Arbër Vllahiu BBC, Tiranë

	Zgjedhjet e parakohshme besohet se do të mbahen brenda marsit

Jakup Krasniqi, ka bërë të ditur se pas takimeve do të marrë vendimin për një datë të caktuar për mbajtjen e zgjedhjeve, të cilën mund ta publikojë deri nga fillimi i javës së ardhshme.

Dallimet për datën janë theksuar pas përplasjeve mes partnerëve të koalicionit, që janë reflektuar edhe në mesin e forcave të tjera politike në vend.

PDK dhe LDK kanë këmbëngulur në qëndrimet e tyre për kohën e mbajtjes së zgjedhjeve të parakohshme, duke kërkuar, siç thonë, respektim të afateve kushtetuese.

Lidhja Demokratike ka kërkuar që zgjedhjet të mbahen në pranverën e vitit të ardhshëm, që do të shënonte respektimin e afateve kushtetuese prej jo më pak se 4 muajve dhe jo më shumë se 6 muaj nga data e shpalljes dhe do t’i jepte asaj kohë për përgatitje më të mirë pas procesit zgjedhor brenda partiak.

Partia Demokratike e kryeministrit Thaçi, thotë se java e parë e muajit shkurt të vitit të ardhshëm, do të mund të ishte më e përshtatshme për zgjedhjet e parakohshme meqë do të respektohej, siç thotë, edhe afati i paraparë për çertifikim të rezultateve si dhe ai për krijimin e koalicioneve të mundshme qeveritare.

Besohet ndërkaq se periudha mes muajit shkurt e mars do të shënojë kohën e mbajtjes së zgjedhjeve të parakohshme në vend, që u nxitën pas dorëheqjes së presidentit të Kosovës, si pasojë e një vendimi të Gjykatës Kushtetuese.