A' sgrìobhadh a' phìos
Nuair a tha thu a' dèanamh sgrìobhadh breithneachail, tha thu ag iarraidh gun cuir an leughadair luach sna rudan a tha thu ag ràdh. Mar sin, feumaidh tu na beachdan agad a chur an cèill ann an dòigh a chreideas an leughadair.
Tiotal agus ro-ràdh
Seo far an inns thu mun chuspair agus far an cuir thu ann an co-theacs e. Dh'fhaodadh tu tòiseachadh le beachd bho na naidheachdan, no beachd pearsanta, me
Cìs an t-siùcair: cudromach no caitheamh ùine?
Aig aon àm b' e tombaca agus smocadh prìomh amas an riaghaltais a thaobh a bhith ag atharrachadh dòigh-bheatha a' phobaill. Ach, beag air bheag, tha nàmhaid eile air ionnsaigh a thoirt air slàinte na dùthcha: siùcar. Tha an riaghaltas a-nis a' cur cìs a bharrachd air deochan-milis, an dùil gun dèan seo diofar...
Tha an ro-ràdh seo a' cur a' chuspair ann an co-theacs (slàinte na dùthcha) agus an uair sin a' togail air lagh ùr a chaidh a chur an gnìomh. Mar sin, tha beachd aig an leughadair air a' chuspair fhèin agus carson as fhiach a dheasbad.
A' cruthachadh argamaidean
Feumaidh tu smaoineachadh mun dòigh san cuir thu na h-argamaidean fa chomhair an leughadair.
Tha dòighean diofraichte ann air seo a dhèanamh, ach faodaidh tu an cruth a leanas a chleachdadh airson structar a chur air na paragrafan agad:
Beachd: inns dè am beachd a tha thu a' togail, me 'Sa chiad dol-mach, tha làn fhios againn san latha an-diugh mun droch bhuaidh a tha siùcar a' toirt air daoine...'
Fianais: stèidhichte air an rannsachadh a rinn thu, me 'Tha figearan a nochd ann an [Tiotal an iris/a' phàipeir-naidheachd] ag ràdh gu bheil na h-ìrean de thinneas an t-siùcair air dùblachadh sna fichead bliadhna a dh'fhalbh...'
Anailis: dèan sgrùdadh air an fhianais, me 'Ged nach e rud ùr a th' ann an tinneas an t-siùcair, tha e follaiseach gu bheil ceangal soilleir ann eadar cho bitheanta 's a tha siùcar ann am biadh is deoch san latha an-diugh agus ìrean àrda an tinneis seo...'
Ceangal: dèan ceangal eadar a' bheachd seo agus cuspair a' phìos sgrìobhaidh, me 'Chanadh cuid gur e deagh thoiseach-tòiseachaidh a th' anns a' chìs seo, gu h-àraidh an dòigh sa bheil i ag amas air aon dhe na prìomh adhbharan...'
Co-dhùnadh
Seo far an ceangail thu na beachdan gu lèir ri chèile. Bidh cruth a' cho-dhùnaidh a' tighinn a rèir amas a' phìos. A bheil thu a' dol a ghabhail taobh san argamaid? Ma tha, 's fhiach seo a dhèanamh soilleir a-rithist sa cho-dhùnadh.
Ma tha thu a' sgrìobhadh pìos connspaideach, dèan fhèin taghadh a bheil thu a' dol a ghabhail taobh no a bheil thu a' dol a dh'fhàgail a' cho-dhùnaidh aig an leughadair.
