Replika က တော်တော် အသုံးကျတယ်လို့ ပြောပါတယ်။
ဒါပေမယ့် စကားပြောပိုင်းမှာတော့ ထပ်ကာ ထပ်ကာ ဖြစ်နေတတ်သလို အမှားပြင်ဆင်ချက်တွေ ကျန်နေတာမျိုး ရှိတယ်လို့ ပြောပါတယ်။ နောက်ပြီး တခါတလေ chatbot က ကျောင်းသူကျောင်းသားတွေကို လိင်စိတ်လှုံ့ဆော်တဲ့ ပုံမျိုးတွေ တောင်းတတ်တယ်၊ ဒါက ရိုင်းစိုင်း ရင့်သီး တဲ့ အပြုအမူလို့ ဆိုရမှာ ဖြစ်ကြောင်း ပြောပါတယ်။
ဓာတ်ပုံ ရင်းမြစ်, Christine Ro
နောက်ဆုံးရ သတင်းနဲ့ မျက်မှောက်ရေးရာအစီအစဉ်များ
ပေါ့ဒ်ကတ်စ်အစီအစဉ်များ
End of podcast promotion
LangAI လို့ခေါ်တဲ့ ဘာသာစကား သင်ကြားရေး chatbot ကကျတော့ တမျိုးပါ။ ပြီးခဲ့တဲ့ မတ်လက မှ Federico Ruiz Cassarino က ဖန်တီးထုတ်လုပ်ခဲ့တာ ဖြစ်ပါတယ်။ ဥရုဂွေးကနေ ယူကေကို ပြောင်းရွှေ့လာခဲ့ပြီး နောက်မှာ သူကိုယ်တိုင် အင်္ဂလိပ်ဘာသာ သင်ယူခဲ့စဉ်က အတွေ့အကြုံတွေကို အခြေခံပြီးလုပ်ခဲ့တာ ဖြစ်ပါတယ်။
Mr Ruiz Cassarino ဟာ သာမန် ဘာသာစကား သင်ကြားရေး နည်းလမ်းတွေနဲ့ စာရင် နေ့စဉ် အင်္ဂလိပ် စကားပြောနေဖြစ်တဲ့ အခါ သိသိသာသာ ပိုတိုးတက်လာခဲ့တာကို တွေ့ခဲ့ရပါတယ်။ အခုဆို သူက အီတလီ ဘာသာစကားကိုလည်း သူထွင်တဲ့ အက်ပ်ကိုပဲ သုံးပြီး လေ့ကျင့် သင်ယူနေပြီ ဖြစ်ပါတယ်။
တချို့လူတွေဟာ ကိုယ့် ဆရာရဲ့ ရှေ့မှာတောင် ကိုယ်အသုံးနည်းတဲ့ ဘာသာစကားနဲ့ ပတ်သက်လို့ မှားယွင်းပြောဆို မိတာမျိုး လုပ်မိမှာကို စိုးရိမ်ကြတယ်လို့ Mr Ruiz Cassarino က ဆိုပါတယ်။ ဒါပေမယ့် chatbot ကတော့ တော်လား ညံ့လား အကဲဖြတ်မှာ မဟုတ်ပါဘူး။ အဲဒါကြောင့်လည်း အခု မျိုးဆက်သစ် AI တွေဟာ စာရေးဖော် သူငယ်ချင်း လုပ်ပေးနိုင်တဲ့ အထိ တိုးတက်လာနေပြီ၊ သူ့ အက်ပ်ကလည်း အဲ့လိုပဲ ဖြစ်တယ်လို့ ဆိုပါတယ်။
အခုသုံးနေတဲ့ AI တွေက ကြိုပြီး ပြင်ဆင်သတ်မှတ်ပေးထားတဲ့ ပျင်းစရာကောင်းတဲ့ အကြောင်းအရာတွေထက် ကိုယ်စိတ်ဝင်စားတဲ့ အရာတွေကို ပြောပြနိုင်တာကြောင့် ဘာသာစကား သင်ယူရတာ ငြီးငွေ့စရာ အလုပ်ကြီးလို ဖြစ်မနေတော့ဘူးလို့ ဆိုပါတယ်။
တချို့ ဘာသာစကား လေ့လာသင်ယူနေသူတွေက ChatGPT နဲ့ Bard တို့လို chatbot ကို သုံးစွဲနေကြပေမယ့် Mr Ruiz Cassarino ကတော့ သူ့ရဲ့ ဘာသာစကား သင်ကြားရေး သီးသန့် အက်ပ်တွေကလည်း အသုံးဝင်တယ်လို့ ယုံကြည်ထားပါတယ်။
ဘာသာစကား လေ့လာသင်ကြားလိုသူတွေ အတွက် အဆင်ပြေဖို့ အထူးကြိုးစား စီစဉ်ပေးထားပါတယ်လို့ သူက ဆိုပါတယ်။ သူတို့ အဖွဲ့က LangAI ကို သုံးစွဲသူရဲ့ ဝေါဟာရ ကြွယ်ဝမှုပေါ် မူတည်ပြီး မှားနေရင်တောင် ပြင်ပေးနိုင်အောင် လုပ်ပေးထားသလို ပါးစပ်နဲ့ ပြောတဲ့ စကားကို စာနဲ့ လိုက်ရိုက်ပေးနိုင်တဲ့အထိ စီစဉ်ပေးထားပါတယ်။
အဲဒီ သင်ကြားရေး အက်ပ်ကို ဆက်လက်သုံးစွဲတဲ့ လူအရေအတွက်ကလည်း ကျသွားတာမျိုး မရှိတဲ့အကြောင်း Mr Ruiz Cassarino က ပြောပါတယ်။
သူတို့ အက်ပ်ကို ၁၀ မိနစ်လောက်သုံးကြည့်သူတိုင်းမှာ ၄၅ ရာခိုင်နှုန်းလောက်ဟာ နောက် ၁ လကြာတဲ့အထိ သုံးစွဲနေကြတာကို တွေ့ရပါတယ်။ အခုတော့ သူတို့ အက်ပ်ကို အကန့်အသတ်မဲ့ သုံးစွဲဖို့ လစဉ်ကြေး နှစ်စဉ်ကြေး ပေးသွင်းပြီး သုံးစွဲလိုသူတွေ ပိုရလာဖို့ ဦးစားပေးလုပ်ကိုင် နေကြပါတယ်။
အဲဒါနဲ့ ဆက်စပ်ပြီး chatbot ရဲ့ အရည်အသွေးပိုင်း တိုးတက်မှုတွေကိုလည်း မှတ်တမ်းယူနိုင်တဲ့ အထိ အဆင့်မြှင့်ပေးဖို့ စီစဉ်နေပြီဖြစ်ပါတယ်။
ဓာတ်ပုံ ရင်းမြစ်, Christine Ro
တွဲဖက်ပါမောက္ခ Klímová လူနဲ့ စက် တွဲဖက်လုပ်ကိုင်တဲ့ ခေတ်မှာ ဘယ်လို ဘာသာစကားနဲ့ ချိတ်ဆက်ကြသလဲ ဆိုတာကို လေ့လာတဲ့ အဖွဲ့မှာလည်း ပါဝင်နေသူ ဖြစ်ပါတယ်။
သူက တိုင်းတပါး ဘာသာ စကား လေ့လာသင်ယူနေကြတဲ့ ကျောင်းသား တွေအကြား AI chatbot တွေ အသုံးပြုနိုင်ပုံနဲ့ အသုံးဝင်မှုပိုင်းကို လေ့လာ စမ်းစစ်ကြည့်ခဲ့ရာမှာ ဝေါဟာရ တိုးတက် ကြွယ်ဝဖို့၊ သဒ္ဒါပိုင်းနဲ့ တခြား ဘာသာစကား တိုးတက်ရေးအတွက် အထောက်အကူပြုနိုင်တာကို တွေ့ခဲ့ရပါတယ်။ အထူးသဖြင့် အမှားကို ပြင်ပေးနိုင်တဲ့ အပိုင်းတွေ ဖြစ်တယ်လို့ ဆိုပါတယ်။
ခေတ်ရေစီးကြောင်းမှာ ကျန်မနေစေဖို့ အတွက် ဘာသာစကား သင်ကြားရေး အက်ပ်တွေဟာ အခုဆို သူတို့ ကိုယ်ပိုင် ပလက်ဖောင်းတွေမှာ AI ကို ထည့်သုံးလာကြပြီ ဖြစ်ပါတယ်။ Duolingo ဆိုရင် ပြီးခဲ့တဲ့ ၂၀၂၂ စက်တင်ဘာလ ထဲမှာ OpenAI နဲ့ ချိတ်ဆက်ပြီး သူတို့ထုတ်တဲ့ GPT-4 ကို သုံးနေပြီဖြစ်ပါတယ်။ AI chatbot တွေက Duolingo ရဲ့ နေရာမှာ လုံးဝ အစားထိုး ဝင်ရောက်သွားဖို့တော့ မဖြစ်နိုင်သေးပါဘူး။
လေးဂို့စ်မြို့ အခြေစိုက် အယ်ဒီတာနဲ့ ကလောင်ရှင် Joy Ehonwa ဆိုရင် ပြင်သစ် ဘာသာစကားကို သင်ယူရာမှာ Duolingo ကိုသာ အဓိကထား သုံးစွဲနေပါတယ်။ ဒါပေမယ့် မကြာသေးခင်က စပြီး သူ့ ပြင်သစ်ဘာသာစကား သင်ယူရေး အတွက် အထောက်အကူ ဖြစ်ဖို့ နိုင်ဂျီးရီးယား ပြည်တွင်းမှာပဲ ဖန်တီးထားတဲ့ AI chatbot ကို စပြီး သုံးနေပြီဖြစ်ပါတယ်။
Kainene vos Savant လို့ ခေါ်တဲ့ အဲဒီ AI chatbot ကို သူက အကုန်သိနေတဲ့ လူသူငယ်ချင်း တယောက်လိုပဲ သဘောထားပြီး ဆက်ဆံပြောဆိုတယ်လို့ ဆိုပါတယ်။
Ms Ehonwa က သူ Duolingo နဲ့ လေ့ကျင့်ခန်း လုပ်ရာမှာ မှားတယ်၊ အောင်မှတ်မရဘူး ဆိုလာရင် ဘာကြောင့် ဖြစ်သလဲ ဆိုတာကို သိချင်မိတယ်၊ အဲဒီ အခါမျိုးမှာ အက်ပ်က ဘာကြောင့် မှားသလဲ ဆိုတာကို နားလည်အောင် သိပ်ပြီး ရှင်းပြမပေးနိုင်ဘူးလို့ ဆိုပါတယ်။
ကိုယ်က အင်္ဂလိပ် ဘာသာ စကားကို အဓိက သုံးစွဲနေသူ ဖြစ်တဲ့ အတွက် စာကြောင်း တကြောင်းကြောင်း မှားနေလို့ Kainene ကို မေးတဲ့အခါမျိုးမှာ Kainene က ဘာကြောင့် ဒီလို ဖြစ်လိုရတယ်၊ ဘာကြောင့် သုံးလို့မရဘူး စသည်ဖြင့် နားလည်အောင် ကူညီရှင်းပြပေးနိုင်ကြောင်း ပြောပါတယ်။
ဓာတ်ပုံ ရင်းမြစ်, AMAJU ADOMI
အရင်က ပေါ်ခဲ့တဲ့ ဘာသာစကား သင်ကြားရေး ပလက်ဖောင်းတွေမှာက အားနည်းချက်တွေ ရှိတယ်ဆိုရင် AI သုံးတဲ့ ဘာသာစကား သင်ကြားရေး တွေမှာလည်း အားနည်းချက်တွေ ရှိနိုင်ပါတယ်။
Chatbot တွေဟာ ဥရောပမှာ အသုံးများတဲ့ ဘာသာစကားတွေနဲ့ ဆိုရင် တော်တော်ကို ကောင်းပေမယ့် အသုံးနည်းတဲ့ ဘာသာစကားနဲ့ စာရေးသားပုံ မတူတဲ့ ဘာသာစာပေတွေမျိုးတွေနဲ့ ပတ်သက်ရင်တော့ အရည်အသွေး ကျသွားတာကို တွေ့ရတယ်လို့ သုံးစွဲသူတွေက ပြောကြပါတယ်။
AI အသုံးပြုထားတဲ့ ဘာသာစကား သင်ကြားရေး အက်ပ်တွေထဲက အများစုမှာလည်း ဘာသာစကား အရေအတွက် အကန့်အသတ်ရှိတာကို တွေ့ရပါတယ်။
အသုံးများတဲ့ ဘာသာစကားမျိုးမှာတောင်မှ chatbot ဟာ အမှားလုပ်တတ်သလို တခါတလေ စကားလုံးသစ်တွေတောင် ဖန်တီးလာတတ်ပါတယ်။ ပြဿနာ ရှိနေတာက သူတို့က စာကြောင်းတွေကို တကယ့် အမှန်လို့ ထင်လောက်စရာကောင်းအောင် ဖန်တီးရေးသား တတ်တာပါ။ အဲဒါကြောင့် အခြေခံက စပြီး သင်ယူနေသူအဖို့ အမှားကို အမှန်လို့ မှတ်ယူသွားနိုင်ပါတယ်။
အမေရိကန်ပြည်ထောင်စု ဝါရှင်တန် တက္ကသိုလ်ရဲ့ ကွန်ပျူတာ ဘာသာစကားဆိုင်ရာ ပါမောက္ခ Emily M Bender ကတော့ စိုးရိမ်မှုတွေ ရှိနေပါတယ်။ သူက အဂတိဆန်တဲ့ မသင့်လျော်တဲ့ အသုံးအနှုန်းတွေကိုရော chatbot တွေကနေ တဆင့် သိလာကြမလားလို့ မေးခွန်းထုတ်ခဲ့ပါတယ်။ နောက်ပြီး ဒေတာအချက်အလက် လုံခြုံမှုနဲ့ ပတ်သက်လို့ လစ်လျူရှုတာမျိုးတွေ ရှိလာနိုင်မယ်လို့ ဆိုပါတယ်။
ဒါပေမယ့် တွဲဖက် ပါမောက္ခ Klímová ကတော့ ဒီလို နည်းပညာတွေအတွက် ဈေးကွက်အကြီးကြီး ရှိနေတယ်လို့ ဆိုပါတယ်။ တခြား ဘာသာစကား လေ့လာ သင်ယူနေကြသူတွေလိုပဲ သူကလည်း ChatGPT မှာ အခကြေးငွေ ပေးပြီး သုံးစွဲလို့ ရတဲ့ GPT-4 ဆိုရင် အံ့သြစရာကောင်းလောက်အောင် တိကျမှု ရှိတယ်လို့ ပြောပါတယ်။
ဆရာတွေ ဆရာမတွေက လက်ခံချင်မှ ခံမှာ ဖြစ်ပေမယ့် တချိန်မှာ ဘာသာစကား သင်ကြားမှုအတွက် လူဆရာ ဆရာမတွေနေရာမှာ ဉာဏ်ရည်တု က အစားထိုး နေရာယူသွားလိမ့်မယ်လို့ ပြောပါတယ်။
ဒီလိုပြောတာက ချဲ့ကားရာ ကျတယ်လို့ ဆိုနိုင်ပါတယ်။ ဘာသာစကားကို စပြီး လေ့လာသင်ယူသူ အတွက်ဆိုရင်တော့ ဆရာ၊ ဆရာမတွေက အကြံဉာဏ်ပေးတာ၊ ပံ့ပိုးပေးတာတွေ လုပ်ပေးနိုင်သလို သက်ကြီးကျောင်းသားတွေနဲ့ ဆိုရင်လည်း တဦးချင်းစီအလိုက် သူတို့ ရည်မှန်းတဲ့အတိုင်း ဖြစ်စေဖို့ လိုအပ်တာတွေကို ပံ့ပိုး ပေးနိုင်ပါတယ်။
ဘာသာစကားကို ကိုယ့်နည်းကိုယ်ဟန်နဲ့ သင်ယူနိုင်ရေးမှာ ပိုပြီး တိုးတက်လာနေတဲ့ အချိန်မှာ ဘာသာစကားသင်ကြားပေးတဲ့ အရာတွေ အနေနဲ့ AI ကြောင့်သူတို့အတွက် ဘယ်လို အကျိုးဖြစ်စေမလဲ ဆိုတာကို ချိန်ညှိကြည့်ရာမှာ အသုံးဝင်စေမှာ ဖြစ်ပါတယ်။
တွဲဖက်ပါမောက္ခ Klímová ကတော့ နည်းပညာကတော့ ဆက်ရှိနေမှာပဲဆိုတော့ ကိုယ့် သင်ကြားမှု ပုံစံတွေ စနစ်တွေကိုပဲ လိုသလို အပြောင်းအလဲ လုပ်သွားရမှာပါလို့ ပြောပါတယ်။
