Ne seancën e parë është bërë vetëm betimi i deputetëve

Pika kryesore e rendit të ditës, zgjedhja e kryetarit dhe kryesisë së Kuvendit është shtyrë për ditën e mërkurë.

Kjo për shkak se dy forcat kryesore politike, Partia Demokratike dhe Lidhja Demokratike e Kosovës ende nuk kanë tejkaluar mospajtimet për formimin e qeverisë së re.

Kryetari i Partisë Demokratike, fituese e zgjedhjeve, Hashim Thaçi ka deklaruar pas seancës së Kuvendit se deri të mërkurën do të formohen të gjitha institucionet e Kosovës.

"Kosova të mërkurën do t'i ketë të gjitha institucionet që burojnë nga zgjedhjet e 17 nëntorit, presidentin, qeverinë, kryetarin dhe kryesinë e Parlamentit", tha zoti Thaçi

Mandatari për kryeministër, Hashim Thaçi ka deklaruar se bisedimet për formimin e qeverisë së re ndërmjet Partisë Demokratike dhe Lidhjes Demokratike kanë arritur në fazën përfundimtare dhe se zyrtarizimi i marrëveshjes do të bëhet shumë shpejt.

Ndërkohë shefi i UNMIK-ut, Joachim Reucker, ka përshëndetur konstituimin e Parlamentit dhe ka shfaqur bindjen se institucionet e reja të Kosovës, të dala nga zgjedhjet e 17 nëntorit, do të ndërtohen deri në mesin e javës së ardhshme.

Bisedimet ndërmjet dy forcave më të mëdha politike për formalizimin e koalicionit qeverisës janë tejzgjatur për shkak të disa mospajtimeve të brendshme partiake rreth ndarjes së pushtetit.

Ndarja e posteve

Lidhja Demokratike e Kosovës ka pranuar ofertën e mandatarit për kryeministër, Hashim Thaçi, që ajo të mbajë postin e presidentit, të ketë një zëvendëskryeministër dhe të udhëheqë me pesë ministri, ndërsa Partia Demokratike të udhëheqë qeverinë, parlamentin dhe shtatë ministri, kurse pakicat tri.

Por LDK-ja duket të jetë e pakënaqur me ministritë që i janë ofruar asaj, duke vlerësuar se i janë lënë dikasteret më të dobët.

PDK-ja, e cila ka rezervuar për vete ministritë kryesore si ajo e Ekonomisë dhe Financave, e Energjetikës dhe Minierave, Transportit e Telekomunikacionit, atë të Arsimit dhe disa të tjera, nuk është treguar e gatshme t'i ofrojë LDK-së më shumë.