Tha an rannsachadh a nì thu mun chuspair air leth cudromach. 'S mathaid gu bheil thu air cuspair a thaghadh air a bheil thu mion-eòlach, no rudeigin a tha an ìre mhath ùr dhut.

Ach, a dh'aindeoin cho eòlach 's a tha thu air a' chuspair, bu chòir dhut rannsachadh a dhèanamh air. Ma tha figearan is staitistigean, beachdan eòlaichean agus eisimpleirean agad, bidh na h-argamaidean agad tòrr nas treasa.

Tha iomadh stòr ann a bhiodh feumail mar ghoireas rannsachaidh:

• leabharlann
• an t-eadar-lìon
• artaigilean
• eòlaichean
• suirbhidhean
• beachdan dhaoine

Tha neartan is laigsean an lùib a h-uile fear dhe na goireasan seo agus feumaidh tu an cleachdadh gu faiceallach. Smaoinich mu na ceistean seo fhad 's a tha thu a' rannsachadh:

• A bheil an stòr seo earbsach?
• A bheil an stòr seo iomchaidh san latha an-diugh?
• A bheil an stòr seo a' dol a chuideachadh leis an argamaid a tha mi a' dèanamh?
• A bheil mi a' cumail clàr dhe na stòran a chleachd mi?

Tha e cudromach gun ainmich thu na stòran a tha thu a' cleachdadh sa phìos sgrìobhaidh, gus an creid an leughadair an rud a tha thu ag ràdh. Beachdaich air an diofar eadar:

Tha 90% de mhuinntir na h-Alba an aghaidh a' bheachd seo.

Tha suirbhidh a rinn Riaghaltas na h-Alba ann an 2015 a' sealltainn gu bheil 90% de mhuinntir na h-Alba an aghaidh a' bheachd seo.

Cò am beachd san cuireadh tu sùim agus carson?