Defnyddio lluniau a delweddau
Mae lluniau a delweddau yn helpu darllenwyr i ddeall cynnwys yn well. Maen nhw hefyd yn gwella arddull cyflwyno dogfen. Gall delweddau ddod o lawer o ffynonellau, er enghraifft:
- lluniau gwreiddiol sy’n cael eu creu â rhaglenni peintio
- llin-luniau yn defnyddio pecynnau Mae graffigwaith fector yn cael ei greu drwy ddefnyddio pecynnau graffigwaith ac mae’n cynnwys siapiau sy’n cael eu galw’n wrthrychau.
- ffotograffau wedi eu tynnu â chamera digidol, ac wedi eu trosglwyddo i’r ddogfen
- llyfrgelloedd clipluniau
- delweddau di-hawlfraint sydd ar gael ar-lein
Hawlfraint
Fel arfer, fodd bynnag, bydd ffotograffau, darluniau a delweddau eraill nad wyt ti wedi eu creu dy hun yn cael eu diogelu drwy hawlfraint fel gwaith artistig. Mae hyn yn golygu bydd angen i ti gael caniatâd perchennog/perchnogion yr hawlfraint os wyt ti eisiau eu defnyddio yn dy ddogfen.
Dewis delweddau effeithiol
Mae angen i ddelweddau sefyll allan a dal sylw’r darllenydd. Gall rhai delweddau fod yn ddiflas, ac mae eraill wedi cael eu defnyddio at syrffed, felly mae’n bwysig dewis delwedd sy’n edrych yn ddiddorol.
Wrth ddewis delwedd i’w chynnwys yn dy waith, bydd angen i ti ystyried:
- pa mor berthnasol yw’r ddelwedd
- pa mor unigryw yw’r ddelwedd
Dyma restr o bethau i feddwl amdanynt wrth ddewis delweddau effeithiol.
- A yw’r ddelwedd o ansawdd da? Os nad yw’r ddelwedd yn glir, paid â’i defnyddio.
- Pa mor fawr yw’r ddelwedd? Os yw’n fach iawn, efallai na fydd pobl yn sylwi arni, neu efallai na fyddant yn trafferthu edrych yn fanwl arni.
- Faint o ddelweddau wyt ti wedi eu defnyddio? Gall gormod o ddelweddau wneud gwybodaeth yn anodd i’w darllen.
- Sut mae’r delweddau wedi eu gosod? Paid â’u gosod yn rhywle lle maent yn torri ar rediad y testun.
- Pa mor amlwg yw’r delweddau? Paid â defnyddio clipluniau os nad oes rhaid. Ceisia ddewis delweddau gwahanol neu annisgwyl, ond sy’n dal yn berthnasol i’r cynnwys.
