Dyddiau da yn dychwelyd i Gasnewydd
Pan ymunais i ag adran chwaraeon y BBC am y tro cyntaf, roedd gan bob un o'r gohebwyr pêl-droed dasg i'w wneud ar fore Gwener sef casglu deunydd o ran cyfweliadau ac yn y blaen ar gyfer rhaglenni radio y penwythnos.
Yr hyn roeddwn ni yn ei wneud fel yr aelod newydd oedd teithio draw i Barc Somerton yng Nghasnewydd i holi'r rheolwr ar y pryd Colin Addison a rhai o'r chwaraewyr.
Roedd Addo yn wir gymeriad a hawdd oedd gweld pam ei fod o yn gallu ysbrydoli chwaraewyr. Roedd o wedi gwneud hynny gyda Henffordd yng Nghwpan Lloegr wrth guro Newcastle ac wedi gwneud hynny mewn cyfnod arall gyda Chasnewydd wrth eu cadw nhw yng nghynghrair Lloegr.
Yn y cyfnod yma roedd y clwb o Went yn chwarae yn yr hen drydedd adran, fyddai heddiw yn cyfateb i Adran Un gyda chlybiau fel Leeds, Nowrich, Charlton a Southampton sydd i gyd yn chwarae ar y lefel yna erbyn heddiw.
Nid yn unig fod y rheolwr yn gymeriad lliwgar roedd yna gymeriadau ymysg y chwaraewyr hefyd, chwaraewyr o dalent fel Tommy Tynan, Steve Lowndes a John Aldridge.
Dw i'n cofio o hyd un Pasg gêm ar Barc Somerton rhwng Casnewydd a Chaerdydd a thîm Addo o flaen mwy na 18,000 o gefnogwyr yn ennill o gôl i ddim i symud i frig yr adran. Ond roedd y pwysau yn ormod iddyn nhw ac fe gollon nhw eu ffordd a gorffen yn bedwerydd tu ôl i Gaerdydd, Portsmouth a Huddersfield.
Roedd Aldridge yn denu 'r sylw ac un noson fe es i draw i Barc Somerton i edrych amdano pan roedd yr ail dîm yn chwarae. Y sôn oedd ei fod ar ei ffordd i Rydychen am £80,000 ac roedd angen cadarnhau hynny. Fe ddois i o hyd iddo yn ei gartref yn y dref ac mi wnes gyfweliad gydag o y noson honno cyn iddo adael y clwb.
Dyddiau da yn wir ond am i lawr aeth pethau wedyn. Colli statws yn y gynghrair; y clwb yn cau; yn cael eu halltudio; yn brwydro i barhau â'u statws o fewn pyramid Lloegr yn yr Uchel Lys yn yr achos yn erbyn Cymdeithas Pêl-droed Cymru, ac yn ennill.
A'r wobr - nos Lun o flaen dros 4,000 o gefnogwyr ym Mharc Spytty, fe guron nhw Havant a Waterloooville o ddwy gôl i ddim i sicrhau'r bencampwriaeth a hynny gyda saith gêm i'w chwarae. Tipyn o bluen yng nghap y rheolwr Dean Holdsworth o Wimbledon gynt pan roedden nhw yn yr Uwch Gynghrair.
Felly tymor nesaf mi fydd gêm ddarbi rhwng dau glwb o Gymru yn y Uwch Gynghrair Blue Square a rhwng y ddau Dean, Holdsowrth a Saunders. Mi fydd yna gryn ddiddordeb mae'n siŵr pan fydd Casnewydd yn herio Wrecsam.
Mae o'n gamp aruthrol gan Gasnewydd sydd, tra yn tanlinellu eu llwyddiant nhw dros y blynyddoedd, hefyd yn amlygu cymaint o ddirywiad fu ar y Cae Ras dros y tymhorau diwethaf.
Trin a thrafod y byd pêl-droed yn ffordd unigryw criw 
