ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
အမေဇုံ ဘီလျံနာသူဌေးကြီး ဂျက်ဖ် ဘေးဇော့စ်နဲ့ လော်ရင်း ဆန်းချက်ဇ်ရဲ့ ဗင်းနစ်မြို့ မင်္ဂလာပွဲ တက်ရောက်လာတဲ့ ဆယ်လီတွေ
အမေဇုံ ကုမ္ပဏီ တည်ထောင်သူ ဘီလျံနာသူဌေးကြီး ဂျက်ဖ် ဘေးဇော့စ်နဲ့ ရုပ်မြင်သံကြား အစီအစဉ် တင်ဆက်သူ လော်ရင်း ဆန်းချက်ဇ်တို့ရဲ့ ကြီးကျယ်ခမ်းနားတဲ့ မင်္ဂလာပွဲကို ဗင်းနစ်မြို့မှာ သောကြာနေ့က ကျင်းပခဲ့ပါတယ်။
မင်္ဂလာပွဲ တက်ရောက်လာတဲ့ ထိပ်တန်း နာမည်ကြီး မင်းသားမင်းသမီးတွေ၊ တော်ဝင်မိသားစုဝင်တွေ ပါဝင်တဲ့ ဧည့်သည်တော်တွေနောက်ကို ပါပါရာဇီ ဓာတ်ပုံရိုက်သူတွေက အငှားယာဉ် မော်တော်ဘုတ် တွေနဲ့ လိုက်ပြီး အမိအရ ဓာတ်ပုံရိုက်ခဲ့ကြပါတယ်။
မင်္ဂလာပွဲ တက်ရောက်လာသူတွေထဲမှာ အိုပရာ ဝင်းဖရီး၊ အိုလန်ဒို ဘလွန်းမ်၊ ကိုင်လီ ဂျန်နာ၊ အီဗန်နာ ထရမ့် တို့ကို တွေ့ရပါတယ်။
ဒီကနေ့ စနေနေ့မှာတော့ အလယ်ခေတ် သင်္ဘောကျင်းဟောင်း နေရာတစ်ခုမှာ ပါတီပွဲကြီး ဆင်နွှဲပြီး ၃ ရက်ကြာ မင်္ဂလာပွဲကို အဆုံးသတ်မှာ ဖြစ်ပြီး လေဒီ ဂါဂါနဲ့ အယ်လ်တန် ဂျွန်တို့ ဖျော်ဖြေကြမယ်လို့ ယူဆရပါတယ်။
နာရီပေါင်း ၉၀၀ ကြာအောင် ချုပ်ခဲ့ရတဲ့ ဒိုလ်ချေ နဲ့ ဂဘာနာ ဒီဇိုင်နာ ဇာဖောက် သတို့သမီးဝတ်စုံ ဝတ်ထားတဲ့ ဆန်းချက်ဇ်က မင်းသမီးတစ်ဦးလို သူ့ကိုယ်သူ ခံစားမိတယ်လို့ ဓာတ်ပုံဆရာတွေကို ပြောခဲ့ပါတယ်။
အသက် ၅၅ နှစ်အရွယ် ဆန်းချက်ဇ် က အခမ်းအနားအပြီး ပျော်ရွှင်မြူးတူးနေတဲ့ အသက် ၆၁ နှစ်အရွယ် ဘေးဇော့စ်ရဲ့ဘေးမှာ ပြုံးရွှင်လျက်သား ယှဉ်တွဲရပ်နေပုံကို အင်တာဂရမ်ပေါ် တင်ခဲ့ပြီး အသဲပုံနဲ့ သူတို့ရဲ့ မင်္ဂလာနေ့စွဲကို ရေးထားပါတယ်။
မင်္ဂလာပွဲကို လူ ၂၀၀ လောက် ဖိတ်ကြားခဲ့ပြီး အဲဒီထဲက ၇၀ က မိသားစုဝင်တွေ ဖြစ်ပါတယ်။ ဆန်းချက်ဇ်ကတော့ သူ့မင်္ဂလာပွဲမှာ အရမ်း ရင်းနှီးတဲ့သူတွေကိုပဲ ဖိတ်ထားတယ်လို့ Vogue မဂ္ဂဇင်းကို ပြောခဲ့ပါတယ်။
သောကြာနေ့က ဆန် ဂျော်ဂျို ကျွန်းငယ်လေးမှာ ကျင်းပခဲ့တဲ့ မင်္ဂလာအခမ်းအနားမှာ အီတာလျံ ဂန္ဓဝင်အဆိုတော် အန်ဒရီယာ ဘိုချယ်လီရဲ့ သား မက်တီယို ဘိုချယ်လီ ကသီဆို ဖျော်ဖြေခဲ့တယ်လို့ သိရပါတယ်။
မင်္ဂလာအခမ်းအနားအတွက် ငွေဘယ်လောက် ကုန်ကျခဲ့သလဲ ဆိုတာ အတိအကျ မသိရပေမဲ့ ဒေါ်လာ သန်း ၂၀ ကနေ သန်း ၅၀ အတွင်း ရှိမယ်လို့ ခန့်မှန်းနေကြပါတယ်။
သူတို့ရဲ့ မင်္ဂလာပွဲကို ကန့်ကွက် ဆန္ဒပြနေသူတွေထဲမှာ ဗင်းနစ်မြို့ကို ခရီးသွားတွေ မတန်တဆ အလာများတာအပေါ် ကန့်ကွက်နေကြတဲ့ ဒေသခံတွေက အစ ရာသီဥတု ပြောင်းလဲလာမှုအပေါ် ကန့်ကွက်နေကြတဲ့ တက်ကြွလှုပ်ရှားသူတွေ အထိ အမျိုးမျိုးအစားစား ပါဝင်ပါတယ်။
ဒီမင်္ဂလာပွဲဟာ ဆန်းချက်ဇ် အတွက်ရော၊ ဘေးဇော့စ် အတွက်ပါ ဒုတိယ အိမ်ထောင် မင်္ဂလာပွဲ ဖြစ်ပါလိမ့်မယ်။
သူတို့ နှစ်ဦးစလုံးမှာ အရင်အိမ်ထောင်တွေ၊ သမီးရည်းစား ဆက်ဆံရေးတွေကနေ ရထားတဲ့ သားသမီး စုစုပေါင်း ၇ ဦး ရှိပါတယ်။
ဆန်းချက်ဇ်နဲ့ ဘေးဇော့စ် တို့ဟာ ၂၀၂၃ ခုနှစ် မေလတုန်းက ပေ ၄၁၇ ရှည်ပြီး မော်ရီသင်္ကေတ ဘဝသစ်လို့ တင်စား အမည်ပေးထားတဲ့ ကော်ရူး ဆိုတဲ့ ရွက်လှေကြီး ပေါ်မှာ စေ့စပ်ကြောင်းလမ်းခဲ့ကြပါတယ်။
၂၀၂၃ ခုနှစ် နိုဝင်ဘာလမှာတော့ Beverly Hills မှာ စေ့စပ်ပွဲ ကျင်းပခဲ့ရာမှာ အိုပရာ ဝင်းဖရီး၊ ဆယ်လ်မာ ဟေယက်ခ် ပီနောလ်တ်၊ ဘာဘရာ စတြိုင်ဆန်၊ ခရစ်စ် ဂျန်နာ တို့ တက်ရောက်ခဲ့ကြပါတယ်။
