FIFA a Chymru
Ymddengys fod cwmni Emirates, a arwyddodd gytundeb gwerth $195 million am gyfnod o wyth mynedd yn ôl yn 2006, yn dechrau ail feddwl eu cysylltiad â'r gymdeithas bel-droed fyd eang.
Mae'r cyfyng-gyngor yn codi oherwydd yr honiadau fod gweithrediadau FIFA yn cael eu harchwilio am honiadau o lygredd, o dan gyfarwyddyd eu llywydd, Sepp Blatter.
Daw'r mesuriadau i archwilio yn sgil ymddiswyddiad yr unig aelod a oedd am sefyll am y llywyddiaeth yn erbyn Blatter, sef Mohamed Bin Hammam, wedi iddo gael ei gyhuddo o lwgrwobrwyo etholwyr yn y Caribî.
Does yna fawr o hygrededd yn FIFA ar hyn o bryd am mae yna gymaint iddynt feddwl amdano, ac ymateb iddo, fel bod amheuaeth am eu dyfodol yn amlwg yn aflonyddu'r cwmnïau sydd eisoes wedi ymglymu i'w cefnogi a'i noddi.
Yn sgil hyn, ymddengys fod gan FIFA lawer mwy i boeni amdano na dyfodol Cymru fel aelod o'r gyfundrefn, fel mae llawer ohonom yma yn poeni amdano yn sgil datblygiad y tîm Prydeinig ar gyfer y gemau Olympaidd.
Ond i mi, petai FIFA eisiau dod ac aelodaeth Cymru i ben, nid oes angen Gemau Olympaidd arnynt fel esgus i wneud hynny.
Yr hyn sydd i mi yn fwy o fygythiad ydi'r ffaith fod pwyllgor y Gemau Olympaidd yn ymddangos fel petaent yn anwybyddu bodolaeth Cymdeithas Beldroed Cymru ac yn parhau a'u cynlluniau fel na petai Cymru yn bodoli. Ie, 'Beth yw'r ots ganddy'nhw am Gymru? Damwain a hap yw ein bod yn ei llidiart yn byw!'
Hwyrach fod ein pryderon wedi eu cyfeirio tuag at FIFA, sydd a digon a mwy i boeni amdano heb ystyried Cymru. Yn hytrach, oni ddylid arall-gyfeirio ein llais a'n sylwadau a dechrau simsanu yn sgil yr agwedd anghyfforddus sydd yn ymddangos fel petai yn treiddio tuag atom o dan ein trwynau o bencadlys ein cymdogion drws nesaf?
Duw a'n gwaredo - allan ni ddianc rhag hyn?
Trin a thrafod y byd pêl-droed yn ffordd unigryw criw 
