Archifau Ionawr 2011

Cwpan Cymru ac mae nifer o gemau diddorol y penwythnos hwn megis y Rhyl yn erbyn y Seintiau Newydd, Caerfyrddin herio GAP Cei Conna tra bod Llanelli oddi cartref yn erbyn Derwyddon Cefn.

Mae'r tri thîm y tu allan i'r Uwchgynghrair yn geffylau blaen yng Nghynghrair Undebol Huws Gray, ac yn brwydro am ddyrchafiad, yn ôl i brif gynghrair Cymru eleni. Tybed all un ohonynt greu syndod yn y gwpan?

Ond faint o gystadleuaeth ydi Cwpan Cymru erbyn hyn?

Allai ddim gweld pam na all mawrion Cymru, fel Abertawe, Caerdydd ac eraill gael gwahoddiad i'r gystadleuaeth.

Onid tecach fyddai gweld cystadleuaeth agored, gyda phob tîm o fewn Cymru yn cael eu gwahodd?

Fyddai hyn yn siŵr o godi safon Cwpan Cymru, a petai Caerdydd yn fuddugol, byddai safon ein cystadlu yn Ewrop yn codi hefyd.

Gallaf dderbyn ei fod yn fwy anodd cynnwys y timau yma mewn Cynghrair o fewn Cymru.

Onid ydi'r amser wedi cyrraedd pan ddylem ymestyn gwahoddiad i bob tîm yng Nghymru i gystadlu am ein Cwpan cenedlaethol, ac yn sgil hyn godi safon y cystadlu o fewn Cymru a hefyd o fewn Ewrop?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Gyda deunaw mis cyn y gemau Olympaidd yn Llundain, mae ffrae yn codi ynglŷn â chynhwysiant chwaraewyr o Gymru yng ngharfan tîm pêl-droed Prydain.

Mae Cymdeithas Bêl-droed Cymru eisoes wedi cyhoeddi na fyddant yn fodlon i unrhyw un sydd yn gymwys i chwarae dros Gymru gael eu hystyried.

Ond yr wythnos yma, daeth tro ar fyd wrth i Gareth Bale ymddangos fel petai yn awyddus i chwarae dros dîm Prydain.

Ymddengys fod Cadeirydd y Gymdeithas Olympaidd , yr Arglwydd Moynihan, o'r farn y gall chwaraewr sydd yn cael ei rwystro rhag cael ei ystyried gan gymdeithas bêl-droed unrhyw un o wledydd Prydain, gymryd camau cyfreithiol i sicrhau ennill eu lle.
Rhaid atgoffa ein hunain mai diffyg ymddiried yn FIFA ydi sail yr helynt.

Mae Cymru, ynghyd â Gogledd Iwerddon a'r Alban, o'r farn y gallent nhw golli eu statws annibynnol o fewn cyfundrefn FIFA yn sgil sefydlu tîm Prydeinig ar gyfer gemau Llundain.

Mewn campau eraill, megis criced a rygbi, does yna ddim gwrthwynebiad gan gefnogwyr chwaraeon, o weld Cymro yn chwarae criced i Loegr, na chwaith weld gêm brawf yng Nghaerdydd.

Does neb yn cwyno chwaith am sawl Cymro sydd yn nhîm rygbi'r Llewod.

Ond a ellir ymddiried yn FIFA, er iddynt ddweud na fyddai gweld tîm Prydeinig yn y gemau Olympaidd yn effeithio ar statws rhyngwladol ac annibyniaeth Cymru, yr Alban a Gogledd Iwerddon o fewn y byd pêl-droed ?

A tybed a fyddai dyfodol ac annibyniaeth Lloegr hefyd yn cael ei effeithio gan dîm Prydeinig ?

Mae sail i fod yn wyliadwrus o addewidion FIFA.

Mae eu Llywydd, Sepp Blatter wedi awgrymu y dylai Cwpan y Byd sydd i'w gynnal yn Qatar yn 2022 gael eu lleoli yn y gaeaf, am fod y tywydd yn fwy ffafriol.

Ond nid ar y sail yna y cafodd y gemau eu dyfarnu i Qatar, a brysiodd Qatar i wrthod y syniad.

Mae Michel Platini, Llywydd UEFA, hefyd wedi awgrymu y gall y gemau yma gael eu cynnal mewn nifer o wledydd eraill ar draws gwledydd y Gwlff, yn ogystal ag yn Qatar.
Doedd dim sôn o hyn chwaith pan ddyfarnwyd Cwpan y Byd i Qatar.

Felly, a ddylem gefnogi tîm Prydeinig fel mae'r cricedwyr a'r chwaraewyr rygbi yn ei wneud, neu a ddylem fod yn fwy gwyliadwrus fyth o addewidion FIFA petai chwaraewyr o Gymru yn cael eu lle yn y tîm Prydeinig?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Cyrhaeddodd Kenny Dalglish yn ôl fel arwr, chwedloniaeth wedi ymgorffori mewn gobaith.

Ond ai brenin yn ei dillad newydd sbon ydi'r King Kenny yma, a fydd yn cael ei ddinoethi gan fyd cyfoes yr Uwchgynghrair, dd wedi newid cymaint yn y deng mlynedd diwethaf?

Pan aeth Kevin Keegan yn ôl i Newcastle, byrstio gwnaeth swigen y cefnogwyr pan ddaethpwyd i ddeall nad oedd llawer o'r chwaraewyr wedi clywed, neu o leiaf yn deall, am bwysigrwydd Keegan fel eilun yn llygaid y cefnogwyr!

Rhywsut neu'i gilydd, mae gen i deimlad fod Lerpwl, ar hyn o bryd yn gwneud dim mwy nac efelychu Newcastle - clwb mawr, ond cyffredin ei dîm, arwr yn ei ôl, hiraeth am y glendid a fu, ond y chwaraewyr tramor, (a rhai ifanc) yn synnu pawb trwy ddweud nad ydynt yn cofio llawer am ddyddiau dedwydd y rheolwr newydd, a oedd ymhell cyn eu hamser.

A fydd Dalglish yn gallu cyd-weithio gyda Damien Comolli a'i drefn gyfoes a fathemategol o gynnig chwaraewyr gwell fel sydd yn cael ei gymeradwyo gan y perchnogion Americanaidd?

A gafodd Roy Hodgson unrhyw gyfle teg ers i Dalglish gyhoeddi yn yr Haf y byddai o hefyd wedi croesawu bod yn rheolwr yn Anfield?

Cyn pob gêm, mae'r Kop yn cydganu 'You'll Never Walk Alone'. Ond buan iawn y gadawyd Roy Hodgson i gerdded llwybrau Anfield ar ben ei hun, gyda chysgod Dalglish yn gyson o'i gwmpas.

Beth felly fydd cyfraniad King Kenny gyda thîm o chwaraewyr cyffredin, sydd yn or-ddibynol ar bedwar arall sydd â gallu llawer gwell?

A fydd o yn cael y cyfle, nas gafwyd gan Roy Hodgson, i arwyddo chwaraewyr gwell? Neu a fydd rhaid gwrando ar, a dilyn cynigion Comolli?

Ai King Kenny ydi'r dyn i droi'r llanw yn Anfield nei ai King Canute ydi rheolwr newydd y Kop gan weld llanw'r cyffredinedd yn boddi ei statws chwedlonol?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?