Mannau cysegredigY synagog

Y synagog yw addoldy’r Iddewon. Bydd Iddewon yn ymgasglu yn y synagog:

• i weddïo fel cymuned
• i astudio
• i ddathlu gwahanol ddefodau newid byd a gwyliau
• i ymgynnull fel cymuned Iddewig

Minyan

Er y gall Iddewon weddïo yn unrhyw le, ac nad oes rhaid iddyn nhw weddïo yn y synagog bob amser, mae llawer o Iddewon yn credu bod gweddïo gydag aelodau eraill o’r gymuned Iddewig yn rhan bwysig o’u ffydd.

Enw’r Iddewon ar eu haddoliad cynulleidfaol yw’r minyan. Rhaid i o leiaf ddeg dyn Iddewig fod yn bresennol i gyflawni addoliad cyhoeddus. Bydd y rhan fwyaf o Iddewon yn mynd i’r synagog o leiaf unwaith yr wythnos er mwyn gweddïo cymunol a gall rhai Iddewon deddfol fynd bob nos.

Man astudio

Bydd llawer o Iddewon yn defnyddio’r synagog hefyd fel man astudio. Bydd Iddewon ifanc yn mynychu gwersi lle cânt ddysgu athrawiaeth grefyddol sylfaenol y ffydd. Bydd Iddewon hŷn yn astudio’r Torah trwy gydol eu hoes, a bydd gan y rhan fwyaf o synagogau lyfrgell yn llawn o’r testunau cysegredig Iddewig i’w hastudio gan eu dilynwyr.

Dathlu

Defnyddir y synagog hefyd fel man i gynnal amryw ddefodau newid byd a dathliadau Iddewig. Cynhelir seremonïau fel y Bar Mitzvah a phriodasau ac angladdau Iddewig i gyd yn y synagog. Caiff seremonïau eraill eu cynnal yn y synagog hefyd yn ystod adegau gŵyl, fel gwasanaeth y Shabbat, sy’n digwydd bob wythnos.

Y gymuned Iddewig

Mae’r synagog yn lle hefyd i gynnal digwyddiadau cymdeithasol a gwahanol weithgareddau. Bydd llawer o synagogau hefyd yn cyflawni swyddogaeth canolfan gymunedol, ac yn cynnal gwahanol bethau. Yn aml bydd amryw o ddigwyddiadau cymdeithasol yn digwydd bob wythnos.