Seo cothrom sgilean sgrìobhaidh a leasachadh aig Ìre Nàiseanta 5. Anns an earrainn, gheibh thu taic le eisimpleirean de rudan a tha cudromach a thaobh sgrìobhadh cruthachail.
Tha plot cudromach dhan a h-uile sgeulachd. Ach, tha e an urra riutsa dè an seòrsa plot a chleachdas tu. Tha cuid dhiubh gu math gnìomhach, far an tachair rudan dràmatach is far am bi car aig an deireadh.
Air neo, tha sgeulachdan ann far nach tachair mòran a thaobh gnìomh, ach tha smuaintean a' charactar agus na faireachdainnean aca ag atharrachadh tron sgeulachd.
Ge bith dè an seòrsa plot a chruthaicheas tu, cuimhnich gu bheil thu a' feuchainn ri aire an leughadair a chumail.
Mas e 's gu bheil thu a' strì ri plot a chruthachadh, faodaidh tu na ceistean seo a chleachdadh:
Miann: dè tha an caractar agad ag iarraidh?
Cnap-starra: dè tha a' cur stad orra?
Àirde: dè thachras nuair a dhèiligeas an caractar ris a' chnap-starra?
Fuasgladh: dè thachras nuair a gheibh an caractar am miann?
Ma smaoineachas tu mu sgeulachdan no filmichean ainmeil san latha an-diugh, tha mòran dhiubh a' leantainn an structair seo, me:
Miann: fear a tha ag iarraidh cuidhteas fhaighinn de fhàinne dhraoidheil, chunnartach
Cnap-starra: draoidh olc, cumhachdach le arm mòr ag iarraidh na fàinne
Àirde: an dà thaobh a' sabaid an aghaidh a chèile ann am blàr mòr, fuilteach
Fuasgladh: am fear a' cur às dhan fhàinne ann am beinn-theine is tha sìth ann.
