Sgrìobhadh breithneachail air an sgeulachd ghoirid Mairead
Dreach luath
Tha Mairead le Iain Mac a' Ghobhainn mu dheidhinn cupal a tha air an dreuchd a leigeil dhiubh agus a ghluais bhon bhaile mhòr dhan àite anns an do dh'fhàs iad suas. Bha an caractar fireann, Murchadh, na phoileas ach tha e a-nis a' cur seachad a bheatha ag iasgach. Tha a bhean, Anna, glè thric air a fàgail a-staigh leatha fhèin agus tha i air tòiseachadh a' faicinn taibhs - nighean bheag air a bheil Mairead.
San earrann seo tha cothrom:
- eòlas a chur air an sgeulachd ghoiridMairead
- an sgeulachd a leughadh agus a chluinntinn
- sgrùdadh a dhèanamh air na sgilean a chleachd an sgrìobhadair airson an sgeulachd a dhèanamh soirbheachail
- luachadh a dhèanamh air mar a tha Prìomh bheachd no prìomh bheachdan a tha a' ruith tro theacsa. na sgeulachd air an cur fa chomhair an leughadair
Tha na sgilean a tha thu a' cleachdadh ann an leughadh - a' dèanamh mion-sgrùdadh agus luachadh - a' toirt taic dhut le sgrìobhadh breithneachail air litreachas.
Tron earrainn, bidh thu a' freagairt cheistean air an sgeulachd ghoirid. Bidh na freagairtean sin an uair sin a' toirt taic dhut gus aiste a sgrìobhadh air an sgeulachd. Dh'fhaodadh diofar bheachdan no puingean a bhith agad fhèin ann an aiste litreachais. Tha na freagairtean nan eisimpleirean air na dh'fhaodadh tu togail air.
Briathrachas às an sgeulachd
Feuch a bheil eòlas agad air na faclan seo a tha a' nochdadh anns an sgeulachd ghoirid mus èist thu ris an sgeulachd is mus leugh thu an tar-sgrìobhadh.
| Facal/abairt | Brìgh |
|---|---|
| lios | gàrradh |
| faileas | sgàil |
| a' togail a fuilt | a' togail a gruaige |
| creagach | ag iasgach le slat far chreagan a' chladaich |
| gu critheanach | a' gluasad le crith no eagal |
| cudaig | seòrsa èisg |
| tapaidh | dèanta, treun |
| deich bliadhna fichead | trithead bliadhna |
| chan eil rian nach eil | feumaidh e bhith gu bheil |
| bruadar | aisling |
| 's math dh'fhaodte | 's dòcha, 's mathaid |
| anns a' ghuth-thàmh | le guth socair |
| na h-aonar | leatha fhèin |
| ist | bi sàmhach |
| sin bu choireach | sin an t-adhbhar |
| cùbhraidh | le fàileadh brèagha, milis |
| sealg | a' dol às dèidh neach, beathach no nì gus a ghlacadh |
| theireadh i | chanadh i |
| a' teiche | a' falbh le cabhag |
| boltrach | lionn aig a bheil fàileadh tlachdmhor |
| thàinig e steach orm | smaoinich mi |
| a-chaoidh | gu bràth |
| a b' àill le | a b' fheàrr le |
| chaisg i an smaoin | chuir i stad air an smuain |
| nan èireadh rudeigin do | nan tachradh rudeigin do |
| gad èisg | grunn èisg air sreang no ùeir |
| ann an ceann ùine | an dèidh ùine |
Leugh agus èist ri Mairead
LeughMairead le Iain Mac a' Ghobhainn le bhith bruthadh putan Tar-sgrìobhadh fuaim/Audio Transcript.
Mairead le Iain Mac a' Ghobhainn. Èist ris an sgeulachd ghoirid. (Anna Zhuk / ALAMY)
Mairead
1 Nuair a thill iad dhachaigh à Glaschu cheannaich iad taigh mòr geal le lios mòr air a bheulaibh. Cha robh dìth airgid orra, oir bha Murchadh air a bhith na phoileas 's e air inbhe Superintendent a ruighinn. 'S e an aon rud a-riamh a chuir faileas air am beatha nach robh clann aca.
2 Bha i uabhasach toilichte leis an taigh, agus bha Murchadh toilichte cuideachd, oir bha e faisg air a' mhuir 's bha e dèidheil air iasgach.
3 Tha seachd rumannan ann gu lèir, ars esan rithe.
4 Thug iad am piàno dhachaigh leotha agus an àirneis a bh' aca anns an taigh eile, a bha air Great Western Road. Air latha brèagha samhraidh bha i na suidhe anns an lios air cathair, a' ghaoth bhlàth a' togail a fuilt, 's Murchadh le a shlat-iasgaich shìos aig a' chreagach.
5 Agus chual' i am piàno a' cluich.
6 Chuir seo eagal uabhasach oirre, oir bha i cinnteach nach robh aon duine am broinn an taigh'. Gu critheanach dh'èirich i às a' chathair 's chaidh i steach don rùm, ach cha robh duine na shuidhe aig a' phiàno, 's bha e fhathast na chèis mar a thàinig e. Cha chual' i an ceòl tuilleadh an latha sin.
7 Nuair a thàinig Murchadh dhachaigh le cudaigean, dh'innis i dha dè thachair.
8 Feumaidh e bhith gun do thuit thu na do chadal, ars esan rithe. Bha e àrd tapaidh liath, 's bha an dithis aca air a bhith pòst airson deich bliadhna fichead.
9 Chan eil rian nach eil thu ceart, ars ise. Chan eil rian nach e bruadar a bh' ann.
10 Nach i a tha coimhead geal, arsa Murchadh ris fhèin. 'S math dh'fhaodte nach robh còir againn a thighinn dhachaigh.
11 An oidhche sin fhèin chaidh iad a chèilidh air càirdean dhaibh, ach cha do bhruidhinn iad idir air a' phiàno, ach dh'fhaighnich Anna anns a' ghuth-thàmh: Cò bh' anns an taigh a cheannaich sinn?
12 Cha robh ann ach cailleach a bha a' fuireach na h-aonar, arsa Tormod 's e a' cur a-mach Cinzano dhi, oir cha robh Murchadh ag òl. Carson a tha thu a' faighneachd?
13 O, chan eil airson càil, ars Anna.
14 Nuair a chaidh i fhèin is Murchadh dhachaigh bha a' ghealach àrd geal anns an adhar agus an taigh sàmhach. Ach bha e a' coimhead àraid anns an t-solas gheal ud, mar gum biodh e a' feitheamh, agus thuirt i seo ri Murchadh.
15 Ist, òinsich, ars esan. Chan eil càil ceàrr air an taigh. Bha fhios aice nach robh mac-meanmna sam bith ann am Murchadh - 's e sin bu choireach gur e deagh phoileas a bh' ann.
16 An ath latha a-rithist nuair a bha i a' còcaireachd anns a' chidsin agus Murchadh aig a' chreagach, chual' i am piàno a-rithist 's nuair a chaidh i steach don rùm anns an robh e cha robh duine ri fhaicinn. Ach an turas seo dh'fhairich i fàileadh cùbhraidh anns an rùm. Nuair a thàinig Murchadh dhachaigh cha do dh'innis i dha gun cual' i am piàno a' cluich.
17 B' e seo a' chiad sanas a chùm i bhuaithe na beatha.
18 Fad a bheatha bha e air a bhith sealg dhaoine air feadh Ghlaschu agus bha sin fhèin gu leòr dha. Agus a-nise dh'fheumadh ise sealg an taibhs' a bha a' cluich air a' phiàno, anns an taigh mhòr fhalamh ud. Bha a' ghrian air aodann Mhurchaidh a dhubhadh ach bha a h-aodann fhèin geal.
19 An latha bha seo 's i na h-aonar anns an taigh a-rithist, chual' i am piàno, 's nuair a chaidh i a-steach don rùm bha nighean bheag le dreasa phinc oirre na suidhe aig a' phiàno. Chaidh i null far an robh i agus thuirt i rithe, Cò thu?
20 Sheall an nighean rithe le sùilean cho gorm ri sùilean doile agus fhreagair i: Mairead.
21 Mairead, ars Anna. B' e Mairead ainm a màthar. Bha iad a' bruidhinn ri chèile airson ùine mhath nuair a thàinig Murchadh a-steach.
22 Dè tha thu a' dèanamh an sin nad aonar? ars esan. An ann a' cluich air a' phiàno a bha thu?
23 Cha b' ann, ars ise. Dh'èirich i bhon t-seata air an robh i na suidhe agus thuirt i: An d' fhuair thu iasg an-diugh? Agus mar a b' àbhaist bha e air iasg a ghlacadh.
24 A bheil thu cinnteach gu bheil an taigh seo a' còrdadh riut? ars esan. Dh'fhaodadh sinn tilleadh a Ghlaschu ma tha thu 'g iarraidh. Ach bha i droch-nàdarrach anns a' bhad, ag ràdh, Chan eil iarrtas sam bith agam a dhol air ais a Ghlaschu. Agus cha tuirt e an còrr mu dheidhinn.
25 A h-uile latha a bha e aig a' chreagach bha i a' bruidhinn ri Mairead agus ag innse sgeulachd dhi. An latha bha seo, theireadh i, bha an nighean bheag seo a' coiseachd tro choille nuair a chunnaic i am poileas seo anns an deise ghorm mu coinneamh.
26 Agus dh'èisteadh Mairead rithe gu cùramach, ach nuair a chluinneadh i Murchadh a' tighinn bha i a' teiche air falbh.
27 Dè am fàileadh a th' anns an rùm seo? arsa Murchadh rithe, agus smaoinich i: 'S e poileas a th' ann. Carson nach fhairicheadh e am fàileadh?
28 Boltrach ùr a cheannaich mi, ars ise. Agus thug e sùil oirre mar nach biodh e ga creidsinn. O, ars ise rithe fhèin, nam biodh an dithis againn – mi fhìn is Mairead – còmhla ri chèile a-chaoidh …
29 An latha bha seo, agus Murchadh air a bhith anns an taigh gun ghuth air fhàgail, thuirt i ris, Nach eil a thìd agad a dhol a dh'iasgach?
30 Uill, ars esan, thàinig e steach orm gun robh mi gad fhàgail ro thric nad aonar.
31 Ist, amadain, ars ise, thalla thusa le do shlait. Tha mise ceart gu leòr far a bheil mi. Agus rinn e sin, a' toirt sùil oirre nuair a dh'fhàg e.
32 Tha sinn a-nise nar n-aonar, ars ise ri Mairead. Tha e àraid gur e dreasa phinc a th' ort, oir 's e pinc an dath a b' àill le mo mhàthair. An dèidh dhi sgeulachd innse do Mhairead thuirt i rithe, An aithne dhut danns?
33 'S thòisich an dithis a' danns, air feadh an ruma. Tha mi 'n dòchas, ars ise, nach fhàg thu mi tuilleadh. Agus bha eagal oirre gun tilleadh Murchadh, oir gach turas a bha e a' tilleadh bha Mairead a' fàgail.
34 Bha Murchadh math air a bhith a' glacadh dhaoine is èisg ach cha do ghlac e Mairead fhathast. Bha e nàdarrach gu leòr a-nise gum biodh Mairead còmhla rithe mar gum b' ann leatha fhèin a bha i. Ach am b' urrainn dhi a cumail mar phrìosanach anns an taigh mhòr ud?
35 Le làmh Maireid na làimh fhèin, bha i a' falbh air feadh an taighe, 's i a' sealltainn nan rumannan dhi. Seo an rùm agad fhèin, ars ise rithe, 's i a' fosgladh aon de na dorsan. Bha a cridhe gus briseadh air eagal nach còrdadh an rùm rithe.
36 Thàinig an smaoin a-steach oirre: nan èireadh rudeigin do Mhurchadh; ach chaisg i an smaoin anns a' bhad mar gum biodh eagal oirre gun ruigeadh i inntinn Maireid.
37 An latha bha seo thòisich i ag argamaid rithe. Nach do dh'innis mi dhut nach robh còir agad am bùrn ud a chur air an làr? Agus bha i fiadhaich airson mionaid, ach chaill i a fearg 's rug i air Mairead na gàirdeanan 's thòisich i a' slìobadh a fuilt.
38 Ach cha b' fhada a-nis gus an tilleadh Murchadh agus gus am fàgadh Mairead. A h-uile turas a bha i a' fàgail bha eagal oirre nach fhaiceadh i i tuilleadh.
39 Nuair a thàinig Murchadh dhachaigh le gad èisg mar a b' àbhaist dha thuirt e, Dè am bùrn a tha sin air an làr?
40 O, dhòirt mi e nuair a bha mi a' nighe nan soithichean, fhreagair i.
41 Thug e sùil oirre ach cha tubhairt e an còrr airson mionaid. Am poileas ud leis an iasg marbh na làimh!
42 Chaidh e null far an robh i agus thuirt e, Tha mi gad fhàgail nad aonar ro thric. Rinn mi an aon rud ann an Glaschu.
43 Thug i sùil ghaolach air agus thuirt i, Chunna mi an nighean bheag ud an-diugh fhèin, agus lathaichean eile cuideachd.
44 Cò ris a tha i coltach? ars esan.
45 Tha dreasa bheag phinc oirre, ars ise. Agus 's e ise a dhòirt am bùrn air an làr. Thuirt mi rithe nach robh còir aice sin a dhèanamh.
46 Bha thu ceart, arsa Murchadh. Bha thu ceart gu leòr.
47 Thug i sùil air le iongnadh. Dè thuirt thu? ars ise.
48 Thuirt mi riut gun robh thu ceart gu leòr, fhreagair e.
49 Ann an ceann ùine dh'fhaighnich i, A bheil thu a' creidsinn gu bheil an nighean seo ann?
50 Ma tha thu ga coimhead, tha i ann, arsa Murchadh. Nach e a bha coimhead sgìth is aost, am poileas ud a bha gun sgìths.
51 Am poileas ud nach robh a' fàgail càil gun a rannsachadh.
52 Shuidh iad a-muigh anns a' ghrèin air cathraichean agus ise ag èisteachd ach an cluinneadh i am piàno. Bha sàmhachd air feadh an domhain.
53 A-màireach, ars ise, feumaidh tu ionnsachadh iasgach dhomh.
54 Ceart gu leòr, ars esan. Bha e air a làmhan a nighe bhon fhuil. Anns a' mhionaid ud fhèin chuala iad am piàno a' cluich. Sheall i ris. A bheil thu tighinn? ars ise.
55 Tha, ars esan. Chaidh iad a-steach don rùm. Bha Mairead na suidhe aig a' phiàno. Rinn i gàire riutha 's thòisich i ri cluich.
An teacsa bho
Na Sgeulachdan Gàidhlig
Iain Mac a' Ghobhainn
Air an deasachadh le Iain MacDhòmhnaill agus Moray Watson
(Comann Litreachas Gàidhlig na h-Alba, 2022)
© 2022 Donalda NicEanraig
Ionnsaich barrachd
Sgilean sgrìobhaidh ann am Mairead
Moitif agus ìomhaigheachd
Tha Iain Mac a' Ghobhainn a' cleachdadh Eileamaid no samhla a bhios a' nochdadh uair is uair ann an teacsa (no obair ealain) leis an ath-aithris a' cuideachadh gus cuspair a stèidheachadh. agus Nuair a bhios sgrìobhadair a' tarraing dealbh le facail gus an leughadair a chuideachadh ann a bhith a' dèanamh dealbh dhen chuspair nan inntinn. airson ar n-aire a tharraing gu na cuspairean a tha an sgeulachd a' togail.
Tha iomradh air sgilean poilis Mhurchaidh a' nochdadh tric tron sgeulachd. Tha seo bunaiteach don stòiridh – bha an caractar aig ìre àrd na dhreuchd, math air rannsachadh agus "sealg" ach bha e doirbh dha suidheachadh a bhean obrachadh a-mach, chun an deiridh.
Fiù 's aig an deireadh, tha iomadh cheist air fhàgail aig an leughadair a' smaoineachadh air an seo. An robh e dha-rìribh air an suidheachadh obrachadh a-mach an uair sin, no an robh e dìreach a' dèanamh oidhirp gus a bhean a chumail toilichte?
'S dòcha gu bheil dealas Mhurchaidh airson iasgach a' riochdachadh cho dealasach 's a tha e ann a bhith a' faighinn rudan a-mach. Chì sinn gu bheil e soirbheachail na iasgair dìreach mar a bha e soirbheachail na phoileas:
"Bha Murchadh math air a bhith a' glacadh dhaoine is èisg"
Tha sgilean Mhurchaidh mar shealgair a' ciallachadh gu bheil barrachd dragh air Anna gum faigh e a-mach mu Mhairead agus, leis a sin, gum mill e an càirdeas eadar am boireannach agus an nighean.
Tha dragh air Anna gun cuir Murchadh an t-eagal air Mairead agus gun teich i. Mar sin tha i ga bhrosnachadh gu dhol a dh'iasgach airson gum faic i an nighean a-rithist:
"Nach eil a thìd agad a dhol a dh'iasgach?"
Bidh e coltach gu bheil Mairead agus am piàno a' riochdachadh cuimhneachain Anna air a h-òige agus na rudan a bha i a' miannachadh na boireannach òg. Tha duilgheadas aig bonn a' chàirdeis eadar Anna is Mhurchaidh:
"'S e an aon rud a-riamh a chuir faileas air am beatha nach robh clann aca."
Tha e air innse gu bheil "faileas" nam beatha seach nach eil clann aca. 'S dòcha gun tug Anna Mairead beò na h-inntinn mar dhòigh air miann nach tàinig gu bith a làimhseachadh.
Conaltradh nan caractaran
Tha an Bidh sgrìobhadairean a' cleachdadh còmhradh is conaltradh nan caractaran airson am plot a ghluasad air adhart agus airson barrachd fiosrachaidh a thoirt seachad mu charactaran na sgeulachd. eadar na caractaran a' sealltainn an t-seòrsa càirdeis a bha eadar Murchadh agus Anna aig an ìre seo. Tha Anna a' freagairt ceistean Mhurchaidh le freagairtean goirid, sìmplidh gun mòran fiosrachaidh:
"Dè am bùrn a tha sin air an làr?
O, dhòirt mi e nuair a bha mi a' nighe nan soithichean, fhreagair i."
Tha seo a' sealltainn gu bheil Anna airson aire Mhurchaidh a thoirt far an t-suidheachaidh. Tha i a' cleachdadh An fhaireachdainn san fharsaingeachd a th' ann an teacsa no pàirt de theacsa; faodaidh taghadh-facail an ùghdair, luaths na sgeulachd, ruitheam no ìomhaigheachd na faireachdainn seo a chruthachadh. neoichiontach gus nach bi e amharasach. Uair sam bith a nochdas Murchadh, bidh Mairead a' fàgail:
"oir gach turas a bha e a' tilleadh bha Mairead a' fàgail."
Ìoranas
Tha ìoranas a' dol tron sgeulachd. 'S e sin, ged a tha lèirsinn aig Murchadh mar phoileas agus sgil mar iasgair, chan eil e idir a' faicinn na tha a' dol air adhart na dhachaigh.
Bha Murchadh math air a bhith a' glacadh dhaoine is èisg ach cha do ghlac e Mairead fhathast.
Tha eagal air Anna fad na h-ùine gun glac Murchadh i uaireigin. Tha i toilichte gun do sheachain i sin gu ruige seo, ach tha faireachdainn ann gum faigh e a-mach uaireigin.
Tèaman
Trioblaid càirdeis
Chan eil an càirdeas eadar Anna agus Murchadh air a bhith gu tur toilichte seach nach robh leanabh aca. Tha coltas ann gu d' fhuair Murchadh riarachadh na obair – "bha sin fhèin gu leòr dha." Ach cha robh an riarachadh sin aig Anna. Seach nach do chuir Murchadh ùine seachad còmhla rithe ag obrachadh air na ceistean nam beatha ann an dòigh fhosgailte, chuideachail, dhèilig Anna ri a h-aonranas ann an dòigh annasach; chruthaich i Mairead na mac-meanmna.
Dòighean dèiligidh
Tha an dòigh sgrìobhaidh a' togail na ceist an ann am mac-meanmna Anna a tha Mairead. Chan eil cinnt a bheil Mairead na samhla airson leanabh a chailleadh, no airson leanabh a bha iad ag iarraidh agus nach do thachair sin. Co-dhiù, tha Murchadh air Anna fhàgail an ìre mhath leatha fhèin agus chruthaich i Mairead airson dèiligeadh ri a bròn.
Tha a dhòigh fhèin aig Murchadh air dèiligeadh ris a' chùis: iasgach. 'S dòcha gu bheil an ùine a tha e a' cur seachad ri taobh na mara a' samhlachadh mar a tha e fhèin a' sireadh fhreagairtean agus riarachadh. No, 's dòcha gu bheil e fhathast ag iarraidh a bhith a' rannsachadh rudan ged a tha e air a dhreuchd mar phoileas a leigeil seachad.
Slàinte-inntinn
Ged nach urrainn a bhith cinnteach, dh'fhaodadh gu bheil buaidh ga toirt air slàinte-inntinn Anna.
Tha Murchadh a' moladh rud no dhà airson Anna a chuideachadh, leithid a dhol air ais a Ghlaschu, no gum fuirich esan aig an taigh còmhla rithe an àite a dhol a dh'iasgach.
Bhon a tha Anna air na h-uiread de thoileachas fhaighinn tro Mhairead, chan eil gin dhe na molaidhean sin a' còrdadh rithe. 'S dòcha gu bheil mar a tha Mairead a' nochdadh a' sealltainn gu bheil Anna airson gun toir cuideigin an aire dhi agus gu bheil Mairead na cofhurtachd agus na companach dhi.
Os-nàdarrachd
Dh'fhaodadh gur e taibhs a th' ann am Mairead.
Dh'fhaighnich Anna cò bha a' fuireach san taigh roimhe, mar gum biodh i a' smaoineachadh gun robh e tathaichte – 's e sin gun robh taibhs ann.
Mar a tha an sgeulachd a' leantainn, mhothaich Murchadh do fhàileadh anns an rùm agus don uisge air an làr.
Ron deireadh, chuala iad am piàno a' cluich.
Ceistean air sgeulachd ghoirid Mairead
Leugh a' chiad pharagraf bho "Nuair a thill iad dhachaigh à Glaschu" gu "clann aca."
- Ciamar a tha Mac a' Ghobhainn an toiseach a' sealltainn dhuinn nach eil Murchadh agus Anna uile-gu-lèir toilichte sa phòsadh aca?
Tha an t-ùghdar ag innse dhuinn gu bheil iad air taigh mòr le gàrradh a cheannach agus gu bheil airgead gu leòr aca, "Cha robh dìth airgid orra".
Tha seo agus an t-iomradh air "faileas" no sgàile nam beatha a' toirt oirnn smaoineachadh gu bheil iad a' feuchainn rin cùl a chur ri cuspair doirbh a th' air a bhith nam beatha o chionn fhada agus gu bheil iad airson tòiseachadh às ùr.
"Feumaidh e bhith gun do thuit thu na do chadal, ars esan rithe."
- Dè tha freagairt Mhurchaidh do stòiridh Anna mun phiàno ag innse dhuinn mun chàirdeas a tha eatarra?
Chan eil Murchadh a' cur mòran sùim sna rudan a tha Anna ag innse dha, is tha e a' dèiligeadh rithe gun mòran tuigse.
Tha Anna ag aontachadh gura h-iongantach mura bheil Murchadh ceart. Tha seo a' daingneachadh na smuain gur dòcha nach eil mòran misneachd aice innte fhèin.
- Thadhail an cupal air càirdean agus tha sinn a' faighinn a-mach nach bi Murchadh ag òl. Carson, nad bheachd-sa, a chuir an sgrìobhadair am fiosrachadh seo dhan sgeulachd?
Bhon nach eil Murchadh ag òl tha sinn a' tuigsinn gur e duine stèidheil a th' ann agus gur toigh leis an-còmhnaidh smachd a bhith aige air a smuaintean agus air na nì e.
Tha e a' cur ri caractar Mhurchaidh mar neach-rannsachaidh ciallach, reusanta.
Leugh paragraf 14 a tha a' tòiseachadh, "Nuair a chaidh i fhèin is Murchadh dhachaigh bha a' ghealach".
- Mìnich ciamar a tha an Nuair a bhios sgrìobhadair a' tarraing dealbh le facail gus an leughadair a chuideachadh ann a bhith a' dèanamh dealbh dhen chuspair nan inntinn. an seo a' cruthachadh faireachdainn ghairiseachail.
Tha an t-ùghdar ag ràdh gun robh a' ghealach a' deàlradh san adhar agus gun robh an taigh "a' coimhead àraid anns an t-solas gheal ud, mar gum biodh e a' feitheamh". Tha an ìomhaigh seo a' cruthachadh faireachdainn ghairiseachail, thaibhseil leis mar a tha an dath geal air a chleachdadh.
Tro bhith a' Bidh an sgrìobhadair a' ceangal bhuadhan no ghnìomhan dhaoine ri rudeigin eile, me beathach, sìde, beachd. an taighe agus ag ràdh gun robh e "sàmhach", tha e a' cur nar cuimhne gur dòcha gu bheil e tathaichte, mar gum biodh beatha dha fhèin aig an taigh.
Leugh paragraf 19 bho "An latha bha seo 's i na h-aonar anns an taigh a-rithist" gu paragraf 21, "B' e Mairead ainm a màthar."
- Thoir cunntas air mar a tha ìomhaigheachd le dathan ag innse dhuinn mu charactar Mairead.
Tha "dreasa phinc" air Mairead nuair a tha i na suidhe aig a' phiàno.
Tha an t-ùghdar a' dèanamh dealbh de Mhairead mar leanabh le sùilean deàlrach "sùilean cho gorm ri sùilean doile".
Tha seo a' cur ri òige Mairead agus ris an smuain gur e dreach de nighean fhicseanail, fhoirfe a th' innte.
- Thoir sùil air paragraf 25. Mìnich carson a tha Anna ag innse na stòiridh mun nighinn sa choille agus am poileas do Mhairead.
Tha an sgeulachd seo a' nochdadh sealladh Anna fhèin air Murchadh.
Tha an sgeulachd a' cur ris a' bheachd gu bheil Murchadh a' cur bacadh air slighe Mairead gu Anna:
anns an deise ghorm mu coinneamh.
Tha e a' daingneachadh dreuchd Mhurchaidh mar phoileas ann am beatha agus ann an smuaintean Anna.
"Uill, ars esan, thàinig e steach orm gun robh mi gad fhàgail ro thric nad aonar."
- Nuair a tha Murchadh ag ràdh gur dòcha nach tèid e a dh'iasgach, dè tha sin a' sealltainn dhuinn mu na faireachdainnean aige a thaobh Anna?
Gu bheil e a' tòiseachadh air faireachdainn ciontach mun dòigh sa bheil e air a bhith a' dèiligeadh ri bhean.
Gu bheil e mothachail gu bheil e air a bhith ga fàgail leatha fhèin gu tric, gu bheil i aonranach agus gur dòcha gu bheil sin a' cur ri na tha a' tachairt.
Gu bheil ceistean air mu dhòigh-ghiùlain Anna agus gu bheil e airson tuilleadh fhaighinn a-mach.
"Am poileas ud leis an iasg marbh na làimh!"
- Mìnich ciamar a tha an ìomhaigh seo a' sealltainn gun do dh'atharraich An fhaireachdainn san fharsaingeachd a th' ann an teacsa no pàirt de theacsa; faodaidh taghadh-facail an ùghdair, luaths na sgeulachd, ruitheam no ìomhaigheachd na faireachdainn seo a chruthachadh. na sgeulachd.
An dèidh an t-uisge fhaicinn air an làr, tha Murchadh dhen bheachd gu bheil Anna an sàs ann an rudeigin.
Ged a tha e a-nis a' feuchainn ri iasg a ghlacadh seach eucoirich, tha an t-iasg marbh na làimh a' riochdachadh beatha dhìomhair Anna nuair a tha e a-muigh.
'S dòcha cuideachd gu bheil an t-iasg a' riochdachadh gun robh Murchadh soirbheachail, aon uair eile, ann a bhith a' faighinn a-mach na fìrinn.
- Dèan geàrr-chunntas air na dòighean san do dh'atharraich Murchadh inntinn aig deireadh na sgeulachd.
Tha Murchadh ag ràdh ri Anna gu bheil e air a bhith ga fàgail leatha fhèin ro thric.
Tha Murchadh ag ràdh ri Anna ma tha i a' faicinn a' phàiste gu bheil fios gu bheil i ann.
Tha Murchadh deònach suidhe còmhla ri Anna is i ag èisteachd airson ceòl a' phiàno.
Tha an dòigh sa bheil Murchadh a' glanadh a làmhan a' toirt a' bheachd dhuinn gu bheil e a' dèanamh oidhirp na mearachdan aige a chur ceart.
Leugh bho pharagraf 52, "Shuidh iad a-muigh anns a' ghrèin" gu deireadh na sgeulachd.
- Dè na co-dhùnaidhean a nì sinn bho na loidhnichean seo?
Tha Murchadh a' gabhail ris gum feum e coimhead às dèidh Anna.
Tha Murchadh toilichte a dhol le beachdan Anna airson a cuideachadh.
Gun tèid aig a' chupal air tòiseachadh a' bruidhinn air na duilgheadasan aca agus a bhith nas fhosgailte ri chèile a-rithist.
Gun urrainn dhan chàirdeas aca gluasad air adhart às an sin agus tighinn a-mach bhon fhaileas sa chiad pharagraf.
Feuch dè na dh'ionnsaich thu
Quiz
Ath-shùil air na dh'ionnsaich thu
Tha an sgeulachd ghoirid Mairead le Iain Mac a' Ghobhainn mu dheidhinn cupal a tha air an dreuchd a leigeil dhiubh agus a ghluais bhon bhaile mhòr dhan àite anns an do dh'fhàs iad suas.
Bha Murchadh na phoileas ach tha e a-nis a' cur seachad a bheatha ag iasgach.
Tha a bhean, Anna, glè thric air a fàgail a-staigh leatha fhèin agus tha i air tòiseachadh a' faicinn taibhs - nighean bheag air a bheil Mairead.
Nithean air a bheil an earrann a' togail air am faodar iomradh a thoirt ann an aiste litreachais:
- sgilean sgrìobhaidh
- conaltradh nan caractaran
- tèaman
Sgilean sgrìobhaidh a nochdas ann an rosg air a bheil an earrann a' togail:
| Sgil | Mìneachadh |
|---|---|
| còmhradh/conaltradh charactaran | Bidh sgrìobhadairean a' cleachdadh còmhradh is conaltradh nan caractaran airson am plot a ghluasad air adhart agus airson barrachd fiosrachaidh a thoirt dhuinn mu charactaran na sgeulachd. |
| cuspair | Fiosrachadh a tha am bàrd no an sgrìobhadair airson a thoirt dhuinn. An rud a tha a' cur dragh orra, leithid gaol no nàdar no bàs cultair. |
| ìomhaigheachd | Nuair a bhios sgrìobhadair a' tarraing dealbh le facail gus an leughadair a chuideachadh ann a bhith a' dèanamh dealbh dhen chuspair nan inntinn. |
| pearsanachadh | Bidh an sgrìobhadair a' ceangal bhuadhan no ghnìomhan dhaoine ri rudeigin eile, me beathach, sìde, beachd. |
| moitif | Eileamaid no samhla a bhios a' nochdadh uair is uair ann an teacsa (no obair ealain) leis an ath-aithris a' cuideachadh gus cuspair a stèidheachadh. |
| tèama | Prìomh bheachd no prìomh bheachdan a tha a' ruith tro theacsa. |
| tòna | An fhaireachdainn san fharsaingeachd a th' ann an teacsa no pàirt de theacsa; faodaidh taghadh-facail an ùghdair, luaths na sgeulachd, ruitheam no ìomhaigheachd na faireachdainn seo a chruthachadh. |
More on Litreachas
Find out more by working through a topic
- count1 of 6
- count2 of 6
- count3 of 6
- count4 of 6
