Në një intervistë për BBC zoti Meta tha se shpresonte që periudha 120 ditësh për bisedime shtesë për zgjidhjen e statusit të Kosovës të ishte një zgjidhje taktike për të çuar në zbatimin e paketës së ndërmjetësit ndërkombëtar Ahtisaari.

Zoti Meta i quan të gabuara dhe të rrezikshme për stabilitetin e Ballkanit idetë për ndarje apo shkëmbime të territoreve në Kosovë.

Ai shprehu kënaqësi që ide të tilla janë tërhequr apo përgënjeshtruar shumë shpejt.

Lidhur me qëndrimin e shtetit shqiptar, zoti Meta tha se diplomacia shqiptare duhet të jetë më aktive në nxitjen e zgjidhjes së statusit të Kosovës bazuar në propozimet e paketës së zotit Ahtisaari.