Yma o Hyd!
Pwy ydi'r chwaraewyr gorau a gynrychiolodd Cymru? Mae hyn wedi bod yn destun trafod yn ddiweddar a dyma fy nghynnig i.
Leigh Richmond Roose; Alf Sherwood, Mike England, Kevin Ratcliffe, Gareth Bale, Mark Hughes, Billy Meredith, Ivor Allchurch, Ryan Giggs, John Charles, ac Ian Rush.
Dim lle felly i Gary Speed, Craig Bellamy, yr amddiffynnwr Tommy Jones, na chwaith yr asgellwr Cliff Jones, a dim lle chwaith i Neville Southall, er mawr syndod i fi fy hun!
Ond roedd dylanwad Roose cymaint ar y gêm fel y bu rhaid newid y rheolau er mwyn ymateb i'w ddoniau ac effeithiolrwydd ei chwarae!
Mae'n drist na fydd Ryan Giggs ar y cae yn erbyn Lloegr. Ond, mae wedi gwneud ei benderfyniad, neu mae'r penderfyniad wedi ei wneud drosto! Pwy a ŵyr?
Y Sadwrn diwethaf roedd Giggs yn hollol allweddol yng nghanol cae Manchester United yn y fuddugoliaeth dros Bolton Wanders ac yn dylanwadu ar y chwarae drwy gydol y gêm.
Bydd Giggs yn Stadiwm y Mileniwm, yn ysbrydoli'r tîm, ac os gall ei bresenoldeb gyda Chymru cael cymaint o ddylanwad ac effaith ag y mae'n rhoi i Manchester United, yna mae gobaith eto am fuddugoliaeth.
Hwyrach y byddwn yn cofio Macsen Wledig cyn y gêm a hwyrach y byddwn yn barod am doriad gwawr newydd ym myd pêl-droed Cymru.
Ewch yn ôl i fis Mai, 1980, amser rhy hir i'r cof i rai ohonom, ond dyna pan chwalodd Cymru Lloegr o bedwar gôl i un ar y Cae Ras yn Wrecsam, a'n gadael yn genedl gyfan, ie, wele ni!
Goliau gan Mickey Thomas, Ian Walsh, Leighton James a gôl yn ei rwyd ei hun gan Phil Thompson yn sicrhau buddugoliaeth fythgofiadwy.
Ewch eto, yn ôl i 1984, eto i'r Cae Ras, a gôl Mark Hughes yn ddigon i selio buddugoliaeth yn y gêm ddiwethaf a chwaraewyd o dan drefn y gemau cystadleuol rhyngwladol rhwng gwledydd Prydain.
Mae gwyntoedd y Dwyrain a stormydd y môr wedi llifo dros bêl-droed yng Nghymru ers yr adegau hynny, ond er waethaf pawb a phopeth, rydym yma o hyd, a byddai buddugoliaeth arall dros y Saeson yn sicrhau y gallwn eto floeddio gerbron y gwledydd ein bod ni eto, 'Yma o Hyd'
Come on Cymru!
Trin a thrafod y byd pêl-droed yn ffordd unigryw criw 
