የኢትዮጵያ አየር መንገድ ወደ ትግራይ ከተሞች የሚያደርጋቸው በረራዎች መሰረዛቸው ተሰማ

የኢትዮጵያ አየር መንገድ ከአዲስ አበባ ወደ ተለያዩ የትግራይ ክልል ከተሞች አየር ማረፊያዎች የሚያደርጋቸው በረራዎች መሰረዛቸው ተነገረ።

ቢቢሲ ትግርኛ ሐሙስ ጥር 21/2018 ዓ.ም. ወደ ትግራይ ክልል የሚደረጉ በረራዎች መቋረጣቸውን ከተጓዦች እና ከክልሉ አንድ ኃላፊ ማረጋገጥ ችሏል።

ለዛሬ ተይዘው በነበሩ በረራዎች ወደ አዲስ አበባ ለመጓዝ ትኬት ቆርጠው የነበሩ መንገደኞች የሐሙስ ጥር 21/2018 ዓ.ም. መሰረዛቸውን የሚያስታውቅ አጭር የጽሁፍ መልዕክት እንደደረሳቸው ተናግረዋል።

በመልዕክቱ ላይ "ከዕቅድ ውጪ በመሆነ ምክንያት" በረራው መሰረዙን እና መንገደኞች የኢትዮጵያ አየር መንገድን ወይም የጉዞ ወኪላቸውን እንዲያገኙ መክሯል።

ነገር ግን የኢትዮጵያ አየር መንገድ የበረራዎቹን መቋረጥን በተለመከተ እስካሁን የሰጠው ይፋዊ ምክንያትም ሆነ መግለጫ የለም።

ስለ በረራዎች መሰረዝ የተጠየቁት የክልሉ ትራንስፖርት ኃላፊ አቶ ታደለ መንግሥቱ በረራዎች መቋረጣቸውን አረጋግጠው፤ ነገር ግን ዝርዝር መረጃ እንደሌላቸው ለቢቢሲ ተናግረዋል።

ቢቢሲ ከአየር መንገዱ ይፋዊ ማብራሪያ ለማግኘት ያደረገው ሙከራ አስካሁን ምላሽ አላገኘም፤ አንድ ስማቸው እንዲጠቀስ ያልፈቀዱ የአየር መንገዱ ኃላፊ ግን ወደ ትግራይ የሚደረጉ በረራዎች መቋረጣቸውን አረጋግጠዋል።

እኚሁ የአየር መንገዱ ባልደረባ እንደገለጹት "በረራዎች ለዛሬ [ሐሙስ] ብቻ ነው የተሰረዙት፤ ነገር ግን የቀጣይ ቀናት በረራዎች በሚኖረው ሁኔታ የሚወሰን ይሆናል" በማለት ለውሳኔው ምክንያቱ ምን እንደሆነ ከመግለጽ ተቆጥበዋል።

በዚህም ምክንያት ከአዲስ አበባ ወደ መቀሌ እና ወደ ሌሎች የትግራይ ክልል ከተሞች ሐሙስ ዕለት የሚደረጉ በረራዎች እንዲሁም ወደ አዲስ አበባ የሚደረጉ በረራዎች መሰረዛቸው ተሰምቷል።

መቀሌ የሚገኘው የቢቢሲ ትግርኛ ዘጋቢ ከአዲስ አበባ ወደ ትግራይ ክልል ከተሞች የሚደረጉ በረራዎች መሰረዛቸውን በከተማዋ ከሚገኘው የኢትዮጵያ አየር መንገድ የቲኬት ቢሮ ማረጋገጥ ችሏል።

በተጨማሪም መቀሌ የሚገኙ የኢትዮጵያ አየር መንገድ ሠራተኞች ዛሬ ወደ ቢሮ እንዳይገቡ እንደተናገራቸው ቢቢሲ ማረጋገጥ ችሏል።

የበረራዎቹን መቋረጥ በተለመከተ እስካሁን ከትግራይ ክልል ጊዜያዊ አስተዳደር እና ከኢትዮጵያ መንግሥት የተሰጠ አስተያየት የለም።

የቢቢሲ ዘጋቢ መቀለ ወደሚገኘው አሉላ አባነጋ አየር ማረፊያ በማቅናት እንዳጣራው በስፈራው የተለመደው የተጓዦች እንቅስቃሴ እንደሌለ እና ከአየር ማረፊያው የጥበቃ አባላት ውጪ የሌሎች እንቅስቃሴ እንደሌለ ገልጿል።